ថៃ ធ្វើបត្យាប័នជនជាតិចិន ចំនួន៣០០នាក់ ពាក់ព័ន្ធនឹងឧក្រិដ្ឋកម្មឆបោកទៅប្រទេសកំណើតវិញ

ប្រតិបត្តិការបង្ក្រាបឧក្រិដ្ឋកម្មតាមអ៊ីនធឺណិតឆ្លងដែននេះ គឺជាកិច្ចសហការរួមគ្នារវាងមន្ត្រីអន្តោប្រវេសន៍ថៃ ចិន និងមីយ៉ាន់ម៉ា។ ជនសង្ស័យចំនួន៣០០នាក់ដំបូង ត្រូវបានបញ្ជូនឡើងយន្តហោះជួលផ្ដាច់មុខរបស់ក្រុមហ៊ុនអាកាសចរណ៍ China Southern Airlines ដើម្បីឆ្ពោះទៅកាន់ប្រទេសចិន។ មន្ត្រីអន្តោប្រវេសន៍ថៃ បានបញ្ជាក់ថា មុនពេលបញ្ជូនចេញអាជ្ញាធរបានត្រួតពិនិត្យប្រវត្តិរូបយ៉ាងហ្មត់ចត់ រួមទាំងព័ត៌មានផ្ទាល់ខ្លួន ដើម្បីដាក់ពួកគេចូលក្នុងបញ្ជីខ្មៅ។

ការបង្ក្រាបនេះកើតឡើងបន្ទាប់ពីប្រទេសចិន បានបង្កើនសម្ពាធយ៉ាងខ្លាំងលើប្រទេសមីយ៉ាន់ម៉ា និងថៃ ឱ្យចាត់វិធានការដាច់ខាតលើក្រុមឧក្រិដ្ឋជនទាំងនេះ ដើម្បីនាំយកទៅប្រឈមមុខនឹងច្បាប់នៅប្រទេសចិន ជុំវិញករណីឆបោកតាមប្រព័ន្ធអនឡាញ ដែលបង្កការខូចខាតជាទឹកប្រាក់រាប់រយលានដុល្លារដល់ជនរងគ្រោះ៕

អត្ថបទៈ សួន ឡង់ទី​