តើហេតុអ្វីបានជាអារ៉ាប់ប៊ីសាអូឌីត នឹងដកខ្លួនចេញពីចិន លើគម្រោងវិនិយោគបច្ចេកវិទ្យាតម្លៃ១០០ពាន់លានដុល្លារ?

លោក អាមិត មីដា (Amit Midha ) នាយកប្រតិបត្តិក្រុមហ៊ុន Alat ដែលជាក្រុមហ៊ុនគ្រប់គ្រងមូលនិធិវិនិយោគលើបច្ចេកវិទ្យារបស់ប្រទេសអារ៉ាប់ប៊ីសាអូឌីត បានអះអាងថា បើសិនជាភាពជាដៃគូជាមួយប្រទេសចិននឹងក្លាយជាបញ្ហារាំងស្ទះ ឬថ្នាំងថ្នាក់សម្រាប់សហរដ្ឋអាម៉េ​រិក អារ៉ាប់ប៊ីសាអូឌីត នឹងដកខ្លួនចេញពីគម្រោងដែលមានតម្លៃ ១០០ ពាន់លានដុល្លារ ។

តាមសេចក្តីរាយការណ៍របស់សារព័ត៌មានធំៗបានឲ្យដឹងថា នេះគឺជាស្ថានភាពប្រឈមថ្មីមួយទៀតរបស់ចិន ពាក់ព័ន្ធនឹងបញ្ហាដំណើរការគម្រោងលើបច្ចេកវិទ្យាសិប្បនិម្មិត ដែលវិនិយោគរួមគ្នាជាមួយនឹងប្រទេសអារ៉ាប់ប៊ីសាអូឌីត ដែលពិភពលោកដឹងថា គឺជាសម្ព័ន្ធមិត្តដ៏ជិតស្និទនឹងសហរដ្ឋអាម៉េ​រិកនៅមជ្ឈិមបូព៌ា។

ជំហរថ្មីរបស់អារ៉ាប់ប៊ីសាអូឌីត ពាក់ព័ន្ធនឹងគម្រោងនេះ គឺកើតមានឡើងក្រោយពេលមន្ត្រីសហរដ្ឋអាម៉េ​រិក​ បានប្រាប់សមភាគីអារ៉ាប់ប៊ីសាអូឌីតថា ពួកគេត្រូវការជ្រើសរើសរវាងបច្ចេកវិទ្យាចិន និង អាម៉េ​រិក ខណៈដែលពួកគេមានបំណងបង្កើតរោងចក្រឧស្សាហកម្មបច្ចេកវិទ្យា នៅអារ៉ាប៊ីសាអូឌីត ជាផ្នែកមួយនៃកិច្ចពិភាក្សាដែលបាននឹងកំពុងបន្តលើបញ្ហាសន្តិសុខជាតិជាច្រើន។

លោក អាមិត មីដា អ្នកគ្រប់គ្រងក្រុមហ៊ុនគ្រប់គ្រងមូលនិធិវិនិយោគលើបច្ចេកវិទ្យារបស់ប្រទេសអារ៉ាប់ប៊ីសាអូឌីត អះអាងថា យើងកំពុងស្វែងរកភាពជាដៃគូដែលគួរឱ្យទុកចិត្ត និងមានសុវត្ថិភាពនៅក្នុងសហរដ្ឋអាម៉េ​រិក ។ សហរដ្ឋអាម៉េ​រិក គឺជាដៃគូលេខមួយសម្រាប់ពួកយើង និងជាទីផ្សារលេខមួយសម្រាប់ឧស្សាហកម្មបញ្ញាសិប្បនិម្មិត។

បច្ចុប្បន្ន អារ៉ាប់ប៊ីសាអូឌីត កំពុងតែប្រជែងភាពនាំមុខ ក្នុងតំបន់មជ្ឈិមបូព៌ាក្នុងផ្នែកបច្ចេកវិទ្យាទំនើប ដោយសង្ឃឹមថា នឹងអាចបង្កើតមជ្ឈមណ្ឌលទិន្នន័យបញ្ញាសិប្បនិម្មិត និងការផលិតឧបករណ៍អេឡិចត្រូនិក ខណៈដែលមហិច្ឆតាដ៏មហិមារនេះកើតឡើងនៅពេលអាម៉េ​រិក កំពុងតែដាក់សម្ពាធកាន់តែខ្លាំងឡើងលើទំនាក់ទំនងរវាងមជ្ឈិមបូព៌ាជាមួយប្រទេសចិន ជុំវិញការព្រួយបារម្ភថា ប្រទេស អារ៉ាប់ប៊ីសាអូឌីត និង អារ៉ាប់រួម អាចនឹងក្លាយជាឧបករណ៍សម្រាប់ទីក្រុងប៉េកាំង ៕

ដោយៈ សរ សុជាតិ