ប្រាក់យន់ចិន បានហក់ឡើងថ្លៃជិត៣% បើធៀបនឹងប្រាក់ដុល្លារអាម៉េរិក ក្នុងឆ្នាំ២០២៥ នេះ បើប្រៀបធៀបនឹងការធ្លាក់ថ្លៃ៥% ក្នុងឆ្នាំ២០១៨ អំឡុងសង្គ្រាមពាណិជ្ជកម្ម ដែលបញ្ឆេះឡើងដោយសហរដ្ឋអាម៉េរិក។ ក្រុមអ្នកវិភាគនិយាយថា ការហក់ឡើងថ្លៃជាលំដាប់នៃប្រាក់យន់របស់ចិន សម្រាប់ឆ្នាំ២០២៥ នេះ ភាគច្រើនដោយសារតែធនាគារកណ្ដាលចិន កំណត់អត្រាប្ដូរប្រាក់ខ្ពស់ប្រចាំថ្ងៃ ខណៈដែលបណ្ដាធនាគាររដ្ឋចិន ធ្វើអន្តរាគមន៍ទិញចូល ឬលក់ចេញប្រាក់ដុល្លារអាម៉េរិក ដើម្បីរក្សាអត្រាប្ដូរប្រាក់យន់កុំឱ្យធ្លាក់ចុះ។
ក្រុមអ្នកជំនាញសេដ្ឋកិច្ចនិយាយថា ក្រុងប៉េកាំង ធ្វើអន្តរាគមន៍បែបនេះ ដើម្បីបង្ហាញថា ប្រាក់យន់ចិន មានស្ថិរភាព និងអាចជឿទុកចិត្តបាន ស្រដៀងអ្វីដែលក្រុងប៉េកាំង ធ្លាប់បានធ្វើអំឡុងពេលមានវិបត្តិហិរញ្ញវត្ថុអាស៊ី ឆ្នាំ១៩៩៨។ ការធ្វើបែបនេះគាំទ្រដល់គោលដៅរយៈពេលវែងរបស់ប្រទេសចិន ក្នុងការពង្រីកការប្រើប្រាស់ប្រាក់យន់ចិន ឱ្យកាន់តែទូលំទូលាយនៅទូទាំងពិភពលោក ដើម្បីប្រជែងនឹងប្រាក់ដុល្លារអាម៉េរិក។
ទិន្ននន័យរបស់ធនាគារសម្រាប់ការទូទាត់ជាអន្តរជាតិ បានបង្ហាញថា ការប្រើប្រាស់ប្រាក់យន់ ចិន កំពុងកើនឡើង ដោយការជួញដូរប្រាក់យន់ប្រចាំថ្ងៃធៀបនឹងប្រាក់ដុល្លារ បានកើនឡើង ៦០% ចាប់តាំងពីឆ្នាំ២០២២ ឈានដល់៧៨១ពាន់លានដុល្លារ ដែលស្មើនឹងប្រមាណ៨% នៃការជួញដូររូបិយប័ណ្ណទូទាំងពិភពលោក។ វិធានការអន្តរាគមន៍របស់បណ្ដាធនាគាររដ្ឋចិន បានជួយរក្សាការប្រែប្រួល នៃអត្រាប្ដូរប្រាក់ឱ្យនៅទាប។
ទោះជាយ៉ាងណា អត្រាប្ដូរប្រាក់នៃប្រាក់យន់ ចិន គឺមិនស្មើគ្នានោះទេ ដោយវាបានធ្លាក់ថ្លៃ ៧,៧% បើធៀបនឹងប្រាក់អឺរ៉ូ ហើយក្រុមអ្នកវិភាគនិយាយថា ប្រាក់យន់ចិន នឹងមិនអាចក្លាយជារូបិយប័ណ្ណសកលដោយពិតប្រាកដនោះឡើយ លុះត្រាតែប្រទេសចិន បន្ធូរបន្ថយការរឹតបន្តឹងយ៉ាងតឹងរ៉ឹងរបស់ខ្លួនលើរំហូរប្រាក់ចេញ និងចូលប្រទេសចិន៕
ដោយ: តែម សុខុម
