ហេតុអ្វីអ្នកជំនាញសេដ្ឋកិច្ចជំរុញឱ្យរដ្ឋាភិបាលថៃកែលម្អយុទ្ធសាស្ត្រលើគម្រោងកាបូបឌីជីថល?

អ្នកសេដ្ឋកិច្ចវ័យក្មេងជាច្រើនបានដាក់ជាសំណួរដល់រដ្ឋាភិបាលទាក់ទងនឹងចំណាត់ការរបស់រដ្ឋាភិបាល ខណៈដែលគម្រោងការកាបូបឌីជីថល ដែលមានតម្លៃដល់ទៅ១៤ពាន់លានដុល្លារ ត្រូវបានពន្យារពេលជាបន្តបន្ទាប់។ នេះបើតាមសេចក្តីរាយការណ៍របស់សារព័ត៌មាន the Nation ។

លោក ប៊ូរិន អាឌុលវាតាណា (Burin Adulwattana) នាយកគ្រប់គ្រងមជ្ឈមណ្ឌលស្រាវជ្រាវកសិករ( Kasikorn)បាននិយាយថា ចំណាត់ការរបស់រដ្ឋាភិបាលក្នុងការបង្ហាញពីវិបត្តិ ដើម្បីទទួលបានការគាំទ្រសម្រាប់គម្រោងកាបូបឌីជីថលអាចមានផលប៉ះពាល់។ យុទ្ធសាស្ត្រដែលមានគោលបំណងកៀរគរការគាំទ្រសាធារណៈ បានបង្កឲ្យប៉ះពាល់ដោយអចេតនាដល់ទំនុកចិត្តរបស់វិនិយោគិនថៃ និងបរទេស។

លោកបានអះអាងថា មានមនុស្សនិយាយគ្នាច្រើនណាស់អំពីរឿងនេះ ហើយអ្នកវិនិយោគក៏កំពុងដកខ្លួន​។ គោលនយោបាយមួយចំនួននៅតែមិនច្បាស់លាស់ ប៉ុន្តែព័ត៌មានមួយចំនួនធំត្រូវបានចេញផ្សាយ​។ ការពិភាក្សាច្បាស់លាស់ គឺចាំបាច់មុនពេលចេញសេចក្តីថ្លែងការណ៍។

ដោយឡែក លោក ណូណារិត ប៊ីសូនីបុត្រ( Nonarit Bisonyabut) អ្នកស្រាវជ្រាវជាន់ខ្ពស់នៅវិទ្យាស្ថានស្រាវជ្រាវអភិវឌ្ឍន៍ប្រទេសថៃ បានបន្ទរពីកង្វល់ទាំងនេះ។ លោកបានគូសបញ្ជាក់ពីករណីនៃសារដែលមានជម្លោះ មិនត្រឹមតែទាក់ទងនឹងគម្រោងកាបូបឌីជីថលប៉ុណ្ណោះទេ ប៉ុន្តែក៏មានបញ្ហាផ្សេងទៀតដែរ។

លោកបានបន្តថា បញ្ហានេះឆ្លុះបញ្ចាំងពីយុទ្ធសាស្ត្រទំនាក់ទំនងដែលមានកំហុសហើយប៉ះពាល់ដល់ទំនុកចិត្តរបស់គ្រប់ភាគីពាក់ព័ន្ធ។ លោក ណូណារិត បានចង្អុលបង្ហាញថា រដ្ឋាភិបាលចាំបាច់ត្រូវមានទំនួលខុសត្រូវផ្នែកទំនាក់ទំនង ដែលត្រូវកំណត់ឱ្យបានច្បាស់លាស់ មុនពេលការប្រកាសត្រូវបានធ្វើឡើង។

ដោយឡែក លោក ឆាយ៉ានុន រ៉ាកកានចាណាន់ ( Chayanon Rakkanjanan) នាយកប្រតិបត្តិ និងជាស្ថាបនិកក្រុមហ៊ុន Finnomena បាននិយាយថា ស្ថានភាពនៅក្នុងមូលធននីយកម្មទីផ្សារបានធ្លាក់ចុះជាង១ទ្រីលានបាត ឫប្រមាណជិត៣២ពាន់លានដុល្លារ កាលពីពេលថ្មីៗនេះ។ លោកបានចាត់ទុកការធ្លាក់ចុះនេះ គឺមួយផ្នែកបណ្តាលមកមកពីកង្វះភាពច្បាស់លាស់ក្នុងវិធានការជំរុញសេដ្ឋកិច្ចក្នុងស្រុក។

លោកបាននិយាយថា ការប្រាស្រ័យទាក់ទងមិនស៊ីសង្វាក់គ្នា ដោយមានប្រភពផ្សេងគ្នាផ្តល់ព័ត៌មានមិនស្របគ្នា បានរារាំងទំនុកចិត្តរបស់វិនិយោគិន ដូចនេះ រដ្ឋាភិបាលត្រូវតែកែលម្អយុទ្ធសាស្ត្រទំនាក់ទំនងរបស់ខ្លួន ដើម្បីជាប្រយោជន៍ដល់អ្នកវិនិយោគ៕

ដោយៈ សរ សុជាតិ