លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុបានគូសបញ្ជាក់ថា នៅក្នុងត្រីមាសទី១ឆ្នាំ២០២៣ ខេត្តព្រះសីហនុទទួលបានភ្ញៀវទេសចរជនជាតិចិនសរុបជិត៣ម៉ឺន១ពាន់នាក់ មានការថយចុះ៧០%បើធៀបនឹងរយៈពេលដូចគ្នាកាលពីឆ្នាំនេះ ដែលធ្លាប់មានជាង១០ម៉ឺន៣ពាន់នាក់។ ការធ្លាក់ចុះនេះត្រូវបានថ្នាក់ដឹកនាំរូបនេះកត់សម្គាល់ឃើញថា គឺបន្ទាប់ពីរាជរដ្ឋាភិបាលកម្ពុជាមានការរឹតបន្តឹងការអនុវត្តច្បាប់លើជនបរទេស ដែលមកដើរលេងកម្សាន្ត និងស្នាក់នៅប្រទេសកម្ពុជាកាលពីដើមឆ្នាំ ដែលធ្វើឲ្យភ្ញៀវទេសចរជនជាតិចិនផ្ទៃក្នុងមិនសូវហ៊ានចេញដើរលេងដូចកាលពីមុន។ ទោះយ៉ាងណាភ្ញៀវទេសចរចិននៅតែបន្តឈរកំពូលតារាងភ្ញៀវទេសចរបរទេស ដែលបានមកកម្សាន្តនៅខេត្តនេះច្រើនជាងគេ ដែលឈរពីក្រោយដោយវៀតណាម អាមេរិក និងឥណ្ឌូនេស៊ី។
ទន្ទឹមនឹងភ្ញៀវទេសចរជនជាតិចិនមានការធ្លាក់ចុះ ភ្ញៀវទេសចរមកពីអាមេរិក និងប្រទេសមួយចំនួននៅតំបន់អឺរ៉ុប ដែលបានធ្លាក់ចុះយ៉ាងគំហុកកាលពីពេលកន្លងមក បែរជាមានកើនឡើងគួរឲ្យកត់សម្គាល់ទៅវិញ។ ជាក់ស្តែងនៅក្នុងត្រីមាសទី១កន្លងទៅ ខេត្តព្រះសីហនុទទួលបានភ្ញៀវទេសចរជនអាមេរិកមានជាង២ពាន់២រយនាក់មានការកើនឡើងយ៉ាងគំហុកបើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែ២២នាក់ប៉ុណ្ណោះ។
អត្ថបទគួរអាន
ដោយឡែកចំនួនភ្ញៀវទេសចរវៀតណាម និងឥណ្ឌូនេស៊ីមកកម្សាន្តនៅខេត្តព្រះសីហនុ ក៏មានការកើនឡើងគួរឲ្យកត់សម្គាល់ផងដែរនៅមួយរយៈចុងក្រោយនេះ។ ជាក់ស្តែង នៅក្នុងត្រីមាសទី១កន្លងទៅ ខេត្តនេះទទួលបានភ្ញៀវទេសចរវៀតណាមជិត ៣ពាន់១រយនាក់កើនឡើងជិត៣៤៩% ខណៈភ្ញៀវទេសចរឥណ្ឌូនេស៊ីមានចំនួន១ពាន់៨០នាក់កើនឡើងជាង១២១% បើធៀបនឹងត្រីមាសទី១កាលពីឆ្នាំមុន ដែលមានត្រឹមតែជិត៥រយនាក់។
គួរបញ្ជាក់ថា នៅក្នុងត្រីមាសទី១ឆ្នាំ២០២៣ កន្លងទៅថ្មីៗនេះ ខេត្តជាប់សមុទ្រមួយនេះទទួលបានភ្ញៀវទេសចរសរុបជាង១លាន៦៥ម៉ឺននាក់កើនឡើងជាង៦៨% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែជិត៩៩ម៉ឺននាក់។ ក្នុងនោះភ្ញៀវទេសចរជាតិមានជាង ១លាន៥៦ម៉ឺននាក់ និងភ្ញៀវទេសចរបរទេសមានជាង៩មម៉ឹន៣ពាន់នាក់ថយចុះជិត២៤% បើធៀបនឹងរយៈពេលដូចគ្នាកាលពីឆ្នាំមុន៕
