តម្លៃជ័រកៅស៊ូនៅថៃ ដាំក្បាលចុះ ក្រោយការដាក់ពន្ធរបស់លោក ត្រាំ ទាញទម្លាក់តម្រូវការរថយន្តថ្មីៗ

តម្លៃជ័រកៅស៊ូធម្មជាតិ ដែលជាវត្ថុធាតុដើមដ៏សំខាន់មួយសម្រាប់ធ្វើសំបកកង់យានយន្តរបស់ថៃ អាចឡើងថ្លៃមកវិញ ឬបន្តធ្លាក់ចុះបន្ថែមទៀត វាអាស្រ័យលើការចរចារបស់រដ្ឋាភិបាលថៃ ជាមួយសហរដ្ឋអាម៉េរិក លើបញ្ហាពន្ធគយបដិការរបស់លោក ដូណាល់ ត្រាំ ដែលបានដាក់លើប្រទេសថៃ និងប្រទេសរាប់សិបផ្សេងទៀត។

បើតាមអាជ្ញាធរកៅស៊ូថៃ តម្លៃជ័រកៅស៊ូនៅប្រទេសថៃ ដែលជាអ្នកផលិតជ័រកៅស៊ូធំបំផុតនៅលើពិភពលោកបានរងសម្ពាធ និងធ្លាក់ចុះខ្លាំងតាំងពីថ្ងៃទី៨ ខែមេសា មកម្ល៉េះ។ បច្ចុប្បន្នតម្លៃជ័រកៅស៊ូអាចលក់បានចន្លោះពី១,៦៥ដុល្លារ ទៅ១,៧៤ដុល្លារ ក្នុងមួយគីឡូក្រាម ដោយបានធ្លាក់ចុះប្រមាណពី១០ ទៅ២០% បើធៀបនឹងកម្រិតឡើងថ្លៃខ្ពស់បំផុតជាង២ដុល្លារក្នុងមួយគីឡូក្រាមកាលពីចុងខែមីនា។

សូមរំលឹកថា លោក ដូណាល់ ត្រាំ បានដាក់ពន្ធបន្ថែម២៥% លើការនាំចូលរថយន្ត និងបានប្រកាសពីផែនការអនុវត្តពន្ធនេះដូចគ្នាចំពោះគ្រឿងបន្លាស់រថយន្តបរទេសនៅក្នុងខែឧសភានេះផងដែរ។ ការយកពន្ធទាំងនេះបានធ្វើឱ្យតម្រូវការរថយន្តថ្មីចុះខ្សោយ ដែលបានជះផលប៉ះពាល់អវិជ្ជមានដល់តម្លៃជ័រកៅស៊ូធម្មជាតិ នៅលើទីផ្សារអន្តរជាតិ ក៏ដូចជានៅប្រទេសថៃ។

លោក តេតស៊ូយ៉ា កាណេកូ (Tetsuya Kaneko) ប្រធានអ្នកស្រាវជ្រាវនៅវិទ្យាស្ថានម៉ារូបេនី (Marubeni) ដែលផ្តោតលើតំបន់អាស៊ីអាគ្នេយ៍ និងអាស៊ីខាងត្បូង បាននិយាយថា តម្លៃជ័រកៅស៊ូអន្តរជាតិ នឹងអាស្រ័យលើលទ្ធផលចរចាចុងក្រោយលើបញ្ហាពន្ធបដិការ ដែលពេលនេះលោក ត្រាំ បានពន្យារអនុវត្តរយៈពេល៩០ថ្ងៃ ហើយតម្លៃជ័រកៅស៊ូរបស់ថៃ វាអាស្រ័យលើការចរចារវាងប្រទេសថៃ និងសហរដ្ឋអាម៉េរិក៕
ដោយ៖ សុខ មង្គល