ថៃ បើកការស៊ើបអង្កេតលើគម្រោងសាងសង់ ដែលជាប់ពាក់ព័ន្ធនឹងក្រុមហ៊ុនម៉ៅការចិន ដែលជាអ្នកសង់អគារដួលរលំក្នុងគ្រោះរញ្ជួយដី

បន្ទាប់ពីកិច្ចប្រជុំគណៈរដ្ឋមន្ត្រី កាលពីថ្ងៃអង្គារ ទី១ ខែមេសា នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានអះអាងថា លោកស្រីបានបញ្ជាឱ្យទីភ្នាក់ងារនានា បើកការស៊ើបអង្កេតលើគម្រោងសាងសង់ទាំងអស់ដែលប្រគល់ឱ្យទៅក្រុមហ៊ុនម៉ៅការសាងសង់ចិន មានឈ្មោះថា China Railway No.10 Engineering Group។

សូមបញ្ជាក់ថា ការិយាល័យសវនកម្មរដ្ឋរបស់ថៃ បានចុះកុងត្រាប្រគល់ការម៉ៅការសាងសង់ឱ្យទៅក្រុមហ៊ុនបណ្ដាក់ទុនរួមគ្នាមួយដែលបង្កើតឡើងដោយក្រុមហ៊ុនក្នុងស្រុកមានឈ្មោះថា Italian-Thai Development និងក្រុមហ៊ុនចិន China Railway No.10 ដើម្បីសាងសង់អគារកម្ពស់​៣៤ជាន់តម្លៃជាង៦០លានដុល្លារអាម៉េរិក ដែលបានដួលរលំ។

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានថ្លែងថា រដ្ឋាភិបាលរបស់លោកស្រី បានបញ្ជាឱ្យទីភ្នាក់ងារពាក់ព័ន្ធទាំងអស់របស់រដ្ឋបើកការស៊ើបអង្កេតលើគម្រោងសាងសង់ទាំងអស់របស់ក្រុមហ៊ុនចិន ខាងលើនេះ ព្រោះការដួលរលំអគាររដ្ឋកម្ពស់៣៤ជាន់ដែលសាងសង់បានប្រមាណ៧០%នោះ បានបង្កសោកនាដកម្មបណ្ដាលឱ្យមនុស្សស្លាប់ជាង១០នាក់ និងជិត១០០នាក់ផ្សេងទៀតកប់ក្នុងគំនរបាក់បែកនៃគារនោះ ហើយវាបានបានធ្វើឱ្យខូចមុខមាត់របស់ប្រទេសថៃ យ៉ាងខ្លាំង។

លោកស្រីបានសង្កត់ធ្ងន់ថា អគារទាំងអស់នៅក្នុងទីក្រុងបាងកក ត្រូវតែធានាបំពេញឱ្យបានតាមស្តង់ដា​ច្បាប់ និងរក្សាសុវត្ថិភាពជាចម្បង។ លោកស្រីបានបន្ថែមទៀតថា រដ្ឋាភិបាលថៃ បានបញ្ជាឱ្យបើកស៊ើបអង្កេតលើដែកថ្នាំងអំពៅដែលត្រូវបានប្រើប្រាស់នៅក្នុងការសាងសង់អគារដួលរលំនោះថា តើដែកថ្នាំងអំពៅនោះគ្រប់ស្ដង់ដា​ ឬក៏ស្ថិតក្រោមកម្រិតស្តង់ដា​។

យោងតាមសេចក្ដីរាយការណ៍ឱ្យដឹងថា ក្រៅពីការិយាល័យសវនកម្មរដ្ឋ ក្រុមហ៊ុនចិនខាងលើ ក៏ទទួលម៉ៅការសាងសង់គម្រោងធំៗជាច្រើនផ្សេងទៀតដែរ ក្នុងនោះ រួមមានទាំងអគារការិយាល័យជាតិ ធនធានទឹក និងផ្នែកខ្លះនៃគម្រោងផ្លូវរថភ្លើងល្បឿនលឿនបាងកក-ណងខៃផងដែរ។

ទាក់ទិនករណីនេះ ស្ថានទូតចិន ប្រចាំទីក្រុងបាងកក បានបង្ហោះសារលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី១ ខែមេសា ឆ្នាំ២០២៥ ក្នុងន័យការពារក្រុមហ៊ុនចិន ថា រដ្ឋាភិបាលចិន តែងតែណែនាំដល់បណ្ដាក្រុមហ៊ុនចិន ដែលកំពុងប្រតិបត្តិការនៅក្រៅប្រទេសឱ្យគោរពតាមច្បាប់ និងបទប្បញ្ញត្តិនៃប្រទេសទាំងនោះយ៉ាងម៉ឺងម៉ាត់ ប្រកាន់យកទំនួលខុសត្រូវសង្គមយ៉ាងយកចិត្តទុកដាក់ និងបង្កើតផលប្រយោជន៍សម្រាប់សង្គម។

សូមបញ្ជាក់ផងដែរថា តុលាការក្រុងបាងកក កាលពីថ្ងៃទី១ ខែមេសា បានសម្រេចផ្ដន្ទាទោសបុគ្គលិកជនជាតិចិន ចំនួន៤នាក់ នៃក្រុមហ៊ុនម៉ៅការសាងសង់ចិន China Railway No.10 Engineering Group ឱ្យជាប់ពន្ធនាគារ១ឆ្នាំ២ខែ ពីបទបំពានច្បាប់ ស្ដីពីការការពារ និងសម្រាលផលប៉ះពាល់នៃគ្រោះមហន្តរាយដោយសារពួកគេបានលួចយកឯកសារសាងសង់ចេញពីបរិវេណអគារដែលត្រូវបានហាមឃាត់៕

ដោយ: តែម សុខុម