ថៃ ចាប់ផ្តើមដាក់ពាក្យសុំចូលជាសមាជិកអង្គការ OECD ក្រោយក្លាយជាដៃគូរបស់ BRICS

រដ្ឋមន្ត្រីការបរទេសថៃ លោក ម៉ារីស សានជៀមផុងសា (Maris Sangiampongsa) បាននិយាយកាលពីថ្ងៃពុធ សប្តាហ៍នេះថា ប្រទេសថៃបានចាប់ផ្ដើមដំណើរការដាក់ពាក្យសុំចូលសមាជិករបស់អង្គការ OECD ដើម្បីឈានទៅសម្រេចគោលដៅក្លាយជាប្រទេសមានប្រាក់ចំណូលខ្ពស់នៅត្រឹមឆ្នាំ២០៣៧ តាមរយៈការទទួលយកស្ដង់ដា និងការអនុវត្តតាមអ្វីដែលកំណត់ដោយប្រទេសដែលមានសេដ្ឋកិច្ចរីកចម្រើនមួយចំនួន។

ដំណើរការចូលជាសមាជិកនៃអង្គការ OECD របស់ប្រទេសថៃនេះ បានចាប់ផ្តើមនៅមួយសប្តាហ៍បន្ទាប់ពីប្រទេសនេះបានក្លាយជាដៃគូរបស់ក្រុមប្រទេសក្នុងប្លុកប្រ៊ីក ដែលមានប្រទេសជាស្ថាបនិកចំនួន៥ រួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។

រដ្ឋមន្ត្រីរូបនេះ បានអះអាងថា ថៃចង់លើកកម្ពស់ប្រព័ន្ធអេកូឡូស៊ីរបស់ខ្លួនក្នុងទិដ្ឋភាពផ្សេងៗ ព្រោះថៃចង់ធ្វើឱ្យអាជីវកម្មរបស់ខ្លួនកាន់តែមានភាពប្រកួតប្រជែង និងមានវិជ្ជាជីវៈ ធ្វើឱ្យវិស័យសាធារណៈកាន់តែមានប្រសិទ្ធភាព និងតម្លាភាព ធ្វើឱ្យសេដ្ឋកិច្ចថៃ កាន់តែមានភាពធន់ និងនិរន្តរភាព និងធ្វើឱ្យកំណើនសេដ្ឋកិច្ចរបស់ថៃ កាន់តែរួមបញ្ចូលគ្នាផងដែរ។

ខុសពីលក្ខខណ្ឌក្នុងការចូលជាសមាជិករបស់ប្លុកប្រទេសប្រ៊ីក អង្គការ OECD តម្រូវឱ្យប្រទេសដែលដាក់ពាក្យសុំចូលជាសមាជិក ត្រូវធ្វើវិសោធនកម្មច្បាប់ និងបទប្បញ្ញត្តិលើវិស័យមួយចំនួនដូចជាការវិនិយោគ ការប្រកួតប្រជែង និងការប្រឆាំងអំពើពុករលួយជាដើម។ ជាក់ស្តែងនៅក្នុង១ទស្សវត្សរ៍មុន ប្រទេសមួយចំនួនដូចជាកូឡុំប៊ី និងកូស្តារីកា បានធ្វើកំណែទម្រង់ប្រព័ន្ធយុត្តិធម៌ និងច្បាប់ប្រកួតប្រជែងរបស់ពួកគេ ដើម្បីចូលរួមជាមួយអង្គការ OECD។

ប្រទេសឥណ្ឌូនេស៊ី ដែលមានទំហំសេដ្ឋកិច្ចធំជាងគេនៅតំបន់អាស៊ីអាគ្នេយ៍ ក៏គ្រោងនឹងចាប់   ផ្តើមដំណើរការចូលជាសមាជិកអង្គការ OECD ផងដែរ ហើយបានពន្យារពេលការចូលរួមជាមួយនឹងប្លុកប្រទេសប្រ៊ីក៕

អត្ថបទ៖ សុខ មង្គល