កម្ពុជា រកចំណូលបានជាង៣០០លានដុល្លារពីការលក់ជ័រកៅស៊ូ និងឈើកៅស៊ូនៅឆមាសទី១ឆ្នាំនេះ

លោក ឃុន កក្កដា អគ្គនាយកស្ដីទីនៃអគ្គនាយកដ្ឋានកៅស៊ូ បានឱ្យដឹងថា ការគ្រប់គ្រង ប្រមូលផល កែច្នៃ និងធុរកិច្ចនៅតាមបណ្ដាក្រុមហ៊ុនចម្ការកៅស៊ូ និងកៅស៊ូគ្រួសារមិនមានការប្រែប្រួលគួរឱ្យកត់សម្គាល់នោះទេ គិតមកទល់ពេលនេះ ពោលគឺនៅដំណើរការជាធម្មតា។ តួយ៉ាង នៅក្នុងរយៈពេល៦ខែដើមឆ្នាំ២០២៥ កម្ពុជា រកចំណូលបានជាង៣០០លាន​ដុល្លារពីការនាំចេញជ័រកៅស៊ូ និងឈើកៅស៊ូទៅកាន់ទីផ្សារអន្តរជាតិ និងការស្រូបទាញពីតម្រូវការប្រើប្រាស់ក្នុងស្រុក មានការកើនឡើងប្រមាណជាង៤១% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះចំណូលពីការនាំចេញជ័រកៅស៊ូមានចំនួនជាង២០៨លានដុល្លារក្រោយនាំចេញបានជាង១១ម៉ឺនតោន, ចំណូលពីការលក់ជ័រកៅស៊ូក្នុងស្រុកមានជាង៩៣លានដុល្លារជាមួយបរិមាណជ័រកៅស៊ូជាង៥ម៉ឺន៣ពាន់តោន និងចំណូលពីការនាំចេញឈើកៅស៊ូជាង២លានដុល្លារជាមួយបរិមាណជិត១ម៉ឺនម៉ែត្រគូប។

បើតាមមន្ត្រីជាន់ខ្ពស់រូបនេះ តម្លៃលក់ជ័រកៅស៊ូជាមធ្យមនៅឆមាសទី១ ឆ្នាំ២០២៥ អាចលក់បានជាង១ពាន់៨រយដុល្លារក្នុង១តោនកើនឡើងចំនួន៣៣៥ដុល្លារក្នុង១តោន បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានតម្លៃជាមធ្យមប្រមាណជាង១ពាន់៥រយដុល្លារក្នុង១តោន។

គិតមកទល់ពេលនេះ កម្ពុជា មានផ្ទៃដីដាំកៅស៊ូសរុបជាង៤២ម៉ឺនហិកតា ក្នុងនោះផ្ទៃដីចៀរជ័រមានចំនួនជាង៣៣ម៉ឺនហិកតា ស្មើនឹង៧៨% និងផ្ទៃដីថែទាំមានចំនួនជាង៩ម៉ឺន៥ពាន់ហិកតាស្មើនឹង២២%។ ជាមួយគ្នានេះ ផ្ទៃដីកៅស៊ូវិនិយោគមានចំនួន៤ម៉ឺន៧ពាន់ហិកតា ស្មើនឹង១១% ផ្ទៃដីកៅស៊ូសម្បទានដីសេដ្ឋកិច្ចមានចំនួនជាង១៧ម៉ឺនហិកតា ស្មើនឹង៤១% និងផ្ទៃដីកៅស៊ូគ្រួសារមានចំនួនជាង២០ម៉ឺនហិកតា ស្មើនឹង៤៨%៕