តម្លៃអង្ករបាក់៥% របស់វៀតណាម បានធ្លាក់ចុះមកត្រឹម៤៣៤ដុល្លារក្នុង១តោន ដែលជាតម្លៃទាបបំផុតមិនធ្លាប់មានក្នុងរយៈពេល៤ឆ្នាំកន្លងមកនេះ ដែលធ្វើឱ្យកសិករវៀតណាម មានការរអ៊ូរទាំយ៉ាងខ្លាំង។ តម្លៃអង្ករបាក់៥% របស់ប្រទេសនេះ ឥឡូវមានតម្លៃទាបជាងដៃគូប្រកួតប្រជែងធំៗដូចជាប្រទេសថៃ ដែលមានតម្លៃ៤៧៩ដុល្លារ, ប៉ាគីស្ថាន តម្លៃ៤៤៨ដុល្លារ និងឥណ្ឌា តម្លៃ៤៤០ដុល្លារ។
កសិករវៀតណាម កំពុងស្រែកថ្ងូរដោយសារស្រូវធ្លាក់ថ្លៃខ្លាំងពេក ហើយបានបង្ហាញការព្រួយបារម្ភថា ប្រសិនបើតម្លៃបន្តធ្លាក់បន្ថែមទៀតកសិករវៀតណាម អាចប្រឈមមុខនឹងការខាតបង់ជាក់ជាមិនខាន។ នៅពេញ១ឆ្នាំ២០២៤ កន្លងទៅ វៀតណាមអាចនាំចេញអង្ករបានប្រមាណជាង៩លានតោន ដោយសារឥណ្ឌារឹតត្បិតការនាំចេញនៅប៉ុន្មានខែដើមឆ្នាំ ក្រោយបារម្ភពីសន្តិសុខស្បៀងនៅក្នុងប្រទេស។ ប៉ុន្តែចាប់ពីខែសីហាមក ឥណ្ឌាបានលុបចោលបម្រាមនេះវិញ ដែលគេរំពឹងថា ឥណ្ឌាអាចនឹងនាំចេញអង្ករបានចន្លោះពី២១ ទៅ២២លានតោន នៅឆ្នាំ២០២៥ នេះ។
ការប្រកួតប្រជែងពីឥណ្ឌា គឺជារឿងមួយ ប៉ុន្តែការកើនឡើងផលិតកម្មស្រូវ ដែលជាប្រភពដើមនៃអង្ករនៅលើពិភពលោកក៏ជាមូលហេតុមួយធ្វើឱ្យតម្លៃអង្ករធ្លាក់ចុះផងដែរ។
បើយោងតាមការិយាល័យកសិកម្មអាម៉េរិក ការប្រមូលផលស្រូវនៅក្នុងរដូវប្រមូលផលនៅឆ្នាំនេះត្រូវបានរំពឹងថា នឹងកើនឡើងជាង៣លានតោន ដែលនាំឲ្យបរិមាណស្រូវពិភពលោកសរុបនឹងឡើងដល់៥៣០ លានតោន ដូច្នេះប្រទេសមួយចំនួននឹងកាត់បន្ថយ ឫលុបចោលការនាំចូលអង្ករ។
នៅក្នុងស្ថានភាពបែបនេះ កាសែតបាងកកប៉ុស្តិ៍របស់ថៃ បានរាយការណ៍ថា ដើម្បីរក្សាសក្តានុពលទីផ្សារអង្ករ រដ្ឋាភិបាលថៃ ដែលនាំចេញបានជិត១០លានតោន កាលពីឆ្នាំមុន នឹងជួបប្រជុំជាមួយភាគីពាក់ព័ន្ធនៅថ្ងៃទី១៧ ខែមករា ខាងមុខនេះ ដើម្បីសម្លឹងរកច្រកកាត់បន្ថយថ្លៃដើមលើការកែច្នៃអង្ករ ដើម្បីសម្រួចលទ្ធភាពប្រកួតប្រជែង៕
ដោយៈ សរ សុជាតិ
