ថៃគ្រោងជះលុយ៧លានដុល្លាររៀបចំសង្រ្កាន្តឆ្នាំថ្មី ដើម្បីកើបលុយ១ពាន់៥រយលានដុល្លារពីអ្នកទេសចរ

រៀបចំកម្មវិធីសង្ក្រាន្តរយៈពេល៤ថ្ងៃចាប់ពីថ្ងៃទី១១-១៥ ខែមេសា ឆ្នាំ២០២៥ ប្រទេសរំពឹងអាចស្រូបទាញភ្ញៀវទេសចរបរទេសរហូតដល់១,៥លាននាក់។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍។

ក្នុងកិច្ចខិតខំប្រឹងប្រែងដើម្បីទាក់ទាញភ្ញៀវទេសចរបរទេសឲ្យឈានដល់គោលដៅ៣៩លាននាក់ជាមួយចំណូលជាង១០០ពាន់លានដុល្លារនៅក្នុងឆ្នាំ២០២៥ នេះ ក្រសួងទេសចរណ៍ថៃគ្រោងនឹងរៀបចំកម្មវិធីមហាសង្រ្កាន្តឆ្នាំថ្មីដ៏ធំមួយពីថ្ងៃទី១១ ដល់ថ្ងៃទី១៥ ខែមេសា ឆ្នាំ២០២៥។ តាមរយៈកម្មវិធីសង្ក្រាន្ត ដែលគ្រោងចំណាយថវិកា៧លានដុល្លារអាម៉េរិកនេះ ក្រសួងទេសចរណ៍ថៃរំពឹងអាចស្រូបទាញភ្ញៀវទេសចរបរទេសបាន១,៥លាននាក់ជាមួយចំណូល១ពាន់៥រយលានដុល្លារអាម៉េរិក។

រដ្ឋមន្ត្រីក្រសួងទេសចរណ៍ និងកីឡាលោក សុរាវង្ស ធៀនថុង (Sorawong Thienthong )បានអះអាងថា ក្រសួងទេសចរណ៍ថៃកំពុងស្នើសុំកញ្ចប់ថវិកានេះទៅគណៈរដ្ឋមន្ត្រី ដើម្បីធ្វើយ៉ាងណាទាក់ទាញភ្ញៀវទេសចរបរទេសឲ្យបានដល់១,៥លាននាក់ជាមួយនឹងកំណើនពី១០ទៅ២០% បើធៀបនឹងព្រឹត្តិការណ៍ឆ្នាំមុន។ តាមអ្វីដែលបានគ្រោងទុក ថៃគ្រោងរៀបចំកម្មវិធីសង្រ្កាន្តឆ្នាំថ្មីនេះនៅតាមខេត្តចំនួន១៧ រួមទាំងទីក្រុងបាងកកផងដែរ ដើម្បីធ្វើយ៉ាងណាផ្តល់ភាពរីករាយ និងផ្សព្វផ្សាយនូវវប្បធម៌ថៃ។

ក្រៅពីកម្មវិធីសង្រ្កាន្តនេះ រដ្ឋាភិបាលថៃបានប្រកាសកាលពីថ្ងៃពុធ ថា ខ្លូននឹងរៀបចំព្រឹត្តិការណ៍ផ្សេងៗនៅក្នុងចន្លោះពីខែមីនា ដល់ខែកញ្ញា ដើម្បីបង្កើនការទាក់ទាញភ្ញៀវទេសចរបរទេស។ កម្មវិធីទាំងនេះរួមមានតំាងពីព្រឹត្តិការណ៍ប្រគុំតន្រ្តីអន្តរជាតិ កម្មវិធីបង្ហោះខ្លែងថ្នាក់ជាតិ កម្មវិធីប្រកួតបាល់ទះស្រ្តីពិភពលោក និងកម្មវិធីប្រណាំងម៉ូតូលំដាប់អន្តរជាតិ៕

ដោយៈ សរ សុជាតិ