ថៃ ដាក់គោលដៅនាំចេញទុរេនឱ្យបាន៣,៥ពាន់លានដុល្លារអាម៉េរិក ក្នុងឆ្នាំ២០២៤ នេះ

ស្របតាមការណែនាំរបស់នាយករដ្ឋមន្ត្រីថៃ លោក សេដ្ឋា ថាវីស៊ីន ក្រសួងកសិកម្ម និងសហករណ៍នៃប្រទេសថៃ មានភារកិច្ចរៀបចំសេចក្តីព្រាងបទប្បញ្ញត្តិនានា ដើម្បីទប់ស្កាត់ការលក់ទុរេនមិនទាន់ទុំ ឬទុរេនគុណភាពអន់។

លោក ឆៃ វ៉ាឆារ៉ុនកេ (Chai Wacharonke) អ្នកនាំពាក្យនាយករដ្ឋមន្ត្រី សេដ្ឋា ថាវីស៊ីន បានលើកឡើងថា គំនិតផ្តួចផ្តើមរៀបចំសេចក្តីព្រាងបទប្បញ្ញត្តិនានាខាងលើនេះ មានគោលបំណងរារាំងការប្រមូលផល និងការលក់ផ្លែទុរេនមិនគ្រប់អាយុ ហើយវិធានការនេះនឹងជួយពង្រឹងគុណភាពផ្លែឈើ និងការប្រកួតប្រជែងក្នុងការនាំចេញ។

បន្ថែមពីលើការប្តេជ្ញាចិត្តរបស់ខ្លួនចំពោះគុណភាព និងស្ថិរភាពទីផ្សារ ប្រទេសថៃ កាលពីពេលថ្មីៗនេះបានចុះអនុស្សរណៈនៃការយោគយល់គ្នា (MoU) ជាមួយប្រទេសចិន ដើម្បីលើកកម្ពស់ និងធានាស្ថិរភាពតម្លៃសម្រាប់ការនាំចេញផ្លែឈើត្រូពិចពីប្រទេសថៃ ទៅកាន់ប្រទេសចិន។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋចិន China News Service។

អនុស្សរណៈនៃការយោគយល់គ្នា (MoU) នេះនឹងជួយសម្រួលដល់ការនាំចូលទុរេន និងផ្លែមង្ឃុតប្រមាណ២ម៉ឺនតោន ដែលគិតជាទឹកប្រាក់ជាង៨២លានដុល្លារអាម៉រិក ពីប្រទេសថៃ ចាប់ពីខែមេសា ដល់ខែមិថុនា ឆ្នាំនេះ។ បើយោងតាមកាសែតបាងកកប៉ុស្តិ៍ ការនាំចេញទុរេនដែលអាចរកប្រាក់ចំណូលបាន៣,២៤ពាន់លានដុល្លារអាម៉េរិក កាលពីឆ្នាំមុន ដើរតួនាទីយ៉ាងសំខាន់ក្នុងការជំរុញសេដ្ឋកិច្ចជាតិរបស់ប្រទេសថៃ។ ប្រទេសថៃ ដែលផលិតទុរេនបានប្រមាណ៩សែនតោនក្នុងមួយឆ្នាំៗនាំចេញជិត២ភាគ៣នៃទិន្នផលនេះជាចម្បងទៅកាន់ប្រទេសចិន៕

ដោយ: តែម សុខុម