លោកស្រី រូដក្លៅ ស៊ូវ៉ានគិរី (Rudklao Suwankiri) អ្នកនាំពាក្យរដ្ឋាភិបាលថៃ បានឱ្យដឹងថា គណៈរដ្ឋមន្ត្រីថៃ បានអនុម័តក្របខ័ណ្ឌថវិកាជាតិ សម្រាប់សារពើពន្ធឆ្នាំ២០២៥ តាមសំណើរបស់ការិយាល័យថវិកាក្នុងទំហំ១០១ពាន់លានដុល្លារ ដោយកើនឡើង៣.៤% បើធៀបនឹងថវិកាជាតិសម្រាប់សារពើពន្ធឆ្នាំ២០២៤ ដែលមានចំនួនជាង៩៧ពាន់លានដុល្លារ។
អ្នកនាំពាក្យរូបនេះបាននិយាយទៀតថា កញ្ចប់ថវិកាជាតិសម្រាប់ឆ្នាំសារពើពន្ធ២០២៥ ដែលនឹងចាប់ផ្ដើមពីថ្ងៃទី១ ខែតុលា ឆ្នាំ២០២៤ រួមបញ្ចូលទាំងឱនភាពថវិកាប្រមាណ២០ពាន់លានដុល្លារ ដែលបានកើនឡើងជិត៣% ផងដែរ បើធៀបនឹងតួលេខសម្រាប់ឆ្នាំ២០២៤។
លោកស្រីបានបន្ថែមថា រដ្ឋាភិបាលថៃ នៅតែត្រូវការឱនភាពថវិការយៈពេលខ្លី ដើម្បីបន្តគាំទ្រដល់ការជំរុញកំណើនសេដ្ឋកិច្ច និងស្ថិរភាព ហើយរដ្ឋាភិបាលក៏រំពឹងដែរថា នឹងទទួលបានប្រាក់ចំណូលដុលចំនួនជាង៨០ពាន់លានដុល្លារនៅក្នុងឆ្នាំ២០២៥ ដោយកើនឡើង៣,៦% បើធៀបនឹងឆ្នាំ២០២៤ ជាមួយនឹងបំណុលសាធារណៈមានចំនួនជាង៣៥៦ពាន់លានដុល្លារ ដែលស្មើនឹង៦៣,៧% នៃផលិតផលក្នុងស្រុកសរុប(GDP)។
រដ្ឋាភិបាលថៃរំពឹងថា ផលិតផលក្នុងស្រុកសរុប ឬ GDP របស់ប្រទេសនេះនឹងកើនឡើងក្នុងចន្លោះពី៣,១%ទៅ៤,១% ជាមួយនឹងកំណើនជាមធ្យម៣,៦%ក្នុងឆ្នាំ២០២៥ ហើយអត្រាអតិផរណានឹងមានចន្លោះពី១,៥%ទៅ២,៥% ខណៈ GDP របស់ថៃ ត្រូវបានព្យាករថា នឹងមានទំហំជាង៥៦១ពាន់លានដុល្លារក្នុងឆ្នាំ២០២៤។
លោកស្រី រូដក្លៅ ស៊ូវ៉ានគិរី (Rudklao Suwankiri) បានឱ្យដឹងថា ជំហានបន្ទាប់ទៀត គឺជាការអំពាវនាវឱ្យការិយាល័យថវិកាអញ្ជើញបណ្ដាទីភ្នាក់ងាររដ្ឋាភិបាល ឱ្យដាក់សំណើចំណាយរបស់ពួកគេ ដើម្បីធ្វើការពិចារណា។
ទាក់ទិនការពិភាក្សាក្នុងកិច្ចប្រជុំគណៈរដ្ឋមន្ត្រី លោកស្រី រូដក្លៅ ស៊ូវ៉ានគិរី (Rudklao Suwankiri) បាននិយាយថា ការិយាល័យថវិកាបានស្នើសុំពន្យារពេលមួយសប្តាហ៍បន្ថែមទៀតពីកាលបរិច្ឆេទចាស់ ដែលគ្រោងធ្វើពីថ្ងៃទី២៦ ខែមករា ឆ្នាំ២០២៤ ដល់ថ្ងៃទី២ ខែកុម្ភៈ ឆ្នាំដដែល។ ការពន្យារពេលនេះមានគោលបំណងឱ្យស្ថាប័នទាំងអស់រៀបចំសំណើរបស់ពួកគេ ឱ្យបានស្របតាមគោលនយោបាយ ដែលនាយករដ្ឋមន្ត្រីថៃ បានដាក់ចេញកាលពីថ្ងៃទី១២ ខែមករា៕
អត្ថបទ៖ សុខ ជា
