ការព្យាករកំណើនសេដ្ឋកិច្ចថៃ ឆ្នាំ២០២៥ ត្រូវបានទម្លាក់មកនៅត្រឹម១,៥% ស្របពេលនយោបាយថៃ កំពុងជ្រួលច្របល់

ធនាគារ Siam Commercial Bank បានលើកឡើងថា សេដ្ឋកិច្ចថៃ ប្រឈមនឹងការធ្លាក់ចូលក្នុងវិបត្តិនៅឆមាសទី២ ឆ្នាំ២០២៥ ដោយវិស័យទេសចរណ៍កំពុងបាត់បង់សម្ទុះកំណើន ការនាំចេញមានសម្ទុះយឺត ហើយការចំណាយរបស់អតិថិជនជាអ្នកប្រើប្រាស់ធ្លាក់ចុះដោយសារក្ដីបារម្ភអំពីការបាត់បង់ការងារ និងប្រាក់ចំណូលធ្លាក់ចុះ ហើយបំណុលគ្រួសារខ្ពស់ និងកំណើនឥណទានយឺតដាក់សម្ពាធលើសេដ្ឋកិច្ចថៃ កាន់តែខ្លាំង។

ធនាគារនេះ រំពឹងថា ធនាគារកណ្ដាលថៃ នឹងបញ្ចុះអត្រាការប្រាក់ចំនួនពីរលើកនៅឆ្នាំនេះដើម្បីគាំទ្រដល់ការងើបឡើងវិញនៃសេដ្ឋកិច្ច ប៉ុន្តែទន្ទឹមនេះ បានព្រមានថា អត្រាការប្រាក់ទាបប្រហែលជាមិនអាចជំរុញការចាយវាយរបស់អ្នកប្រើប្រាស់បានច្រើនទេ ដោយសារភាពជឿជាក់ផុយស្រួយ។

វិស័យសំខាន់ៗដែលស្ថិតក្រោមភាពតានតឹងរួមមានការនាំចេញ អចលនទ្រព្យ និងវិស័យរថយន្ត។ តាមការព្យាករ លុយបាតនឹងហក់ឡើងថ្លៃបន្តិចដល់៣១,៥បាត ទៅ៣២,៥បាតក្នុងមួយដុល្លារអាម៉េរិក នៅត្រឹមដំណាច់ឆ្នាំ២០២៥។ ទន្ទឹមនេះកំណើនសេដ្ឋកិច្ចពិភពលោក ក៏ត្រូវបានព្យាករថា នឹងធ្លាក់ចុះមកត្រឹម២,៣% នៅឆ្នាំ២០២៥។

ធនាគារ Siam Commercial Bank បានជំរុញឱ្យរដ្ឋាភិបាលថៃ មានយុទ្ធសាស្រ្តដែលមានភាពបត់បែន និងការប្រកួតប្រជែងរយៈពេលវែង ស្របពេលដែលប្រទេសថៃ កំពុងស្ថិតក្នុងភាពមិនប្រាកដប្រជានៃសេដ្ឋកិច្ច និងចលាចលនយោបាយ៕

ដោយ: តែម សុខុម