នាយករដ្ឋមន្ត្រីចក្រភពអង់គ្លេសលោក រីស៊ី ស៊ូណាក់ (Rishi Sunak) និងប្រធានាធិបតីកូរ៉េខាងត្បូងលោក យូន ស៊ុកយុល (Yoon Suk Yeol) នឹងរួមគ្នាដឹកនាំកិច្ចប្រជុំកំពូលនិម្មិតនៅថ្ងៃអង្គារ៍ សប្តាហ៍នេះ ចំពេលមានការអំពាវនាវឱ្យមានបទប្បញ្ញត្តិកាន់តែប្រសើរឡើង ដើម្បីជំរុញការគ្រប់គ្រងការរីកចម្រើននៃបញ្ញាសិប្បនិមិ្មត ខណៈដែលមនុស្សជាតិកំពុងតែមានការខ្វែងគំនិតគ្នាយ៉ាងខ្លាំងអំពីរបៀបដែល AI អាចបង្កផលប៉ះពាល់ដល់មនុស្សជាតិ។
លោក ស៊ូណាក់ និងលោក យូន បានរួមគ្នាផ្សព្វផ្សាយនូវអត្ថបទមួយ ដើម្បីពិពណ៌នាអំពីកិច្ចខិតខំប្រឹងប្រែងក្នុងការអភិវឌ្ឈន៍បច្ចេកវិទ្យាវៃឆ្លាតនេះ ដោយផ្សារភ្ជាប់ទៅនឹងតម្រូវការនៃការរៀបចំអភិបាលកិច្ច AI សកល ដើម្បីកាត់បន្ថយហានិភ័យដែលអាចកើតមានឡើងចំពោះសង្គមមនុស្ស។
មេដឹកនាំប្រទេសទាំងពីរបានលើកឡើងថា ហានិភ័យផ្សេងៗដូចជាផលប៉ះពាល់នៃទីផ្សារការងារទ្រង់ទ្រាយធំ, ការលួចចូលប្រើ AI ឬការវាយប្រហារជីវសាស្រ្ត និងសង្គមដែលបាត់បង់ការគ្រប់គ្រងលើ AI, គោលបំណងទូទៅ និងភាពចាំបាច់នៃ AI គឺសុទ្ធសឹងតែជាបញ្ហាដែលត្រូវតែយកចិត្តទុកដាក់។
អត្តបទគួរអាន
តាមការគ្រោងទុកកិច្ចប្រជុំកំពូល AI ដែលរៀបចំដោយទីក្រុងសេអ៊ូលតាមបែបនិម្មិតនេះ នឹងទាក់ទាញការចូលរួមពីក្រុមហ៊ុន អភិវឌ្ឈន៍បច្ចេកវិទ្យាធំៗមួយចំនួនដែលរួមមានលោក ជេក ក្លាក ( Jack Clark) សហស្ថាបនិកនៃក្រុមហ៊ុនស្រាវជ្រាវសុវត្ថិភាព AI និង Anthropic បណ្តានាយកប្រតិបត្តិមកពីក្រុមហ៊ុន OpenAI, Google DeepMind, Microsoft, Meta និង IBM ព្រមទាំងអ្នកជំនាញការជាច្រើនទៀត។
ពាក់ព័ន្ធនឹង AI នេះ អង្គការមូលនិធិរូបិយវត្ថុអន្តរជាតិ (IMF) កាលពីពេលថ្មីៗកន្លងទៅបានព្រមានថា AI នឹងបង្កផលប៉ះពាល់ដល់ការងារស្ទើរតែ៤០%នៅជុំវិញពិភពលោក ហើយជំរុញឲ្យពិភពលោកពិនិត្យសមតុល្យ និងពង្រឹងគោលនយោបាយ ក៏ដូចជាច្បាប់ឲ្យប្រុងប្រយ័ត្ន ដើម្បីការពារផលប៉ះពាល់ ហើយធានានូវសក្តានុពលនៃសេដ្ឋកិច្ច ពីព្រោះ AI ផ្តល់ទាំងផលអវិជ្ជមាន និងវិជ្ជមានដល់មនុស្សជាតិ៕
ដោយៈ សរ សុជាតិ
None
