មែនទែនទៅ ទំនាក់ទំនងផ្នែកសេដ្ឋកិច្ច ពាណិជ្ជកម្ម និងការវិនិយោគរវាងកម្ពុជា និងមីយ៉ាន់ម៉ា ហាក់បីដូចជានៅឃ្លាតឆ្ងាយពីគ្នាណាស់ បើធៀបនឹងទំនាក់ទំនងរវាងកម្ពុជា ជាមួយបណ្ដាប្រទេសជិតខាងដូចជា វៀតណាម ថៃ និងឡាវជាដើម។ ជាក់ស្ដែង តាមការបញ្ជាក់ពីប្រភពរាជរដ្ឋាភិបាលកម្ពុជា ទំហំពាណិជ្ជកម្មរវាងប្រទេសកម្ពុជា និងមីយ៉ាន់ម៉ា បច្ចុប្បន្នមានតែប្រមាណ ១០ លានដុល្លារប៉ុណ្ណោះ ខណៈដែលការវិនិយោគទៅវិញទៅមករវាងប្រទេសទាំងពីរ ក៏មានមិនច្រើនដែរ។
មានក្រុមហ៊ុនកម្ពុជា មិនមានច្រើនទេ ពោលគឺប្រមាណ២ ឬ ៣ ប៉ុណ្ណោះ បាននិងកំពុងពង្រីកការវិនិយោគរបស់ខ្លួន នៅប្រទេស មីយ៉ាន់ម៉ា (ភូមា)។ ក្នុងនោះ ធនាគារអេស៊ីលីដា អាចរាប់ចាត់ទុកថា ជាក្រុមហ៊ុនធំមួយ និងដំបូងគេ ដែលបានបោះទុនដំបូង ១០លានដុល្លារអាមេរិកវិនិយោគ បង្កើតគ្រឹះស្ថានមីក្រូហិរញ្ញត្ថុផ្ដល់ឥណទាន និងទទួលប្រាក់បញ្ញើនៅប្រទេសភូមា។
ការិយាល័យគ្រឹះស្ថានមីក្រូហិរញ្ញវត្ថុ អេស៊ីលីដា នៅប្រទេសមីយ៉ាន់ម៉ា
តាមសេចក្ដីប្រកាសព័ត៌មានរបស់ធនាគារអេស៊ីលីដានៅកម្ពុជា គ្រឹះស្ថានមីក្រូហិរញ្ញវត្ថុ អេស៊ីលីដា នៅមីយ៉ាន់ម៉ានេះ បានវិនិយោគដំបូង ក្នុងទំហំទឹកប្រាក់ដើមទុន ១០ លានដុល្លារអាមេរិក ខណៈបច្ចុប្បន្នគ្រឹះស្ថានមីក្រូហិរញ្ញវត្ថុនេះ បានពង្រីកខ្លួន ១២សាខា ហើយរួមទាំងការិយាល័យកណ្ដាល និងមានបុគ្គលិកជាង ២០០នាក់កំពុងបម្រើការ។
អត្ថបទទាក់ទង!
របាយការណ៍ប្រចាំឆ្នាំ របស់គ្រឹះស្ថានមីក្រូហិរញ្ញវត្ថុ អេស៊ីលីដា នៅមីយ៉ាន់ម៉ាបង្ហាញថា ប្រាក់ចំណេញសុទ្ធកាលពីឆ្នាំ ២០១៨ បានកើនឡើងដល់ ប្រមាណ៧០% ដែលបានកើនឡើងពីជាង ១,២លានដុល្លារ នៅឆ្នាំ២០១៧ ដល់ ជាង២,២លានដុល្លារ នៅឆ្នាំ២០១៨។ ក្នុងនោះ ទំហំប្រាក់កម្ចី បានកើនឡើងរហូតដល់ ជាង ៥៧% ពី ជាង ១៥ លានដុល្លារ ទៅ ជាង២៤ លានដុល្លារអាមេរិក ជាមួយអ្នកខ្ចីប្រាក់បានកើនឡើងដល់ ៦,៨ ម៉ឺននាក់។ ដោយឡែក ទំហំប្រាក់បញ្ញើវិញ បានកើនឡើងខ្លាំង រហូតដល់ ២១៥% ពីចំនួនទឹកប្រាក់បញ្ញើ ៧៤ ម៉ឺនដុល្លារ កើនដល់ ជាង ២លានដុល្លារអាមេរិក ជាមួយនិងអតិថិជនដាក់ប្រាក់បញ្ចើកើនដល់ ជិត ១លាននាក់។ នេះបើធ្វើការប្រៀបធៀបក្នុងឆ្នាំ២០១៨ ទៅនឹងឆ្នាំ២០១៧។
