លោក David Malpass ប្រធានធនាគារពិភពលោក បានថ្លែងថា នៅឆ្នាំក្រោយ វានឹងមានហានិភ័យ និងគ្រោះថ្នាក់ដ៏ពិតប្រាកដមួយនូវការធ្លាក់ចុះសេដ្ឋកិច្ចសាកល ដោយសារតែកំណើនយឺតយ៉ាវក្នុងប្រទេសសេដ្ឋកិច្ចធំៗ ការធ្លាក់ចុះតម្លៃរូបិយបណ្ណរបស់ប្រទេសកំពុងអភិវឌ្ឍន៍ និងការបន្តកើនឡើងអតិផរណាជាដើម។
ចំណែកលោកស្រី Kristalina Georgieva នាយក IMF បានលើកឡើងថា សកម្មភាពសេដ្ឋកិច្ចកំពុងមានភាពយឺតយ៉ាវនៅក្នុងតំបន់អឺរ៉ុប ដែលរងគ្រោះពីការឡើងថ្លៃឧស្ម័នធម្មជាតិ និងប្រទេសចិនដែលបន្តញាំញីពីជំងឺកូវីដ-១៩ ព្រមទាំងសហរដ្ឋអាមេរិក ដែលជួបការដំឡើងអត្រាការប្រាក់គោលផងដែរ។
មេដឹកនាំស្ថាប័នហិរញ្ញវត្ថុទាំងពីរដែលបានជួបពិភាក្សាគ្នាកាលពីថ្ងៃចន្ទម្សិលមិញនេះ បានបញ្ជាក់រួមគ្នាថា កំណើនសេដ្ឋកិច្ចយឺតនៅក្នុងប្រទេសសេដ្ឋកិច្ចជឿនលឿន ការដំឡើងអត្រាការប្រាក់គោល បញ្ហាអាកាសធាតុ តម្លៃខ្ពស់នៃស្បៀងអាហារ និងថាមពល បាននឹងកំពុងជះឥទ្ធិពលធ្ងន់ធ្ងរដល់ប្រទេសក្រីក្រ ដោយស្ថាប័នទាំងពីរបានអំពាវនាវឱ្យមានវិធានការជួយដល់ប្រទេសទាំងនោះ។
បើតាមលោកស្រី Georgieva បានឱ្យដឹងថា IMF នឹងជំរុញឱ្យធនាគារកណ្តាលរបស់ប្រទេសនីមួយៗ បន្តប្រឹងប្រែងដើម្បីទប់ទល់នឹងអតិផរណា ហើយវិធានការសារពើពន្ធក៏គួររៀបចំឱ្យត្រូវគោលដៅផងដែរ។
អត្ថបទគួរអាន
លោកស្រីបន្តថា ពិភពលោកត្រូវការទឹកប្រាក់ប្រមាណពី ៣ ទៅ ៦ ទ្រីលានដុល្លារ ដើម្បីដោះស្រាយបញ្ហាការប្រែប្រួលអាកាសធាតុ ហើយវាក៏មានសារៈសំខាន់ក្នុងការបង្កើនកិច្ចសហប្រតិបត្តិការជាមួយវិស័យឯកជន និងមូលនិធិសម្រាប់កម្ចីវិនិយោគ ដើម្បីបំពេញតម្រូវការ។
ជុំវិញការព្រមានពីវិបត្តិសេដ្ឋកិច្ចខាងលើនេះ អគ្គនាយធនាគារវិនិយោគអាមេរិក JPMorgan Chase & Co ក៏មានទស្សនៈដូចគ្នានេះដែរ។ លោក Jamie Dimon នាយកប្រតិបត្តិធនាគារ JPMorgan បានថ្លែងក្នុងកិច្ចសម្ភាសន៍មួយជាមួយ CNBC ថា សេដ្ឋកិច្ចអាមេរិក និងសេដ្ឋកិច្ចសាកល នឹងធ្លាក់ចូលជ្រោះនៃវិបត្តិនៅត្រឹមពាក់កណ្តាលឆ្នាំ២០២៣ ក្រោមហេតុផលប្រហាក់ប្រហែលគ្នានឹង IMF និង ធនាគារពិភពដែរ ពោលគឺរួមមាន បញ្ហាអតិផរណា ការដំឡើងអត្រាការបា្រក់គោល និងការឈ្លានពានរបស់រុស្ស៊ីលើអ៊ុយក្រែនជាដើម។
កាលពីសប្តាហ៍មុន អង្គការពាណិជ្ជកម្មពិភពលោក WTO បានបង្ហាញការព្យាកររបស់ខ្លួនថា ទំហំពាណិជ្ជកម្មទំនិញពិភពលោក នឹងកើនឡើងដល់ ៣,៥% នៅឆ្នាំ២០២២នេះ។ ប៉ុន្តែសម្រាប់ឆ្នាំ២០២៣ វានឹងមានកំណើនត្រឹមតែ ១%ប៉ុណ្ណោះ ដែលជាការធ្លាក់ចុះយ៉ាងខ្លាំងជាងការរំពឹងទុកកាលពីដើមឆ្នាំនេះ ដែលធ្លាប់រំពឹងថានឹងមានកំណើនដល់ ៣,៤%។ នោះក៏ដោយសារតែ សេដ្ឋកិច្ចសាកលប្រឈមនឹងវិបត្តិជាច្រើន។
ជាមួយគ្នានោះដែរ ការសម្រេចកាត់បន្ថយការផលិតប្រេង ២លានបារ៉ែលក្នុងមួយថ្ងៃ របស់អង្គការប្រទេសនាំចេញប្រេង និងសម្ព័ន្ធមិត្ត (OPEC+) និងការដាក់កំហិតការនាំចេញបច្ចេកវិទ្យាផលិតឈីបរបស់អាមេរិកទៅប្រទេសចិន ក្នុងពេលថ្មីៗនេះ សុទ្ធតែបង្កផលប៉ះពាល់អវិជ្ជមានខ្លាំងដល់សេដ្ឋកិច្ចពិភពលោកផងដែរ៕
អត្ថបទ៖ នៅ សំភី
