
នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រា បានប្រាប់អ្នកសារព័ត៌មានបន្ទាប់ពីជំនួបជាមួយនឹងសមភាគីឥណ្ឌាលោក ណារិនដ្រា ម៉ូឌី នៅវិមានរដ្ឋាភិបាលថៃកាលពីថ្ងៃទី៣ មេសា ថា ប្រទេសទាំងពីរបានយល់ព្រមដើរតួនាទីយ៉ាងសំខាន់ក្នុងការលើកកម្ពស់ការតភ្ជាប់រវាងតំបន់អាស៊ីខាងត្បូង និងអាស៊ីអាគ្នេយ៍ ដោយពួកគេមានបំណងបង្កើនល្បឿននៃការសាងសង់ផ្លូវល្បឿនលឿនប្រវែង១,៣០០គីឡូម៉ែត្រ ដែលនឹងចាប់ផ្តើមពីភាគឦសាននៃប្រទេសឥណ្ឌា និងឆ្លងកាត់ប្រទេសមីយ៉ាន់ម៉ាបន្តដល់ភាគខាងជើងប្រទេសថៃ។
លោកស្រី ផែថងថាន បាននិយាយថា ប្រទេសថៃក៏បានដាក់ចេញផងដែរនូវគម្រោងស្ពានដ៏សំខាន់របស់ខ្លួន ដែលតភ្ជាប់មហាសមុទ្រប៉ាស៊ីហ្វិក និងមហាសមុទ្រឥណ្ឌា ដែលជាផ្លូវដឹកជញ្ជូនថ្មីមួយ ហើយរដ្ឋបាលរបស់លោកស្រីបានស្នើឱ្យមានកិច្ចពិភាក្សា ដើម្បីធ្វើវិសោធនកម្មកិច្ចព្រមព្រៀងពាណិជ្ជកម្មសេរីរបស់ឥណ្ឌាជាមួយនឹងប្រទេសថៃ និងអាស៊ាន ដើម្បីជំរុញពាណិជ្ជកម្ម និងការវិនិយោគទ្វេភាគីបន្ថែមទៀត។
ជំនួបរបស់មេដឹកនាំទាំងពីរនេះធ្វើឡើងក្នុងអំឡុងពេលលោក ម៉ូឌី មកបំពេញទស្សនកិច្ចនៅទីក្រុងបាងកកជាលើកដំបូងក្នុងនាមជាមេដឹកនាំឥណ្ឌា សម្រាប់កិច្ចប្រជុំកំពូលប៊ីមស្តេក (Bimstec) ដែលបានចាប់ផ្ដើមកាលពីថ្ងៃសុក្រ ដោយមានការចូលរួមពីក្រុមមេដឹកនាំមួយចំនួនទៀតដូចជាមីយ៉ាន់ម៉ា នេប៉ាល់ ប៊ូតាន បង់ក្លាដែស និងស្រីលង្កា។
សូមរំលឹកថា កិច្ចប្រជុំកំពូល Bimstec ជាគំនិតផ្តួចផ្តើមឈូងសមុទ្របេនហ្កាល់សម្រាប់កិច្ចសហប្រតិបត្តិការបច្ចេកទេស និងសេដ្ឋកិច្ចពហុវិស័យ។ កិច្ចប្រជុំកំពូលនេះត្រូវបានគេរំពឹងថានឹងអនុម័តសេចក្តីប្រកាសកិច្ចប្រជុំកំពូលរួមមួយ៕
អត្ថបទ៖ សុខ មង្គល