រុស្ស៊ីថ្កោលទោសអាម៉េរិក ចំពោះការរឹបអូសនាវាដឹកប្រេងបំពាក់ទង់ជាតិខ្លួន និងទាមទារឱ្យដោះលែងជនជាតិរុស្ស៊ី នៅលើនាវាជាបន្ទាន់

កងកម្លាំងអាម៉េរិក បានបើកប្រតិបត្តិការបង្ក្រាប និងរឹបអូសនាវាដឹកប្រេងមានឈ្មោះថា ម៉ារីណេរ៉ា (Marinera) ដែលបំពាក់ទង់ជាតិរុស្ស៊ី បន្ទាប់ពីតាមប្រមាញ់អស់រយៈពេលជិត២សប្តាហ៍ ខណៈនាវានេះកំពុងធ្វើដំណើរឆ្លងកាត់ដែនទឹករវាងអ៊ីស្លង់ និងស្កុតលែន។ ការរឹបអូសនាវាដឹកប្រេងនេះ ដោយមានការជួយគាំទ្រពីកងទ័ពជើងអាកាស និងជើងទឹករបស់អង់គ្លេស។

ការបង្ក្រាបនាវាដឹកប្រេងនេះបានកើតឡើងស្របពេលសហរដ្ឋអាម៉េរិក កំពុងព្យាយាមទប់ស្កាត់ការនាំចេញប្រេងឆៅភាគច្រើនរបស់វេណេស៊ុយអេឡា និងនៅថ្ងៃបន្ទាប់ពីកងកម្លាំងពិសេសរបស់អាម៉េរិក ចាប់ខ្លួនមេដឹកនាំវេណេស៊ុយអេឡា លោក នីកូឡាស ម៉ាឌូរ៉ូ ក្នុងការវាយឆ្មក់ដ៏ខ្លាំងក្លាមួយទៅលើទីក្រុងការ៉ាកាស កាលពីថ្ងៃទី៣ ខែមករា កន្លងទៅនេះ។

ភ្លាមៗនោះ ក្រសួងដឹកជញ្ជូនរុស្ស៊ី បានអះអាងថា ខ្លួនបានផ្តល់ការអនុញ្ញាតឱ្យនាវានេះប្រើប្រាស់ទង់ជាតិរុស្ស៊ី បណ្ដោះអាសន្នប៉ុណ្ណោះ ហើយបានបន្ថែមថា គ្មានរដ្ឋណាមួយមានសិទ្ធិប្រើកម្លាំងប្រឆាំងនឹងនាវា ដែលបានចុះបញ្ជីត្រឹមត្រូវនៅក្នុងដែនសមត្ថកិច្ចរបស់រដ្ឋផ្សេងឡើយ​៕

អត្ថបទ សួន ឡង់ទី​