ថៃ បញ្ជាក់ជាថ្មីពីការប្តេជ្ញាចិត្តដោះស្រាយជម្លោះដោយសន្តិវិធី តែយោធាថៃ នៅតែរុកកួនកម្ពុជា

លោក ផានីឌន ប៉ាត់ឈីមសាវ៉ាត (Panidone Pachimsawat) អគ្គនាយកស្ដីទីនៃនាយកដ្ឋានព័ត៌មាន និងជាអ្នកនាំពាក្យរងក្រសួងការបរទេសថៃ បានបញ្ជាក់នៅក្នុងសន្និសីទសារព័ត៌មានថា បច្ចុប្បន្នប្រជាជនដែលរស់នៅតាមតំបន់ព្រំដែនអាចបន្តសកម្មភាពរស់នៅជាធម្មតាឡើងវិញ​។ ជាមួយគ្នានេះ សម្ពន្ធមិត្តអន្តរជាតិ ក៏បានសម្តែងការគាំទ្រយ៉ាងខ្លាំងចំពោះយន្តការឈប់បាញ់ប្រកបដោយចីរភាព និងការត្រៀមលក្ខណៈវិលត្រឡប់ទៅកាន់តុចរចា ដើម្បីដោះស្រាយបញ្ហាដោយសន្តិវិធី។

ទោះជាយ៉ាងណាក៏ដោយ អ្នកនាំពាក្យរងរូបនេះបានទទួលស្គាល់ថា រហូតមកទល់ពេលនេះ មិនទាន់មានការឯកភាពគ្នាចុងក្រោយពាក់ព័ន្ធនឹងការគ្រប់គ្រងទីតាំងជម្លោះនៅឡើយទេ។ ការកត់សម្គាល់បែបនេះ កើតឡើងស្របពេលមានការចោទប្រកាន់ពីភាគីកម្ពុជា ថា ថៃ បានដាក់ទូកុងតឺន័រ និងរាយលួសបន្លានៅក្នុងតំបន់សេសសល់ ឬតំបន់ជម្លោះ ប៉ុន្តែភាគីថៃ បានបដិសេធចំពោះការចោទប្រកាន់ទាំងនេះ។

លោកបានសង្កត់ធ្ងន់ថា ការចរចាព្រំដែនគោកជាផ្លូវការតាមរយៈយន្តការគណៈកម្មការព្រំដែនរួម (JBC) អាចនឹងដំណើរការឡើងវិញបាន លុះត្រាតែប្រទេសថៃ បញ្ចប់ដំណើរការរៀបចំរដ្ឋាភិបាលថ្មីឱ្យបានរួចរាល់ជាមុនសិន៕

អត្ថបទៈ សួន ឡង់ទី​