ស្របពេលដែល ការចាក់វ៉ាក់សាំងកើនឡើងដល់ទៅជាង ៨០% ប៉ុន្ដែ ករណីឆ្លងថ្មី នៅតែបន្ដកក្រើកឡើងវិញ ប្រទេសសិង្ហបុរីបានដាក់ចេញនូវ វិធីសាស្ត្រ ៧ចំណុច ដើម្បីរៀនរស់នៅជាមួយកូវីដ ១៩។ តើវិធានការ និង វិធីសាស្ត្រ ៧ចំណុច នោះ មានអ្វីខ្លះ?
វិធីសាស្ត្រទី១. អ្នកមិនបានចាក់វ៉ាក់សាំងនឹងមិនត្រូវបានអនុញ្ញាតឱ្យចូលកន្លែងសារធារណៈនោះឡើយ
ពលរដ្ឋ ដែលមិនបានចាក់វ៉ាក់សាំងនឹងមិនត្រូវបានអនុញ្ញាតឱ្យទទួលទានអាហារនៅក្នុងភោជនីយដ្ឋាន និង ហាងកាហ្វេឡើយ ហើយមិនត្រូវចូលទៅក្នុងផ្សារទំនើបនោះដែរ ចាប់ពីថ្ងៃ ទី ១៣ ខែតុលា នេះតទៅ។
វិធីសាស្ត្រទី២. គ្មានការធ្វើចត្តាឡីស័ក្តសម្រាប់អ្នកជិតស្និតនឹងអ្នកជំងឺ
អ្នកជិតស្និតនឹងអ្នកជំងីកូវីដ-១៩ នឹងមិនត្រូវបានតម្រូវឲ្យធ្វើចត្តាឡីស័កនោះឡើយ ប៉ុន្តែ ពួកគេត្រូវទទួលខុសត្រូវ និង គ្រប់គ្រងតាមដានស្ថានភាពអាការៈដោយខ្លួនឯងផ្ទាល់។ ប្រសិនបើលទ្ធផលតេស្តអវិជ្ជមាន ពួកគេអាចបន្តសកម្មភាពធម្មតា ហើយពួកគេត្រូវធ្វើតេស្តរយៈពេល៧ថ្ងៃជាប់ៗគ្នា។ សិង្ហបុរីនឹងអនុវត្តវិធានការនេះ ចាប់ពីថ្ងៃទី ១១ ខែតុលានេះតទៅ។
វិធីសាស្ត្រទី៣. ធ្វើតេស្ត PCR ឬហៅថាធ្វើតេស្ដម៉ាស៊ីនធំ គឺសម្រាប់តែមនុស្ស ដែលមានអាការៈសង្ស័យមានកូវីដ១៩តែប៉ុណ្ណោះ
ការធ្វើតេស្ត PCR នឹងត្រូវបានបម្រុងទុកជាចម្បងសម្រាប់មនុស្សដែលមានអាការៈមិនស្រួលខ្លួន និងមានចេញរោគសញ្ញាណ ដូចជាគ្រុនក្តៅ ក្អក អស់កម្លាំង បាត់បង់រសជាតិឬក្លិន និងហៀរសំបោរជាដើម។ ដូចនេះដើម្បីគាំទ្រដល់ការធ្វើតេស្តខ្លួនឯង ឱ្យបានទៀងទាត់គ្រួសារនីមួយៗនឹងទទួលបានឧបករណ៍តេស្ដរហ័សចំនួន ១០ បន្ថែមទៀត នៅក្នុងការចែកចាយមួយផ្សេងទៀត ដែលរៀបចំដោយរដ្ឋ ចាប់ពីថ្ងៃទី ២២ ខែតុលាដល់ថ្ងៃទី ៧ ខែធ្នូ។
អត្ថបទទាក់ទង
វិធីសាស្ត្រទី៤.រៀនរស់ជាមួយកូវីដ គឺ ការដាក់ឱ្យព្យាបាលអ្នកជំងឺតាមផ្ទះ
