គុណភាពអប់រំសាលារដ្ឋនឹងប្រសើរឡើងតាមរយៈការជ្រើសរើសគណៈគ្រប់គ្រង

ក្នុងពិធីអបអរសាទរទិវាគ្រូបង្រៀន ៥ តុលា ប្រចាំឆ្នាំ២០២៣ ក្រោមប្រធានបទ "គ្រូបង្រៀនជាសសរស្ដម្ភនៃកំណែទម្រង់សាលារៀនឆ្ពោះទៅរកឧត្ដមភាព" សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានជំរុញឱ្យក្រសួងអប់រំ យុវជន និងកីឡា ព្រមទាំងក្រសួងការងារ និងបណ្ដុះបណ្ដាលវិជ្ជាជីវៈ ត្រូវសិក្សាមើលរវាងចំណេះដឹងទូទៅ និងជំនាញវិជ្ជាជីវៈ តាមរយៈការតម្រង់ទិស និងបណ្តុះបណ្តាលឲ្យបានទាន់ពេលវេលា ទាន់សភាពការណ៍ ខណៈរាជរដ្ឋាភិបាលកំពុងពិចារណាឲ្យសិស្ស ដែលចង់ចាប់ជំនាញវិជ្ជាជីវៈពុំចាំបាច់រៀនចប់ថ្នាក់ទី១២។

ទាក់ទងនឹងកំណែទម្រង់លើវិស័យអប់រំនេះ សម្តេចធិបតី ហ៊ុន ម៉ាណែត បានរំលេចនូវចំណុចសំខាន់នៃការរៀបចំគ្រូបង្រៀន និងការជ្រើសរើសនាយកសាលាឱ្យត្រឹមត្រូវតាមយន្តការ ដែលជាការទទួលខុសត្រូវក្នុងការដឹកនាំគ្រប់គ្រងផ្ទាល់ និងជាគំរូក្នុងសាលា និងសម្រាប់សិស្ស។ នៅក្នុងកំណែទម្រង់នេះ សម្តេចធិបតី បានបង្ហាញពីមហិច្ឆតាប្រែក្លាយសាលារដ្ឋទាំងអស់ឱ្យក្លាយជាសាលាមានគុណភាពល្អ អាចទទួលយកបាន ខណៈរាជរដ្ឋាភិបាលនីតិកាលទី៧នេះ គឺជាដំណាក់កាលពង្រឹងនូវអ្វីដែលមានស្រាប់ដែលផ្ដោតលើសេវាតាមមូលដ្ឋានជាជាងការពង្រីកបន្ថែម។

ទន្ទឹមនឹងនេះសម្តេចធិបតី ហ៊ុន ម៉ាណែត ជំរុញឱ្យក្រសួងអប់រំ យុវជន និងកីឡាពង្រឹងការលក់ចំណីអាហារនៅតាមសាលារៀន និងស្នើឱ្យអ្នកលក់ដូរទាំងអស់ត្រូវយកចិត្តដាក់ខ្ពស់លើគុណភាពចំណីអាហារ និងសុខភាពរបស់សិស្សានុសិស្សជាជាងផ្តោតតែលើប្រាក់ចំណេញ។

សូមបញ្ជាក់ថា រាជរដ្ឋាភិបាល នៅក្នុងនីតិកាលទី៧នេះ បានដាក់ចេញយុទ្ធសាស្រ្តបញ្ចរកោណ ដោយក្នុងនោះផ្តោតលើការអភិវឌ្ឍមូលធនមនុស្ស ការពង្រឹងគុណភាព វិស័យអប់រំ កីឡា វិទ្យាសាស្ត្រ និង បច្ចេកវិទ្យា ដែលមានគោលដៅយុទ្ធសាស្ត្រផ្តោតលើការបង្កើតបរិយាកាសល្អ សម្រាប់ការអប់រំ និងការ បណ្តុះបណ្តាល ប្រកបដោយ គុណភាព និងជំនាញខ្ពស់ តាមរយៈការពង្រឹងអភិបាលកិច្ច នៃការគ្រប់គ្រងនៅតាម គ្រឹះស្ថាន សិក្សា, ការពង្រឹងគុណភាពនៃការបណ្តុះបណ្តាលគ្រប់កម្រិតជាដើម៕

អត្ថបទ ៖ បូ ដូឡា​