វៀតណាម ដាក់គោលដៅបង្កើនការនាំចេញឱ្យបាន៦%នៅឆ្នាំ២០២៤ និងរក្សាអតិរេកពាណិជ្ជកម្មឱ្យស្ថិតក្នុងទំហំ១៥ពាន់លានដុល្លារ
ក្រសួងឧស្សាហកម្ម និងពាណិជ្ជកម្មនៃប្រទេសវៀតណាម ដែលមានប្រជាជនប្រមាណ៩៩លាននាក់បានដាក់គោលដៅបង្កើនទំហំការនាំចេញសរុបនៅឆ្នាំ២០២៤ ឱ្យបានប្រហែល៦%ប…
ប្រទេសរុស្ស៊ីបាននិយាយថា ខ្លួនបានបង្វែរការនាំចេញប្រេងរបស់ខ្លួនស្ទើរតែទាំងស្រុងទៅកាន់ប្រទេសចិន និងឥណ្ឌា ហើយប្រាក់ចំណូលរបស់រុស្ស៊ីបានវិលត្រឡប់ទៅរកកម្រិតដូចទៅនឹងកម្រិតនៅឆ្នាំ២០២១ អ៊ីចឹងដែរ។ នេះបើតាមការអះអាងរបស់លោក អាឡិកសានឌឺ ណូវ៉ាក (Alexander Novak) ឧបនាយករដ្ឋមន្ត្រីរុស្ស៊ីទទួលបន្ទុកខាងថាមពល។
លោក ណូវ៉ាក បាននិយាយថា បច្ចុប្បន្នប្រទេសរុស្ស៊ីកំពុងរងទណ្ឌកម្មមួយចំនួនដែលប្រទេសបស្ចិមលោកបានដាក់ដោយសារតែការវាយលុករបស់ខ្លួនទៅលើអ៊ុយក្រែន ប៉ុន្តែឥឡូវនេះរុស្ស៊ីកំពុងបង្វែរទិសដៅនៃការលក់ប្រេងរបស់ខ្លួនប្រហែល៤៥-៥០%ទៅឱ្យប្រទេសចិន និង៤០% ទៀតទៅឱ្យប្រទេសឥណ្ឌា។
លោក ណូវ៉ាក បានពន្យល់នៅក្នុងបទសម្ភាសជាមួយនឹងទូរទស្សន៍រុស្ស៊ីមួយថា ប្រសិនបើកាលពីមុន រុស្ស៊ីបានផ្គត់ផ្គង់អឺរ៉ុបពីចន្លោះ៤០-៤៥%នៃបរិមាណនាំចេញប្រេងនិងផលិតផលប្រេងសរុបមែននោះ រុស្ស៊ីរំពឹងថា តួលេខនេះនឹងមិនកើនលើសពី៤-៥%នៅចុងឆ្នាំនេះទេ។
លោក ណូវ៉ាក បានអះអាងថា មនុស្សជាច្រើនចង់ទិញប្រេង និងផលិតផលប្រេងរបស់រុស្ស៊ី ហើយមនុស្សទាំងនោះ គឺស្ថិតនៅក្នុងប្រទេសនៅតំបន់អាម៉េរិកឡាទីន បណ្តាប្រទេសនៅតំបន់អាហ្វ្រិក និងប្រទេសផ្សេងទៀតនៅក្នុងតំបន់អាស៊ីប៉ាស៊ីហ្វិកផងដែរ។
បើយោងតាមឧបនាយករដ្ឋមន្ត្រីរុស្ស៊ីរូបនេះ ប្រាក់ចំណូលប្រេង និងឧស្ម័នរបស់រុស្ស៊ីនឹងមានចំនួនជិត៩ពាន់លានរូប្លប្រហែលជាង៩៧ពាន់លានដុល្លារនៅឆ្នាំនេះ គឺវាជិតស្មើនឹងកម្រិតនៅក្នុងឆ្នាំ២០២១ ដែលជាពេលមួយនៅមុនពេលមានការដាក់ទណ្ឌកម្មពីប្រទេសបស្ចិមលោកដោយសារតែការឈ្លានពានរបស់រុស្ស៊ីទៅលើអ៊ុយក្រែន។
លោក ណូវ៉ាក បានបន្ថែមថា ឧស្សាហកម្មអ៊ីដ្រូកាបូនតំណាងឱ្យ២៧% នៃផលិតផលក្នុងស្រុកសរុបរបស់រុស្ស៊ី ហើយការលក់រុស្ស៊ីនៅក្រៅប្រទេសមានចំនួនប្រហែល៥៧% នៃការនាំចេញសរុបរបស់ប្រទេសនេះ៕
អត្ថបទ៖ សុខ ជា
None
