ធនាគាររដ្ឋវៀតណាមបានប្រកាសថា ខ្លួននឹងលុបគណនីធនាគារជាង៨៦លានគណនី ដែលជាវិធានការចាំបាច់មួយរបស់រដ្ឋាភិបាលវៀតណាមក្នុងការបោសសម្អាតឧក្រិដ្ឋកម្មឆបោកតាមប្រព័ន្ធអ៊ីនធឺណិត។ គណនីធនាគារ ដែលមិនត្រូវបានផ្ទៀងផ្ទាត់ដោយច្បាប់ ឬអសកម្មភាពអស់រយៈពេលជាយូរទាំងជាង៨៦លានគណនីនេះ នឹងត្រូវលុបចេញចាប់ពីថ្ងៃទី១ ខែកញ្ញា ដើម្បីការពារការក្លែងបន្លំ និងឧក្រិដ្ឋកម្មឆបោកតាមប្រព័ន្ធអនឡាញ ក៏ដូចជាដើម្បីសម្អាតប្រព័ន្ធហិរញ្ញវត្ថុរបស់ប្រទេសវៀតណាម។
បច្ចុប្បន្ននៅទូទាំងប្រទេសវៀតណាមមានគណនីធនាគារសរុបជាង២០០លានគណនី ដូច្នេះនៅពេលដែលគណនីខាងលើត្រូវបានលុបចេញ នោះគណនីធនាគារសរុបនៅវៀតណាមអាចនៅសល់ប្រមាណ១១៣លានគណនីប៉ុណ្ណោះ។
អាជ្ញាធរវៀតណាមកំពុងដុតដៃដុតជើងចាត់វិធានការយ៉ាងតឹងរ៉ឹង ដើម្បីបង្ក្រាប និងលុបបំបាត់គម្រោងក្លែងបន្លំនានានៅក្នុងប្រព័ន្ធធនាគារ ដូចជាគណនីក្លែងក្លាយសម្រាប់ការទទួលប្រាក់ ការដកប្រាក់ពីគណនីគ្មានកម្មសិទ្ធិត្រឹមត្រូវ ឬការលាងលុយតាមរយៈបណ្តាញធនាគារឌីជីថលជាដើម៕
ដោយ: សរ សុជាតិ
