មន្ត្រីថៃដែលអះអាងអំពីជំនួបជាមួយនឹងលោកស្រីអ៊ុង សានស៊ូជីនេះ គឺលោកដុន ប្រាមុដវីណៃ (Don Pramudwinai) រដ្ឋមន្ត្រីបរទេសប្រទេសសថៃ។ បើគិតចាប់តាំងការឃុំខ្លួនលោកស្រីពីថ្ងៃទី១ ខែកុម្ភៈឆ្នាំ២០២១ លោក ដុន គឺជាមន្ត្រីរដ្ឋាភិបាលបរទេសដំបូងគេហើយ ដែលបានជួបជាមួយលោកស្រីស៊ូជី ខណៈការប៉ុងប៉ងជួបនេះ បានបរាជ័យជាច្រើនដងរួចមកមិនថា មន្ត្រីតំណាងអង្គការសហប្រជាជាតិ ឬប្រេសិតតំណាងអាស៊ានជាដើម។
ទោះយ៉ាងណា លោក ដុន ប្រាមុដវីណៃ បានប្រាប់ភាគីអាស៊ាននៅក្នុងកិច្ចប្រជុំថ្នាក់រដ្ឋមន្ត្រីការបរទេស ដែលធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ីកាលពីដើមសប្តាហ៍នេះយ៉ាងដូច្នេះថា «លោកស្រីស៊ូជីមានសុខភាពល្អ នៅពេលខ្ញុំបានជួបជាមួយលោកស្រីជាងមួយម៉ោងកាលពីថ្ងៃអាទិត្យ។ ក្នុងជំនួបនោះ លោកស្រីជំរុញឱ្យមានកិច្ចពិភាក្សាគ្នា»។
អត្ថបទគួរអាន
ទន្ទឹមនឹងនេះ លោកណាយ ហ្វុនឡាត (Nay Phone Latt) អ្នកនាំពាក្យរដ្ឋាភិបាលរួបរួមជាតិមីយ៉ាន់ម៉ា ដែលចាត់ទុកខ្លួនឯងថា ជារដ្ឋាភិបាលស្រមោលរបស់ប្រទេសមីយ៉ាន់ម៉ា បានប្រាប់សារព័ត៌មាន AP ថា ព័ត៌មានអំពីជំនួបរវាងរដ្ឋមន្ត្រីការបរទេសថៃ និងលោកស្រី ស៊ូជី បានចោទជាសំណួរ ហើយប្រជាជនមីយ៉ាន់ម៉ាមិនប្រាកដថា វាពិតជាបានកើតឡើងមែន ឬអត់នោះឡើយ។ លោកបានបន្ថែមថា នេះអាចការប៉ុនប៉ងរបស់របបយោធាក្នុងការព្យាយាមប្រើប្រាស់ឥទ្ធិពលរបស់លោកស្រី ស៊ូជី នៅពេលនេះ គឺជាការទទួលស្គាល់ដោយប្រយោលថា ពួកគេលែងស្ថិតក្នុងស្ថានភាពល្អ ទាក់ទងនឹងវិបត្តិនយោបាយរបស់ប្រទេសតទៅទៀតហើយ។
ក្រោយបទចោទពីសំណាក់របបសឹក លោកស្រី អ៊ុងសាន ស៊ូជី ដែលមានវ័យ៧៨ឆ្នាំ មានរងនូវបទចោទពីតុលាការឱ្យជាប់ពន្ធនាគារ៣៣ឆ្នាំ។ ទោះយ៉ាងណា ក្រុមអ្នកសិទ្ធិមនុស្សមើលឃើញថា បទចោទទាំងនោះត្រូវបានលាយលំដោយរឿងនយោបាយច្រើនជាង។ ជាមួយគ្នា មន្ត្រីច្បាប់មកពីប្រទេសមីយ៉ាន់ម៉ាម្នាក់ បានអះអាងដោយស្នើសុំមិនបញ្ចេញឈ្មោះប្រាប់សារព័ត៌មាន AP ថា មេធាវីរបស់លោកស្រី ស៊ូជី កាលពីថ្ងៃទី១២កក្កដា បានដាក់ពាក្យបណ្តឹងប្រឆាំងទៅតុលាការកំពូលនៃបចោទចំនួន៥របស់លោកស្រី។
ទោះបីជាយ៉ាងណា រដ្ឋមន្ត្រីការបរទេសឥណ្ឌូណេស៊ី លោកស្រីរេនតូ ម៉ាស៊ូឌី (Retno Marsudi) បាននិយាយកាលពីថ្ងៃទី១២កក្កដាថា អាស៊ាននឹងបន្តផ្តោតលើផែនការសន្តិភាពចំនួនប្រាំចំណុច ដោយលោកស្រីថា ឧត្តមសេនីយរបស់មីយ៉ាន់ម៉ានឹងមិនត្រូវបានអនុញ្ញាតឱ្យត្រឡប់ឱ្យមកចូលរួមកិច្ចប្រជុំថ្នាក់រដ្ឋមន្ត្រី និងមេដឹកនាំនៃប្លុកក្នុងតំបន់នេះទេ លុះត្រាតែពួកគេគោរពតាមផែនការសន្តិភាពទាំងប្រាំចំនួននោះសិន៕
