គណៈរដ្ឋមន្ត្រីថៃ បានអនុម័តប្រាក់កម្ចីបន្ថែមប្រមាណ៧ពាន់៥រយលានដុល្លារសម្រាប់សារពើពន្ធឆ្នាំ២០២៤ ដោយក្នុងនោះទឹកប្រាក់ជាង៧ពាន់៣រយលានដុល្លារ សម្រាប់ការប្រើប្រាស់ផ្ទាល់របស់រដ្ឋាភិបាល ក៏ដូចជាមូលនិធិសម្រាប់សហគ្រាសរដ្ឋ ដើម្បីរៀបចំសងបំណុលផ្សេងៗ។
លោកស្រី រុក្លាវ អ៊ីនតាវង្ស (Rudklao Intawong) អ្នកនាំពាក្យរងរបស់រដ្ឋាភិបាល បានប្រាប់អ្នកសារព័ត៌មានថា ជាមួយនឹងការអនុម័តថ្មីនេះ ហើយបូកបន្ថែមនឹងទំហំប្រាក់កម្ចីដែលបានអនុម័តកាលពីថ្ងៃទី៣០ ខែកញ្ញា ឆ្នាំមុន រដ្ឋាភិបាលថៃ អាចខ្ចីប្រាក់រហូតដល់ទៅជាង២៧ពាន់លានដុល្លារ។ លោកស្រីបានឲ្យដឹងថា គណៈរដ្ឋមន្ត្រី ក៏បានអនុម័តសំណើរបស់ក្រសួងហិរញ្ញវត្ថុដើម្បីពិនិត្យឡើងវិញនូវផែនការគ្រប់គ្រងបំណុលសាធារណៈសម្រាប់សារពើពន្ធឆ្នាំ២០២៤ផងដែរ។ បើគេប្រៀបធៀបសមាមាត្របំណុលសាធារណៈនេះទៅនឹងអត្រាផលិតផលក្នុងស្រុកសរុប បំណុលនេះគឺស្ថិតនៅក្នុងរង្វង់ជាង៦៥% ពោលគឺនៅតែស្ថិតនៅក្រោមពិដានក្របខ័ណ្ឌបំណុលដែលជាទូទៅច្បាប់កំណត់មិនឱ្យដល់កម្រិត៧០% នៃផលិតផលក្នុងស្រុកសរុប។
ពាក់ព័ន្ធនឹងបញ្ហានេះអ្នកនាំពាក្យរដ្ឋាភិបាលថៃ លោកស្រី ឆៃ វាចារ៉ុង (Chai Wacharonke) បានបន្ថែមថា ការអនុម័តកញ្ចប់កម្ចីប្រាក់បន្ថែមនេះ ក៏នឹងត្រូវប្រើដើម្បីផ្តល់មូលនិធិដល់គម្រោងចែកលុយតាមកាបូបឌីជីថល ដែលមានទំហំជាង១៣ពាន់៥រយលានដុល្លារផងដែរ៕
ដោយៈ សរ សុជាតិ
