ក្រុមប្រឹក្សាសន្ដិសុខអង្គការសហប្រជាជាតិចេញថ្កោលទោសរបបយោធាមីយ៉ាន់ម៉ាជុំវិញការកាត់ទោសប្រហារជីវិត

នៅក្នុងការយល់ស្របដ៏កម្រមួយ អំពីវិបត្តិក្រោយរដ្ឋប្រហារនៅមីយ៉ាន់ម៉ា ក្រុមប្រឹក្សាសន្ដិសុខអង្គការសហប្រជាជាតិ កាលពីថ្ងៃពុធសប្ដាហ៍នេះ បានចេញសេចក្ដីថ្លែងការណ៍ថ្កោលទោសការប្រហារជីវិតរបស់ប្រទេសមីយ៉ាន់ម៉ា ដែលការប្រហារជីវិតនេះ គឺជាលើកដំបូងហើយនៅក្នុងប្រទេសនេះ រាប់តាំងពីជាច្រើនទសវត្សរ៍កន្លងមកនេះ។ បន្ថែមពីនេះ ក្រុមប្រឹក្សាសន្ដិសុខអង្គការសហប្រជាជាតិក៏បានអំពាវនាវឲ្យមានការដោះលែង លោកស្រី អោង សានស៊ូជី និងអ្នកទោសនយោបាយផ្សេងៗទៀតជាបន្ទាន់ផងដែរ។

អ្វីដែលគេចាប់អារម្មណ៍នៅក្នុងសេចក្ដីសម្រេចថ្កោលទោសរបស់ក្រុមប្រឹក្សាសន្ដិសុខអង្គការសហប្រជាជាតិនោះ គឺថា ប្រទេសរុស្ស៊ី និងចិន ដែលជាសម្ព័ន្ដមិត្តដ៏សំខាន់របស់របបយោធានោះ ក៏បានគាំទ្រឲ្យមានការថ្កោលទោសនេះដែរ។

រដ្ឋាភិបាលស្រមោលមីយ៉ាន់ម៉ា NUG ក៏បានលើកឡើងនៅក្នុងគណនី Twitter ស្វាគមន៍ការថ្កោលទោសរបស់ក្រុមប្រឹក្សាសន្ដិសុខអង្គការសហប្រជាជាតិនេះ ហើយក៏បានសង្កត់ធ្ងន់ថា វាគឺដល់ពេលវេលាសម្រាប់ក្រុមប្រឹក្សាសន្ដិសុខ ចាត់វិធានការជាក់ស្ដែង ដើម្បីប្រឆាំងនឹងរបបយោធាហើយ។

សូមបញ្ជាក់ថា ការប្រកាសពីកាត់ទោសប្រហារជីវិតលើសកម្មជនបក្សប្រឆាំងចំនួន៤នាក់ កាលពីថ្ងៃ២៥ កក្កដា របស់របបយោធា បានធ្វើឲ្យមានការថ្កោលទោសពីជុំវិញពិភពលោក ដោយបង្កើតឲ្យមានការបារម្ភថា នឹងជំរុញឲ្យមានការអំពាវនាវចាត់វិធានការកាន់តែតឹងរ៉ឹងជាអន្តរជាតិ ទៅលើរបបយោធាមីយ៉ាន់ម៉ាបន្ថែមទៀត។

ជាក់ស្ដែង សហរដ្ឋអាមេរិក បានប្រកាសហើយថា អាមេរិកនឹងលែងបន្ដទំនាក់ទំនងដូចធម្មតាជាមួយមីយ៉ាន់ម៉ាទៅទៀតហើយ ក្រោយពីមានការកាត់ទោសប្រហារជីវិតសកម្មជនប្រឆាំងចំនួន៤នាក់នោះ។ ហើយអាមេរិក កំពុងតែពិចារណាគ្រប់ជម្រើសទាំងអស់ ដើម្បីដាក់ទណ្ឌកម្មទៅលើរបបយោធាមីយ៉ាន់ម៉ាបន្ថែមទៀត៕