រថយន្ត Sweptail ដែល Rolls-Royce ទើបចេញ ថ្លៃជាងគេបំផុតលើពិភពលោក (វីដេអូ)

ក្រុមហ៊ុនរថយន្ត Rolls-Royce ទើបបានផលិតរួចរាល់នូវម៉ូដែលថ្មីបំផុតមួយ ឈ្មោះ Sweptail ដែលក្រុមហ៊ុនអះអាងថា អាចជារថយន្តដែលថ្លៃជាងគេបំផុត នៅលើពិភពលោក។

រថយន្ត Rolls-Royce Sweptail តម្លៃ ១៣លានដុល្លារអាមេរិក។

រថយន្ត Rolls-Royce ឈ្មោះ Sweptail នេះ ជាការផលិតសម្រិតសម្រាំងបំផុត សម្រាប់អតិថិជនមួយរូបគត់ដែលបានកុម្មង់ឲ្យក្រុមហ៊ុន Rolls-Royce ផលិតឲ្យរូបគាត់។

រថយន្តប្រណីតថ្មីបំផុតដែលមានតែមួយគ្រឿងគត់នេះ ត្រូវបានបង្ហាញដល់អ្នកសារព័ត៌មាននៅឯ Concorso d’Eleganza នៅក្រុង Villa d’Este កាលពីថ្ងៃទី២៧ ឧសភា ឆ្នាំ២០១៧។

លោក Torsten Müller-Ötvös អគ្គនាយកក្រុមហ៊ុនរថយន្ត Rolls-Royce មានប្រសាសន៍ថា៖ «រថយន្ត Sweptail គឺជារថយន្តដ៏អស្ចារ្យ។ ... ហើយរថយន្ត Sweptail គឺជាតឹកតាងបង្ហាញថា រថយន្ត Rolls-Royce នៅតែឈរក្នុងលំដាប់កំពូលនៃការផលិតដោយដៃ ប្រៀបបាននឹងការកសាងនាវា»។

👉 គួរអានដែរ ! នៅកម្ពុជា ការនិយមប្រើរថយន្តប្រណីតៗកំពុងកើនឡើង

រថយន្តម៉ូដែល ‘Sweptail’ - ក្តីស្រមៃក្លាយជាការពិត

លោក Giles Taylor នាយកផ្នែករចនាម៉ូតរបស់ក្រុមហ៊ុនរថយន្ត Rolls-Royce ថ្លែងថា រថយន្ត Sweptail គឺជារថយន្តដែលប្រៀបបាននឹងសម្លៀកបំពាក់ប្រណីត។

លោក Taylor ថ្លែងយ៉ាងដូច្នេះ ៖ «នេះជារថយន្ត Rolls-Royce ដែលត្រូវបានរចនា និងបង្កើតដោយដៃដើម្បីតម្រូវទៅតាមការចង់បានរបស់អតិថិជនម្នាក់។ អតិថិជនរូបនេះ បានមកកាន់រោងចក្ររថយន្ត Rolls-Royce ជាមួយនឹងគំនិតមួយ ដែលគាត់យកមកចែករំលែកក្នុងដំណើរការប្រកបដោយភាពច្នៃប្រឌិត ហើយយើងបានផ្ដល់យោបល់ដល់គាត់ប្រៀបបាននឹងការកាត់ដេរសម្លៀកបំពាក់ដល់រូបគាត់ ហើយបន្ទាប់មក យើងបានដេរខោអាវនោះដល់គាត់។ អ្នកអាចនិយាយបានថា យើងបានកាត់កំណាត់សម្រាប់សម្លៀកបំពាក់ ដែលគេអាចវាយតម្លៃលើរូបគាត់ពេលគាត់ស្លៀកពាក់វា»។