មន្ត្រីជាន់ខ្ពស់រុស្ស៊ីអះអាងថា កិច្ចព្រមព្រៀងសន្តិភាពនៅអ៊ុយក្រែនត្រូវតែហាមឃាត់អ៊ុយក្រែនពីការចូលជាសមាជិកអង្គការណាតូ

ខណៈលោក ត្រាំ គ្រោងនឹងពិភាក្សាគ្នាតាមទូរសព្ទជាមួយលោក វ៉្លាឌីមៀ ពូទីន អំពីកិច្ចព្រមព្រៀមនេះនៅថ្ងៃអង្គារ សប្តាហ៍នេះ។ នេះបើយោងតាមការចុះផ្សាយរបស់សារព័ត៌មាន BBC។

អនុរដ្ឋមន្ត្រីការបរទេសរុស្ស៊ីលោក អាឡិកសានឌឺ គ្រូស្កូ (Alexander Grushko) បាននិយាយថា រុស្ស៊ីនឹងស្វែងរកការធានាថា អង្គការណាតូនឹងដកអ៊ុយក្រែនចេញពីសមាជិកភាពរបស់សម្ពន្ធយោធាមួយនេះ ហើយថា អ៊ុយក្រែននឹងរក្សាអព្យាក្រឹតភាពនៅក្នុងកិច្ចព្រមព្រៀងសន្តិភាពទាំងអស់។ មន្ត្រីជាន់ខ្ពស់រូបនេះ បានប្រាប់ប្រព័ន្ធផ្សព្វផ្សាយរុស្ស៊ី ថា រុស្ស៊ីនឹងទាមទារឱ្យមានការធានាសុវត្ថិភាពយ៉ាងរឹងមាំនៅក្នុងកិច្ចព្រមព្រៀងសន្តិភាពនៅអ៊ុយក្រែន ហើយផ្នែកនៃការធានាទាំងអស់គួរតែជាភាពអព្យាក្រឹតរបស់អ៊ុយក្រែនដែលមិនចូលបក្សសម្ពន្ធរបស់អង្គការណាតូ។

ការចេញមកបញ្ជាក់បែបនេះរបស់មន្ត្រីជាន់ខ្ពស់រុស្ស៊ីធ្វើឡើងនៅចំពេលប្រធានាធិបតីអាម៉េរិកលោក ដូណាល់ ត្រាំ គ្រោងនឹងពិភាក្សាគ្នាតាមទូរសព្ទជាមួយសមភាគីរុស្ស៊ីលោក វ៉ា្លឌីមៀ ពូទីន នៅថ្ងៃអង្គារ សប្តាហ៍នេះ ខណៈកិច្ចចរចាលើបទឈប់បាញ់សម្រាប់សង្រ្គាមនៅអ៊ុយក្រែន ដែលបានអូសបន្លាយអស់រយៈពេលជាង៣ឆ្នាំកន្លងមកនេះនៅតែបន្ត។ បើតាមការអះអាងរបស់លោក ត្រាំ អ៊ុយក្រែនទំនងជាមិនអាចជៀសផុតពីការកាត់ដីឱ្យរុស្ស៊ីនោះទេក្នុងការដោះដូរយកសន្តិភាព។ ប្រធានាធិបតីទី៤៧របស់សហរដ្ឋអាម៉េរិករូបនេះបានសង្កត់ធ្ងន់ថា លោក បានពិភាក្សាគ្នារួចហើយអំពីការបែងចែកទ្រព្យសម្បត្តិមួយចំនួនរវាងរុស្ស៊ី និងអ៊ុយក្រែន។

សូមរំលឹកថា សហរដ្ឋអាម៉េរិក និងអ៊ុយក្រែនបានព្រមព្រៀងគ្នារួចហើយក្នុងការដាក់សំណើសុំបទឈប់បាញ់គ្នា៣០ថ្ងៃទៅឱ្យរុស្ស៊ីសម្រេចចិត្ត ហើយលោក ពូទីន ក៏បានគាំទ្រចំពោះបទឈប់បាញ់នេះដែរ ប៉ុន្តែលោកបានទាមទារឱ្យមានលក្ខខណ្ឌតឹងរ៉ឹងមួយចំនួនដើម្បីសម្រេចបានសន្តិភាពនៅអ៊ុយក្រែន៕

អត្ថបទ៖ សុខ មង្គល