នាយករដ្ឋមន្ត្រីថៃ៖ ស្ថានភាពកូវីដ-១៩ នឹងធូរស្បើយមកវិញ ក្នុងរយៈពេល ៤ ទៅ ៦ សប្តាហ៍ខាងមុខ

នៅក្នុងកិច្ចប្រជុំអនឡាញមួយនាពេលថ្មីៗនេះ លោកឧត្តមសេនីយ៍ ប្រាយុទ្ធចាន់អូចា  បានលើកឡើងថា លោកមានសង្ឃឹមថា ស្ថានភាពនឹងប្រសើរឡើងក្នុងរយៈពេល ៤ ទៅ ៦ សប្តាហ៍ខាងមុខនេះ ដោយផ្អែកលើភស្តុតាងវេជ្ជសាស្ត្របច្ចុប្បន្ន។ ប៉ុន្តែ លោកប្រាយុទ្ធថា លោកនៅតែមានការព្រួយបារម្ភអំពីការប្រើប្រាស់ជាសាធារណៈនូវឧបករណ៍ធ្វើតេស្តរហ័សរកកូវីដ-១៩ ព្រោះមិនដឹងថា ពលរដ្ឋចេះពីរបៀបប្រើប្រាស់ឧបករណ៍ទាំងនោះ បានត្រឹមត្រូវ ឬក៏អត់នោះទេ។នេះបើតាមការរាយការណ៍ពីសារព័ត៌មានបាងកកប៉ុស្ដិ៍។

គិតមកទល់ពេលនេះ ចំនួនអ្នកឆ្លងប្រចាំថ្ងៃនៅថៃ នៅមិនទាន់ធ្លាក់ចុះនោះទេ ពោលគឺនៅតែមានជាង១ម៉ឺននាក់ ខណៈដែលអ្នកស្លាប់ប្រចាំថ្ងៃវិញក៏មានរាប់រយនាក់ផងដែរ។

លោកនាយករដ្ឋមន្រ្តីថៃ បានប្រាប់អភិបាលខេត្តនានាឱ្យធ្វើបច្ចុប្បន្នភាពលើបញ្ហារបស់ពួកគេ ដែលបានជួបប្រទះ ក្នុងអំឡុងពេលប្រយុទ្ធប្រឆាំងកូវីដ-១៩ ដូច្នេះរដ្ឋាភិបាលអាចឈានជើងចូលដើម្បីដោះស្រាយបញ្ហាទាំងនោះបានទាន់ពេលវេលា។

បើតាមអភិបាលខេត្តមួយចំនួនបានអះអាងថា មានរោងចក្រជាច្រើន ត្រូវបានផ្អាករយៈពេល១៤ថ្ងៃ ខណៈដែលរោងចក្រ គឺជាបណ្ដុំមួយដែលចម្លងមេរោគលឿនរហ័សនៅក្នុងប្រទេសថៃ។ នៅក្នុងកិច្ចប្រជុំ លោកប្រាយុទ្ធ បានសួរទៅកាន់ក្រុមអភិបាលខេត្តដែលចូលរួមប្រជុំថា តើករណីឆ្លងតាមបណ្ដាខេត្តមានការធ្លាក់ចុះដែរឬទេ? ប៉ុន្ដែ មិនមាននរណាឆ្លើយតបនោះទេ។

ជាមួយគ្នានេះ លោកនាយករដ្ឋមន្ត្រីថៃ បានអះអាងថា ប្រទេសខ្លួនមិនប្រឈមមុខនឹងកង្វះខាតការផ្គត់ផ្គង់វេជ្ជសាស្ត្រ រួមទាំងថ្នាំពេទ្យ និងបំពង់អុកស៊ីសែននោះទេ។ លោកបានសន្យា ថានឹងផ្តល់ការគាំទ្រដល់ខេត្តទាំងអស់នូវវ៉ាក់សាំងកូវីឌ-១៩ តាមគោលនយោបាយរបស់រដ្ឋាភិបាល។

ទោះយ៉ាងណា ដោយសារតែករណីឆ្លងប្រចាំថ្ងៃបន្ដកើនឡើងជាង១ម៉ឺននាក់រៀងរាល់ថ្ងៃ ថ្មីៗនេះប្រទេសថៃ កំពុងយកព្រលានយន្ដហោះដនមឿង ដើម្បីរៀបចំដាក់គ្រែពេទ្យជិត២ពាន់គ្រែ សម្រាប់ទទួលយកអ្នកជំងឺកូវីដ-១៩ ដែលមានស្ថានភាពស្រាលមកសម្រាកព្យាបាល។

សូមបញ្ជាក់ថា ថៃមានគោលដៅចាក់វ៉ាក់សាំងជូនពលរដ្ឋរបស់ខ្លួនឲ្យបានដល់៥០លាននាក់នៅចុងឆ្នាំនេះ ប៉ុន្ដែ មកទល់ពេលនេះ ទើបតែមានពលរដ្ឋត្រឹមតែ៥,៦%ប៉ុណ្ណោះ នៃចំនួនពលរដ្ឋសរុប៦៦លាននាក់ បានទទួលការចាក់វ៉ាក់សាំងគ្រប់ចំនួនដូស ខណៈដែលអ្នកដែលបានចាក់១ដូស មានជាង១៩%៕

អត្ថបទ៖ ស៊ើង និមល់