ទំនាក់ទំនងផ្នែកសេដ្ឋកិច្ច ពាណិជ្ជកម្ម និងការវិនិយោគ រវាងកម្ពុជា និងមីយ៉ាន់ម៉ា នឹងស្ទុះឡើង ក្រោយជំនួបថ្នាក់ដឹកនាំកំពូល
កម្ពុជា បង្ហាញពីឆន្ទៈនឹងបង្កើនទំហំពាណិជ្ជកម្មទ្វេភាគីជាមួយប្រទេសមីយ៉ាន់ ឲ្យបានកើនឡើងកាន់តែខ្លាំងក្លាថែមទៀត ខណៈដែលបច្ចុប្បន្នប្រទេសអាស៊ានទាំងពីរនេះ មានទំហំពាណិជ្ជកម្មទ្វេភាគីតែប្រមាណ ១០ លានដុល្លារអាមេរិកប៉ុណ្ណោះ ដែលនេះជាទំហំពាណិជ្ជកម្មតិចតួចណាស់ បើធៀបនឹងប្រទេសជិតខាងកម្ពុជា ដូចជាថៃ និងវៀតណាមជាដើម។ គោលបំណងពង្រីកទំហំពាណិជ្ជកម្មរវាងកម្ពុជា និងមីយ៉ាន់ម៉ានេះ ត្រូវបានសម្ដេច តេជោ លើកឡើង នៅក្នុងជំនួបពិភាក្សាការងារជាមួយនឹងលោកស្រី អ៊ុងសាន ស៊ូជី ទីប្រឹក្សារដ្ឋនៃសាធារណរដ្ឋសហភាពមីយ៉ាន់ម៉ា កាលពីព្រឹកមិញនេះ។
ក្នុងជំនួបជាមួយនឹងលោកស្រី អ៊ុង សាន ស៊ូជី កាលពីព្រឹកថ្ងៃទី ៣០ មេសានេះ ក្រៅពីលើកឡើងពីកិច្ចសហប្រតិបត្តិការនានាទាក់ទងនឹងវិស័យវប្បធម៌ សាសនា និងអប់រំហើយនោះ ពាក់ព័ន្ធទៅនឹងផ្នែកសេដ្ឋកិច្ចវិញ សម្ដេច តេជោ ហ៊ុន សែន បានក៏បានលើកឡើងថា ពីគោលបំណងឈានទៅបង្កើនទំហំពាណិជ្ជកម្មទ្វេភាគីឲ្យបានកើនឡើងកាន់តែខ្លាំងក្លាថែមទៀត ខណៈបច្ចុប្បន្នទំហំពាណិជ្ជកម្មរវាងប្រទេសទាំងពីរ ទើបតែមាន ១០ លានដុល្លារអាមេរិក ប៉ុណ្ណោះ។
បន្ថែមពីនេះទៀត សម្ដេចតេជោ បានស្នើសុំឲ្យមាន ការត្រួតពិនិត្យលើបញ្ហាពន្ធត្រួតគ្នា និងវិស័យដទៃទៀត ដែលប្រទេសទាំងពីរ មានសក្តានុពល ជំរុញឲ្យមានការរីកចម្រើនកាន់តែធំធាត់ឡើង។
តើអ្នកបានអានអត្ថបទនេះ ហើយឬនៅ?
បើយើងក្រឡេកមើលទៅទំហំពាណិជ្ជកម្មទ្វេភាគីរវាងកម្ពុជា និងប្រទេសជិតខាង ដូចជា ថៃ និងវៀតណាម ជាដើម ឃើញថា ម៉ាយ៉ាន់ម៉ា ពិតជានៅមានគម្លាតពាណិជ្ជកម្មឆ្ងាយណាស់ជាមួយកម្ពុជា។ ជាក់ស្ដែង តាមរបាយការណ៍ដែលភីអិនអិនទទួលបាន ទំហំពាណិជ្ជកម្មរវាងកម្ពុជា ជាមួយថៃ នៅឆ្នាំ២០១៨ សម្រេចបាន រហូតដល់ ៦ ពាន់លានដុល្លារអាមេរិក ខណៈជាមួយវៀតណាមវិញ សម្រេចបាន ៤,៧ ពាន់លានដុល្លារអាមេរិក។ រីឯទំហំពាណិជ្ជកម្ម កម្ពុជាជាមួយ ឡាវវិញ សម្រេចបាន ប្រមាណ ២៤ លានដុល្លារអាមេរិក នៅឆ្នាំ២០១៨៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
