ធនាគារពិភពលោកអះអាងថា ថៃ ជាប់ចំណាត់ថ្នាក់ទាបជាងគេក្នុងចំណោមដៃគូប្រជែងនៅអាស៊ានលើការច្នៃប្រឌិតពាណិជ្ជកម្ម

ទីផ្សារការងារនៅក្នុងប្រទេសថៃ ជាពិសេសនៅក្នុងសហគ្រាសធុនតូច និងមធ្យម (SMEs) នៅតែបន្តប្រឈមមុខនឹងហានិភ័យបណ្ដាលមកពីកត្តាក្នុងស្រុក និង អន្តរជាតិ ជាពិសេសផលប៉ះពាល់នៃសង្គ្រាមពាណិជ្ជកម្មពិភពលោកដែលកំពុងរំខានដល់ការលក់ និង ខ្សែច្រវាក់ផលិតកម្ម​។ វិស័យផលិតកម្មរបស់ថៃ មិនទាន់មានការរីកចម្រើនលើការច្នៃប្រឌិតខ្ពស់នៅឡើយទេ ដែលជាហេតុធ្វើឱ្យការផលិតមិនអាចឆ្លើយតបតាមតម្រូវការរបស់អតិថិជន ដែលធ្វើឱ្យការលក់មានការធ្លាក់ចុះ មានការកាត់បន្ថយទិន្នផលផលិតកម្ម និង ទីផ្សារការងារធ្លាក់ចុះ ដែលបណ្តាលឱ្យមានការបិទអាជីវកម្មយ៉ាងទូលំទូលាយកាលពីឆ្នាំមុន បន្តដល់ដើមឆ្នាំ២០២៥នេះ។

បើតាមរបាយការណ៍របស់ធនាគារពិភពលោកបានបង្ហាញថា ក្រុមហ៊ុនអាជីវកម្មថៃ មានការច្នៃប្រឌិតក្នុងប្រតិបត្តិការទាបជាងដៃគូដទៃទៀតនៅក្នុងតំបន់ ដោយមានក្រុមហ៊ុនថៃ ​ជិត១២% ប៉ុណ្ណោះ ដែលបានបង្កើនការច្នៃប្រឌិតនៅក្នុងដំណើរការផលិត ខណៈប្រទេសហ្វីលីពីន​មានការច្នៃប្រឌិត ៤០,៩% វៀតណាមមាន ៣៧,៩% និង ម៉ាឡេស៊ីមាន ៣៧,៣%។

របាយការណ៍ធនាគារពិភពលោកនេះ ក៏បានបង្ហាញពីការវិនិយោគទាបរបស់ប្រទេសថៃ លើការស្រាវជ្រាវ និងការអភិវឌ្ឍដែលបង្កជាឧបសគ្គដល់ការប្រកួតប្រជែងនៅក្នុងអាជីវកម្មផងដែរ​។ គម្លាតនៃការបង្កើតថ្មី នេះ អាចរួមចំណែកយ៉ាងសំខាន់ដល់រលកនៃការបិទអាជីវកម្មកាលពីឆ្នាំ២០២៤ ដែលមានសហគ្រាសធុនតូច និងមធ្យមជិត២ម៉ឺន៤ពាន់កន្លែងត្រូវបានលុបឈ្មោះចេញ ខណៈរោងចក្រជាង១ពាន់កន្លែងភាគច្រើនជាខ្នាតតូច និងមធ្យមត្រូវបានបិទ។ ការបិទទាំងអស់នេះ បានប៉ះពាល់ដល់កម្មករជាង ៣ម៉ឺន៥ពាន់នាក់ ដោយរោងចក្របិទទ្វារភាគច្រើនស្ថិតនៅក្នុងវិស័យផលិតកម្ម៕

ដោយ៖ សុខ មង្គល