ការព្យបាលអ្នកជំងឺតាមផ្ទះ នៅប្រទេសសិង្ហបុរីអនុញ្ញាតចំពោះតែ ករណីអ្នកដែលមិនបានចាក់វ៉ាក់សាំងដែលមានអាយុពី ១២ ទៅ ៤៩ ឆ្នាំក៏ដូចជាកុមារដែលមានអាយុពី ៥ ទៅ ១១ ឆ្នាំ ប៉ុណ្ណោះ ព្រោះកម្រិតវិវត្តន៍ទៅរកសភាពធ្ងន់ធ្ងរក្នុងខ្លួនពួកគេគឺមានកម្រិតទាប។ ក្នុងនោះ ករណីអ្នកដែលបានចាក់វ៉ាក់សាំងមានអាយុពី ៧០ ទៅ ៧៩ ឆ្នាំ ក៏នឹងព្យាបាលនៅផ្ទះផងដែរបន្ទាប់ពីការសង្កេតវាយតម្លៃពីមន្ទីរពេទ្យ។
វិធីសាស្ត្រទី៥. ដំណើរការចាក់វ៉ាក់សាំងសម្រាប់ក្មេងៗ
នាយករដ្ឋមន្ត្រីសឹង្ហបុរី លោកលី សៀនឡុង បាននិយាយថា ការចាក់វ៉ាក់សាំងការពារកូវីដជូនកុមារតូចអាយុក្រោម ១២ ឆ្នាំនឹងចាប់ផ្ដើមធ្វើឡើងនៅដើមឆ្នាំក្រោយនេះ។ ប្រទេសសិង្ហបុរី កំពុងតាមដានការសាកល្បងវ៉ាក់សាំងលើកុមារនៅសហរដ្ឋអាមេរិក ហើយនឹងចាប់ផ្តើមចាក់វ៉ាក់សាំងកុមារនៅពេលដែលវ៉ាក់សាំងត្រូវបានអនុម័តសម្រាប់ពួកគេ ហើយនៅពេលអ្នកជំនាញទទួលស្គាល់ថាមានសុវត្ថិភាព ។
វិធានការ និង វិធីសាស្ត្រទី៦ រៀនរស់ជាមួយកូវីដ គឺ ការចាក់ដូសជំរុញសម្រាប់ពលរដ្ឋ
សិង្ហបុរីបានកំណត់យក មនុស្សមានអាយុចាប់ពី ៣០ ឆ្នាំឡើងទៅ ដែលបានចាក់វ៉ាក់សាំងគ្រប់២ដូសក្រោយរយៈពេល៦ខែ គឺជាក្រុមដែលត្រូវទទួលបានការចាក់ដូសជំរុញ ឬដូសទី៣។
វិធីសាស្ត្រទី៧. ការចំណាយពេល ៣-៦ ខែសម្រាប់ «ការរស់នៅតាមបែបគន្លងថ្មី»
នាយករដ្ដមន្ត្រីសិង្ហបុរី លោក លី សៀន ឡុង បាននិយាយថា សិង្ហបុរីនឹងចំណាយពេលពី ៣ ទៅ ៦ ខែដើម្បីឈានទៅសម្រេចបាននូវ “ការរស់នៅតាមបែបគន្លងថ្មី” នោះរដ្ឋាភិបាលនឹងអាចបន្ធូរបន្ថយការរឹតត្បិត និងមានវិធានការគ្រប់គ្រងប្រកបដោយសុវត្ថិភាព ប្រជាជនអាចបន្តសកម្មភាពជាធម្មតាដូចមុនពេលមានជំងឺកូវីដ ដោយមិនមានការព្រួយបារម្ភ។
គួរបញ្ជាក់ថា សិង្ហបុរីបានប្រកាសកាលពីថ្ងៃសៅរ៍សប្ដាហ៍មុននេះថា នឹងបើកប្រទេសរបស់ខ្លួនឡើងវិញ សម្រាប់អ្នកដំណើរចាក់វ៉ាក់សាំងរួច ដែលមកពីប្រទេសចំនួន ៨ បន្ថែមទៀត ដែលធ្វើឱ្យចំនួនសរុបមានដល់ ១១ប្រទេសហើយ ភាគច្រើនជាប្រទេសនៅតំបន់អឺរ៉ុប។
គិតមកទល់ពេលនេះ សិង្ហបុរីមានអ្នកឆ្លងកូវីដ១៩សរុបជាង១២ម៉ឺននាក់ និងស្លាប់មានជាង១៥០នាក់៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
