ក្រោយមានការទាមទារអស់រយៈពេលជាច្រើនខែ នៅទីបំផុតម្ចាស់ភាគធំៗរបស់ក្រុមហ៊ុន ថេស្លា (Tesla) បានយល់ព្រមផ្ដល់ប្រាក់បំណាច់ជិត១ទ្រីលានដុល្លារដល់កំពូលមហាសេដ្ឋី អេឡុន ម៉ាស់ (Elon Musk) នាយកប្រតិបត្តិរបស់ក្រុមហ៊ុន Tesla នៅក្នុងកិច្ចប្រជុំមួយកាលពីថ្ងៃព្រហស្បតិ៍ ទី៦ ខែវិច្ឆិកា ឆ្នាំ២០២៥។ យ៉ាងណាមិញម្ចាស់ភាគហ៊ុនបានដាក់ស្នើសុំផ្ដល់ប្រាក់ទាំងនេះជា១២ដំណាក់កាល និងទាមទារឱ្យមហាសេដ្ឋីបច្ចេកវិទ្យារូបនេះត្រូវជួយដឹកនាំក្រុមហ៊ុននេះឱ្យឈានដល់តម្លៃជិត៩ទ្រីលានដុល្លារនៅមួយទសវត្សរ៍ខាងមុខ។
បន្ថែមលើប្រាក់បំណាច់នេះលោក អេឡុន ម៉ាស់ ទទួលបានភាគហ៊ុនរហូតដល់៤២៥លានហ៊ុននៅក្នុងក្រុមហ៊ុនថេស្លា និងអំណាចបោះឆ្នោតជិត២៥%។ តែយ៉ាងណាកំពូលមហាសេដ្ឋីរូបនេះហាក់មានការបារម្ភចំពោះអំណាចនៃការគ្រប់គ្រងការបោះឆ្នោតនៅក្នុងក្រុមហ៊ុន Tesla ដោយលោកបានចោទជាសំណួរថា តើលោកអាចនឹងត្រូវបានបណ្តេញចេញពីក្រុមហ៊ុននេះនៅពេលណាមួយនាពេលអនាគតឬយ៉ាងណា៕
ដោយ៖ សុខ មង្គល
