ការបិទព្រំដែនកម្ពុជា-ថៃ ត្រូវបានព្យាករថា នឹងធ្វើឱ្យថៃ ខាតបង់សេដ្ឋកិច្ចធ្ងន់ធ្ងរក្នុងទំហំរាប់ពាន់លានដុល្លារអាម៉េរិក

ការបិទច្រកព្រំដែនកម្ពុជា-ថៃ ត្រូវបានព្យាករថា នឹងធ្វើឱ្យប្រទេសថៃ ខាតបង់សេដ្ឋកិច្ចធ្ងន់ធ្ងរក្នុងទំហំរហូតដល់ទៅជង១,៨ពាន់លានដុល្លារអាម៉េរិក ប្រសិនបើបណ្ដាច្រកព្រំដែនជាមួយកម្ពុជា នៅតែបិទរហូតដល់ដំណាច់ឆ្នាំ២០២៥។ ការបិទព្រំដែនកម្ពុជា-ថៃ នេះ ត្រូវបានព្យាករថា នឹងធ្វើឱ្យកំណើនពាណិជ្ជកម្មឆ្លងដែនរវាងកម្ពុជា-ថៃ ធ្លាក់ចុះពីគោលដៅដែលបានកំណត់៣% មកនៅត្រឹម១% ទៅ២%។

ការនាំចេញដែលរងផលប៉ះពាល់ខ្លាំងជាងគេ រួមមានបន្លែ ផ្លែឈើ និងទំនិញប្រើប្រាស់ផ្សេងៗ ខណៈដែលបណ្ដាអ្នកនាំចូល ក៏រងផលប៉ះពាល់ផងដែរ ជាពិសេសសម្រាប់ទំនិញសំខាន់ៗដូចជាដំឡូងមី និងគ្រឿងអេតចាយដែលប្រើប្រាស់ក្នុងឧស្សាហកម្មជាដើម។

ចាប់តាំងពីថ្ងៃទី៧ ខែមិថុនា មក ហាងទំនិញថៃ និងខ្មែរជាច្រើននៅតាមបណ្ដោយព្រំដែនបានបិទជាបណ្ដោះអាសន្ន។ ពេលនេះបណ្ដាអ្នកនាំចេញកំពុងសម្លឹងរកផ្លូវដឹកជញ្ជូនផ្សេងៗ​ដូចជាការប្រើប្រាស់ផែក្នុងខេត្តត្រាត ឬឡែម ឆាបាង (Laem Chabang) ជាដើម។

នៅឆ្នាំ២០២៣ ពាណិជ្ជកម្មឆ្លងដែនកម្ពុជា-ថៃ មានទំហំប្រមាណជិត៥,៤ពាន់លានដុល្លារអាម៉េរិក ជាមួយនឹងការនាំចេញជាមធ្យមក្នុងទំហំជាង៣៦៣លានដុល្លារអាម៉េរិក ក្នុងមួយខែៗ។ ការនាំចេញរបស់ថៃ មកកម្ពុជា បានកើនឡើង៨,៧% ក្នុងរយៈពេល៥ខែដើមឆ្នាំនេះ ប៉ុន្តែការបិទព្រំដែនពេលនេះកំពុងគំរាមធ្វើឱ្យកំណើនសេដ្ឋកិច្ចថៃ មានសន្ទុះយឺត។ ដើម្បីប៉ះប៉ូវផលប៉ះពាល់នេះ ប្រទេសថៃ អាចបង្កើនពាណិជ្ជកម្មជាមួយប្រទេសឡាវ ទោះបីជាវាធ្វើឱ្យថ្លៃដើមកើនឡើងខ្ពស់ និងត្រូវចំណាយពេលយូរជាងធម្មតាក៏ដោយ៕

ដោយ: តែម សុខុម