បំណុលពលរដ្ឋ គឺជាកង្វល់ដ៏ធំមួយដែលក្រុមអ្នកបង្កើតគោលនយោបាយបាយថៃ បារម្ភខ្លាចវាក្លាយទៅជាគ្រាប់បែកកំណត់ពេលដ៏គ្រោះថ្នាក់សម្រាប់សេដ្ឋកិច្ចជាតិ ទាំងមូល។ លោក ផនឆៃ ធីរ៉ាវេចា (PornchaiThiraveja) អគ្គនាយកនៃការិយាល័យគោលនយោបាយសារពើពន្ធរបស់ថៃ បានទម្លាយឱ្យដឹងថា គិតត្រឹមត្រីមាសទី២ ឆ្នាំ២០២៤ បំណុលពលរដ្ឋថៃ មានទំហំស្មើនឹង៨៩,៦%នៃផលិតផលក្នុងស្រុកសរុប។
ទោះបីធ្លាក់ចុះបន្តិចបើធៀបនឹងអត្រា៩០,៧% នៅក្នុងត្រីមាសទី១ ឆ្នាំនេះយ៉ាងណាក្ដី ក៏បំណុលពលរដ្ឋថៃ នៅតែខ្ពស់លើសពីកម្រិត ដែលត្រូវបានណែនាំដើម្បីបញ្ចៀសហានិភ័យសេដ្ឋកិច្ច។
ធនាគារសម្រាប់ការទូទាត់ជាអន្តរជាតិ ហៅកាត់ថា BIS ជាស្ថាប័នហិរញ្ញវត្ថុអន្តរជាតិ ដែលជួយលើកកម្ពស់ស្ថិរភាពរូបិយវត្ថុ និងហិរញ្ញវត្ថុបានរកឃើញថា នៅពេលដែលបំណុលពលរដ្ឋកើនលើសកម្រិតណែនាំជាក់លាក់មួយបែបនេះ ចង់ ឬមិនចង់វានឹងជះផលប៉ះពាល់ជាអវិជ្ជមានដល់កំណើនសេដ្ឋកិច្ចរយៈពេលវែង។
ទន្ទឹមនេះក្រសួងហិរញ្ញវត្ថុថៃ និងធនាគារកណ្ដាលថៃ បានជំរុញឱ្យចាត់វិធានការដោះស្រាយវិបត្តិបំណុលពរដ្ឋជាបន្ទាន់ ដែលបានឈានទៅដល់ការដាក់ចេញកម្មវិធីមួយដែលអនុញ្ញាតឱ្យពលរដ្ឋជាកូនបំណុលផ្អាកបង់ការប្រាក់រយៈពេល៣ឆ្នាំ ដោយទុកឱ្យរដ្ឋាភិបាលជាអ្នករ៉ាប់រងការប្រាក់ជំនួស សំដៅសម្រាលការលំបាករបស់ពលរដ្ឋបានមួយគ្រាធំ៕
ដោយ: តែម សុខុម
