សារព័ត៌មានថៃ the Nation បានរាយការណ៍ថា រដ្ឋាភិបាលចាំផ្ទះរបស់លោក ប្រាយុទ្ធ ចាន់អ៊ូចា បានកំពុងជំរុញឲ្យក្រសួងហិរញ្ញវត្ថុនិងទីភ្នាក់ងារពាក់ព័ន្ធផ្សេងៗទៀត បញ្ចប់ការសិក្សាលើការបន្តកាត់បន្ថយពន្ធលើប្រេងម៉ាស៊ូត ខណៈដែលគោលនយោបាយនេះនឹងផុតកំណត់នៅខែកក្កដាខាងមុខ។
លោក សូប៉ាតាណាពង្ស ពុនមីចាវ (Supattanapong Punmeechaow) រដ្ឋមន្ត្រីក្រសួងថាមពល បាននិយាយកាលពីថ្ងៃអង្គារថា ប្រជាជននឹងត្រូវរង់ចាំការសម្រេចចិត្តថាតើការកាត់បន្ថយពន្ធនឹងត្រូវពន្យារពេលដែរឬទេ។
លោកបានបន្ថែមថា រដ្ឋាភិបាលចាំផ្ទះនឹងត្រូវស្វែងរកការអនុញ្ញាតពីគណៈកម្មការរៀបចំការបោះឆ្នោត ដើម្បីបន្តការកាត់បន្ថយពន្ធ ៥ បាត ឬ ០,១៤ ដុល្លារក្នុងមួយលីត្រ ស្របពេលដែល ការកាត់បន្ថយពន្ធនេះកំពុងធ្វើឱ្យរដ្ឋាភិបាលខាតបង់ប្រាក់ចំណូលប្រហែល ១០ លានបាត ឬ ជិត៣សែនដុល្លារក្នុងមួយខែ។
អត្ថបទគួរអាន
ដោយឡែក លោក អាកខុម ថែមពិតតាយ៉ាប៉ៃសិទ្ធ ( Arkhom Termpittayapaisith) រដ្ឋមន្ត្រីក្រសួងហិរញ្ញវត្ថុចាំផ្ទះ បាននិយាយរួចហើយថា ក្រសួងបានត្រៀមខ្លួនរួចជាស្រេចដើម្បីពិភាក្សាអំពីការបន្តកាត់បន្ថយពន្ធនេះ ជាមួយក្រសួងថាមពល។
លោក បាននិយាយថា លោកក៏ជឿជាក់ផងដែរថា ក្រសួងរបស់លោកអាចបង្កើនសាច់ប្រាក់មូលនិធិប្រេងឥន្ធនៈ ដើម្បីឧបត្ថម្ភធនដល់ប្រេងម៉ាស៊ូតនិងការពារកុំឱ្យតម្លៃរបស់វាឡើងថ្លៃលើសពី៣៥បាត ឬជាង១ដុល្លារនៅក្នុង១លីត្រ។
លោក ឯកនីទិ នីទិថានប្រាផាស ( Ekniti Nitithanprapas ) អគ្គនាយកនៃអគ្គនាយកដ្ឋានពន្ធដារថៃ បានអះអាងថា អគ្គនាយកដ្ឋានចាំបាច់ត្រូវពិភាក្សាបញ្ហានេះជាមួយក្រសួងហិរញ្ញវត្ថុមុននឹងធ្វើការផ្លាស់ប្តូរណាមួយ ដោយចង្អុលបង្ហាញថាការបន្តកាត់បន្ថយពន្ធនឹងប៉ះពាល់ដល់ចំណូលរបស់រដ្ឋាភិបាល។
លោកបាននិយាយថា រហូតមកដល់ពេលនេះ ការកាត់បន្ថយពន្ធប្រេងម៉ាស៊ូតចំនួន៧ជុំជាប់ៗគ្នា បានធ្វើឱ្យរដ្ឋាភិបាលបាត់ប្រាក់ចំណូលចំនួន១៥០ពាន់លានបាត ឬជាង៤ពាន់៥រយលានដុល្លារ៕
ដោយៈ សរ សុជាតិ
