តើកត្តាអ្វីខ្លះធ្វើឲ្យប្រាក់ចំណេញសុទ្ធធនាគារអេស៊ីលីដា ថយចុះជិត២០%នៅត្រីមាសទី១ឆ្នាំនេះ?
នៅត្រីមាសទី១ ឆ្នាំ២០២២ ធនាគារអេស៊ីលីដា សម្រេចបានលទ្ធផលវិជ្ជមានគួរឲ្យកត់សម្គាល់ជាមួយការកើនឡើងប្រាក់ចំណូលជិត១២% និងទ្រព្យសកម្មសរុបកើនជិត …
លោក Yoon ក្នុងវ័យ៦១ឆ្នាំ នឹងប្រឈមមុខនឹងបញ្ហាធំពីរនៅពេលលោកចូលកាន់តំណែង។ ក្នុងនោះរួមមានប្រទេសកូរ៉េខាងជើងដែលមានមេដឹកនាំចរិតឆេវឆាវ ហើយតែងផ្គើនសាកល្បងអាវុធថ្មីៗជានិច្ច គួបផ្សំនឹងនបញ្ហាអតិផរណា ដែលគំរាមកំហែងដល់ការស្តារសេដ្ឋកិច្ចឡើងវិញពីភាពអាប់អួនៃកូវីដ១៩អស់រយៈពេលជាងពីរឆ្នាំមកនេះ។
ក្នុងពិធីស្បថចូលកាន់ដំណែងក្នុងថ្ងៃអង្គារ ប្រធានាធិបតីថ្មីរបស់កូរ៉េខាងត្បូង លោក Yoon Suk-yeol បាននិយាយថា កម្មវិធីអាវុធនុយក្លេអ៊ែរកូរ៉េខាងជើងបង្កការគម្រាមកំហែងណាស់សម្រាប់កូរ៉េខាងត្បូង ប៉ុន្តែលោកអះអាងថា បានត្រៀមខ្លួនរួចជាស្រេចក្នុងការផ្តល់ផែនការសេដ្ឋកិច្ចថ្មីជួយស្រោចស្រង់កូរ៉េខាងជើង ប្រសិនបើព្យុងយ៉ាងប្តេជ្ញាលុបបំបាត់កម្មវិធីអាវុធនុយក្លេអ៊ែរ។
លោកបានថ្លែងយ៉ាងដូច្នេះថា៖ ទោះបីកម្មវិធីអាវុធនុយក្លេអ៊ែររបស់កូរ៉េខាងជើង គឺជាការគំរាមកំហែងមិនត្រឹមតែសន្តិសុខសម្រាប់សេអ៊ូល ប៉ុន្ដែវាគំរាមកំហែងដល់ប្រទេសតំបន់អាស៊ីទាំងមូល។ ទោះយ៉ាងណា លោក យ៉ូនថា ទ្វារសម្រាប់ការសន្ទនានឹងនៅតែបើកចំហ ដូច្នេះគេនៅតែអាចដោះស្រាយការគំរាមកំហែងនេះដោយសន្តិវិធី។ ប្រសិនបើកូរ៉េខាងជើងពិតជាចាប់ផ្តើម ការរំសាយអាវុធនុយក្លេអ៊ែរ នោះកូរ៉េខាងត្បូង នឹងធ្វើការជាមួយសហគមន៍អន្តរជាតិ ដើម្បីបង្ហាញផែនការថ្មី ដែលនឹងពង្រឹងសេដ្ឋកិច្ចរបស់ប្រទេសកូរ៉េខាងជើងឡើងវិញ និងលើកកម្ពស់គុណភាពជីវិតសម្រាប់ប្រជាជនកូរ៉េផងដែរ។ នេះបើតាមការលើកឡើងរបស់ប្រធានាធិបតីថ្មីកូរ៉េខាងត្បូង។
គេនៅចាំបានកាលពីជាប់ឆ្នោតភ្លាមៗ លោកយ៉ូន បានគូសបញ្ជាក់ពីគោលជំហរតឹងរ៉ឹងលើកូរ៉េខាងជើង ដោយព្រមានអំពីការវាយប្រហារគិតទុកជាមុន ប្រសិនបើមានសញ្ញានៃការវាយប្រហារពីព្យុងយ៉ាងជាមុននោះ។ លោកប្តេជ្ញាពង្រឹងសមត្ថភាព ការពារជាតិរបស់កូរ៉េខាងត្បូងផងដែរ។ ប៉ុន្តែផ្ទុយទៅវិញ សុន្ទរកថារបស់លោកនៅថ្ងៃឡើងកាន់តំណែង បែរជាផ្តោតកាន់តែខ្លាំងលើឆន្ទៈរបស់លោកក្នុងការបើកការចរចារឡើងវិញ ស្តីអំពីការរំសាយអាវុធនុយក្លេអ៊ែរជាមួយទីក្រុងព្យុងយ៉ាងទៅវិញ។
គួរជម្រាបថា មេដឹកនាំកូរ៉េខាងត្បូងថ្មីរូបនេះ អាចប្រឈមមុខនឹងវិបត្តិសន្តិសុខ ប្រសិនបើកូរ៉េខាងជើងនៅតែមានះ ធ្វើតេស្ដមីស៊ីល ដែលមានសមត្ថភាពផ្ទុកគ្រាប់នុយក្លេអ៊ែរ ដូចដែលព្យុងយ៉ាងបានធ្វើអស់ចំនួន១៤ដងក្នុងឆ្នាំនេះរួចមកហើយនោះ៕
None
