ទន្ទឹមនេះ រដ្ឋាភិបាលស្នើឱ្យម្ចាស់សហគ្រាសធុនមីក្រូ តូច និងមធ្យម បន្តកិច្ចសហការជាមួយក្រសួងស្ថាប័នពាក់ព័ន្ធ ដើម្បីជំរុញវិស័យនេះឱ្យក្លាយទៅជាខឿននៃការអភិវឌ្ឍសង្គមសេដ្ឋកិច្ចកម្ពុជា ដ្បិតថា វិស័យនេះនៅតែជាឆ្អឹងខ្នងនៃសេដ្ឋកិច្ចជាតិ។ នាពិធីបើកទិវាជាតិសហគ្រាសធុនមីក្រូ តូច និងមធ្យមលើកទី១ ក្រោមប្រធានបទ«ការពង្រឹងប្រព័ន្ធអេកូឡូស៊ីសហគ្រាសធុនមីក្រូ តូច និងមធ្យមសម្រាប់កំណើនកាន់តែប្រសើរ» នាថ្ងៃទី២៧ ខែមិថុនា ឆ្នាំ២០២៤ ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានអះអាងថា បច្ចុប្បន្នពិភពលោក រួមទាំងកម្ពុជា កំពុងហ៊ុំព័ទ្ធដោយបញ្ហាប្រឈម និងភាពមិនប្រាកដប្រជាជាច្រើនដូចជាបញ្ហាបន្សល់ទុកដោយវិបត្តិកូវីដ១៩ ភាពតានតឹងផ្នែកភូមិសាស្រ្តនយោបាយ កំណើនទាបនៃសេដ្ឋកិច្ចសកល ការអូសបន្លាយនៃសង្រ្គាមរុស្សី-អ៊ុយក្រែន ការប្រយុទ្ធរវាងអ៊ីស្រ្តាអែល និងក្រុមហាម៉ាស និងការប្រែប្រួលអាកាសធាតុជាដើម។ បញ្ហាប្រឈមទាំងនេះ ចង់ ឬមិនចង់វានឹងជះឥទ្ធិពលអវិជ្ជមានដោយផ្ទាល់ និងដោយប្រយោលដល់សម្ទុះនៃកំណើនសេដ្ឋកិច្ចកម្ពុជា។
ក្នុងបរិការណ៍សកលដែលមានភាពមិនប្រាកដប្រជានេះ ថ្នាក់ដឹកនាំរូបនេះបានអះអាងថា ការពង្រឹងប្រព័ន្ធអេកូឡូស៊ីសហគ្រាសធុនមីក្រូ តូច និងមធ្យម គឺកាន់តែមានសារៈសំខាន់ និងបន្ទាន់ សម្រាប់គោលដៅនៃការរក្សា និងជំរុញសម្ទុះកំណើនឱ្យកាន់តែប្រសើរ តាមរយៈការពង្រឹងសមត្ថភាពផលិតកម្មក្នុងស្រុក ដើម្បីលើកកម្ពស់ការអភិវឌ្ឍសហគ្រិនភាព និងពង្រឹងអនុលោមភាព សំដៅកាត់បន្ថយហានិភ័យដែលអាចកើតមាន។
អត្តបទគួរអាន
យ៉ាងណាមិញ តាមរយៈសារលិខិតដើម្បីអបអរសាទរក្នុងឱកាសប្រារព្ធទិវាជាតិសហគ្រាសធុនមីក្រូ តូច និងមធ្យមលើកទី១នេះ សម្តេចធិបតី ហ៊ុន ម៉ាណែត បានអះអាងថា ការបន្តកសាង និងពង្រឹងប្រព័ន្ធអេកូឡូស៊ីសហគ្រាសធុនមីក្រូ តូច និងមធ្យម គឺជាកិច្ចការអាទិភាពដែលរាជរដ្ឋាភិបាលកម្ពុជាកំពុងខិតខំពុះពារ និងលើកទឹកចិត្តឱ្យគ្រប់សហគ្រាស និងតួអង្គពាក់ព័ន្ធទាំងអស់ចូលរួមគាំទ្របេសកកម្មនេះ ដ្បិតថា ប្រព័ន្ធអេកូឡូស៊ីដែលមានភាពប្រទាក់ក្រឡាគ្នា គាំទ្រគ្នាទៅវិញទៅមកប្រកបដោយសហថាមពល នឹងបង្កើតនូវទំនុកចិត្ត និងភាពទាក់ទាញដល់ការបង្កើន និងការពង្រីកវិនិយោគបន្ថែម ខណៈដែលសហគ្រាសធុនមីក្រូ តូច និងមធ្យម នៅតែជាឆ្អឹងខ្នងនៃសេដ្ឋកិច្ចតទៅថ្ងៃអនាគត។
បើតាមសម្តេចធិបតី ទោះបីកម្ពុជាបាននិងកំពុងប្រឈមក្នុងបរិការណ៍នៃការប្រកួតប្រជែងនៃការធ្វើពាណិជ្ជកម្មសេរីក្នុងក្របខណ្ឌតំបន់ និងសកល ក៏ដូចជាភាពមិនប្រាកដប្រជានៃសេដ្ឋកិច្ចពិភពលោកក៏ដោយ ក៏សហគ្រាសធុនមីក្រូ តូច និងមធ្យមទាំងអស់ បាននិងកំពុងដើរតួនាទីយ៉ាងសំខាន់ក្នុងការផលិត ការផ្គត់ផ្គង់ និងការផ្តល់សេវា ហើយកំពុងខិតខំអភិវឌ្ឍ និងវិវត្តខ្លួនឱ្យឆ្លើយតបទៅនឹងនិន្នាការថ្មីៗ ជាពិសេសគឺរបត់នៃការប្រែប្រួលផ្នែកលក្ខខណ្ឌតម្រូវរបស់ទីផ្សារ លក្ខខណ្ឌតម្រូវផ្នែកបរិស្ថាន និងការវិវត្តនៃបច្ចេកវិទ្យាផងដែរ។
តែយ៉ាងណា ប្រមុខរាជរដ្ឋាភិបាលកម្ពុជា ក៏បានអំពាវនាវឱ្យម្ចាស់សហគ្រាសធុនមីក្រូ តូច និងមធ្យម និងភាគីពាក់ព័ន្ធទាំងអស់បន្តកិច្ចសហការគាំទ្រដល់ការដឹកនាំ និងសម្របសម្រួលរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ដើម្បីជំរុញវិស័យនេះឱ្យក្លាយទៅជាខឿននៃការអភិវឌ្ឍសង្គមសេដ្ឋកិច្ចកម្ពុជាផងដែរ៕
អត្ថបទ សោម ស្រីពេជ្រ និងរូបភាពឯកសារ
None
