ទំនាក់ទំនងចិន និងអឺរ៉ុប អាចកាន់តែច្របូកច្របល់ដោយសារការងើបឡើងនៃក្រុមស្តាំនិយមនៅបារាំង

គណបក្សស្តាំនិយមជ្រុលរបស់លោកស្រី ម៉ារី ឡឺ ប៉ែន ត្រូវបានគេប៉ាន់ប្រមាណថា បានឈ្នះជិតមួយភាគបីនៃការបោះឆ្នោតសភាអឺរ៉ុបនៅក្នុងប្រទេសបារាំង រហូតលោក ម៉ាក្រុងប្រកាសរំលាយសភានៅក្នុងប្រទេស ហើយគ្រោងនឹងរៀបចំការបោះឆ្នោតនៅពេលឆាប់ៗនេះ។ ការកើនឡើងប្រជាប្រិយភាពរបស់ក្រុមស្តាំនិយមរបស់លោកស្រី ឡឺ ប៉ែន គឺជាការខាតបង់ដ៏ធំរបស់លោក ម៉ាក្រុង ក្នុងការរក្សាជំហរឲ្យមានស្ថិរភាព ខណៈដែលមកដល់ពេលនេះ លោក ត្រូវបានគេដឹងថា គឺជាកតាលីករដ៏សំខាន់ក្នុងការស្តារ​ភាពប្រសើរឡើងនៃទំនាក់ទំនងរវាងសហភាពអឺរ៉ុប និងប្រទេសចិន។

មកដល់ពេលនេះប្រទេសបារាំង គឺជាប្រទេសដែលប្រកាន់យករបបប្រធានាធិបតី និងសភានិយម ដោយប្រទេសនេះមានការបោះឆ្នោតពីរដោយឡែកពីគ្នា គឺការបោះឆ្នោតជ្រើសរើសប្រធានាធិបតី និងបោះឆ្នោតជ្រើសរើសសភា។ សម្រាប់លោក ម៉ាក្រុង តំណែងរបស់លោកនឹងអាចរក្សារហូតដល់ឆ្នាំ២០២៧ ប៉ុន្តែអំណាចប្រធានាធិបតីរបស់លោកអាចគ្របដណ្តប់ភាគច្រើនតែនៅលើការគ្រប់គ្រងកិច្ចការការពារជាតិ និងកិច្ចការបរទេសប៉ុណ្ណោះ ខណៈដែលកិច្ចការផ្សេងទៀត គឺត្រូវឆ្លងកាត់សភា ដូច្នេះរាល់កិច្ចការនានានឹងអាចត្រូវរាំងស្ទះ ប្រសិនបើក្រុមស្តាំនិយមបន្តឈ្នះសំឡេងភាគច្រើននៅក្នុងការបោះឆ្នោតនាពេលខាងមុខ។

នៅសហភាពអឺរ៉ុបទាំងមូល បារាំង និងអាល្លឺម៉ង់ គឺជាសមាជិកធំបំផុត និងមានឥទ្ធិពលបំផុត ហើយអ្វីក៏ដោយដែលកើតឡើងនៅក្នុងទិដ្ឋភាពនយោបាយរបស់ប្រទេសទាំងពីរ ប្រាកដណាស់វាអាចនឹងជះឥទ្ធិពលអវិជ្ជមានដល់តំបន់អឺរ៉ុបទាំងមូល។ មកទល់ពេលនេះ លោក ម៉ាក្រុង គឺជារដ្ឋបុរសអឺរ៉ុបមួយ ដែលតែងតែចង់ឱ្យបារាំងដើរតួនាំមុខគេក្នុងភូមិសាស្ត្រនយោបាយ ហើយពេលខ្លះត្រូវបានគេមើលឃើញថា លោកមានទស្សនៈនយោបាយស៊ីខ្សែជាមួយនឹងចិន ទោះបីជាលោកមានទស្សនៈនយោបាយខុសគ្នាពីចិនជុំវិញបញ្ហាសង្រ្គាមនៅអ៊ុយក្រែនក៏ដោយ។

លោក ជេម មូរ៉េន ( James Moran ) អ្នកស្រាវជ្រាវជាន់ខ្ពស់នៅវិទ្យាស្ថាន Belgian think tank បាននិយាយថា ប្រសិនបើក្រុមស្តាំនិយមឈ្នះ ហើយអាចបង្កើតរដ្ឋាភិបាលបន្ទាប់ពីការបោះឆ្នោតនៅបារាំង វានឹងកាន់តែពិបាកសម្រាប់លោក ម៉ាក្រុង ហើយខ្សែបន្ទាត់គោលនយោបាយការបរទេសដែលលោកបានកំណត់នឹងប្រឈមបញ្ហា។

លោកស្រី អាលីសា ហ្គាសា ហេរេរ៉ូ (Alicia Garcia-Herrero) អ្នកស្រាវជ្រាវជាន់ខ្ពស់ ដែលមានមូលដ្ឋាននៅទីក្រុងព្រុចសែលបានយល់ស្របថា លទ្ធផលនៃការបោះឆ្នោតនៅបារាំងអាចជាសម្ពាធសម្រាប់លោក ម៉ាក្រុង ហើយពេលនោះគោលនយោបាយអឺរ៉ុបដែលនៅក្នុងដៃរបស់លោក រួមទាំងទំនាក់ទំនងអឺរ៉ុបជាមួយចិន និងអឺរ៉ុបជាមួយនឹងរុស្ស៊ី ក៏មានបញ្ហាដែរ៕

ដោយៈ សរ សុជាតិ