ប្រធានសហព័ន្ធឧស្សាហកម្មថៃ លោក ក្រៀងក្រៃ ធៀននូគុល (Kriengkrai Thiennukul) បានព្រមានថា វិធានការពាក់ព័ន្ធនឹងការបើក និងបិទច្រកព្រំដែនថៃ-កម្ពុជា តាមកាលវិភាគរបស់យោធានឹងធ្វើឱ្យមានការរំខានដល់ការដឹកជញ្ជូនទំនិញឆ្លងកាត់ព្រំដែន ខណៈដែលសមាជិកសហព័ន្ធឧស្សាហកម្មថៃមួយចំនួនបានចាប់ផ្តើមរងផលប៉ះពាល់រួចទៅហើយ ទោះបច្ចុប្បន្នវាមិនអាចវាយតម្លៃពីទំហំនៃការខូចខាតបានយ៉ាងណាក៏ដោយ។
លោក ក្រៀងក្រៃ បានពន្យល់ថា ពាណិជ្ជកម្មតាមព្រំដែនរបស់ប្រទេសថៃ ជាមួយនឹងកម្ពុជា មានតម្លៃប្រមាណ១៧០ពាន់លានបាតប្រហែលជាង៥ពាន់លានដុល្លារក្នុងមួយឆ្នាំ ដោយច្រកព្រំដែនអារញ្ញប្រាថេត (Aranyaprathet) នៅខេត្តស្រះកែវ បានធ្វើពាណិជ្ជកម្មឆ្លងដែនច្រើនជាងគេបំផុត ដែលស្មើនឹងប្រមាណជាង៣ពាន់លានដុល្លារ ឬប្រហែល៦៤%នៃទំហំពាណិជ្ជកម្មសរុប។
ប្រធានសហព័ន្ធរូបនេះបានបន្តថា នៅពេលនេះគេមិនទាន់អាចវាយតម្លៃពីផលប៉ះពាល់ទាំងស្រុងបាននៅឡើយ ប៉ុន្តែប្រសិនបើគេគណនាដោយផ្អែកលើតម្លៃនាំចេញសរុបប្រចាំថ្ងៃ វានឹងមានប្រហែលជាង១៥លានដុល្លារក្នុងមួយថ្ងៃ។ លោកបានបញ្ជាក់ថា វាមិនមែនមានន័យថា វារងផលប៉ះពាល់ក្នុងតម្លៃទាំងអស់នេះទេ ពោលគឺវាប៉ះពាល់តែមួយផ្នែកប៉ុណ្ណោះ ដូច្នេះហើយពួកគេអាចនិយាយបានថា វាបានប៉ះពាល់ខ្លះៗដែរ។
លោកបានទទួលស្គាល់ថា ពិតណាស់វិវាទព្រំដែននេះនឹងធ្វើឱ្យទាំងថៃ និងកម្ពុជា រងផលប៉ះពាល់ដូចគ្នា ខណៈប្រទេសថៃ មានអតិរេកពាណិជ្ជកម្មពីការនាំចេញទំនិញប្រើប្រាស់ ប្រេងឥន្ធនៈ គ្រឿងចក្រ និងម៉ាស៊ីនដែលនឹងរងផលប៉ះពាល់។ ប៉ុន្តែគ្មាននរណាម្នាក់ចង់ឱ្យរឿងនេះកើតឡើងទេ ហើយនៅពេលវាកើតឡើង ប្រទេសថៃ ត្រូវតែបិទព្រំដែនជាបណ្តោះអាសន្ន ដើម្បីសម្រួលដល់ការចរចា។
ទោះយ៉ាងណាលោក ក្រៀងក្រៃ សង្ឃឹមថា កិច្ចពិភាក្សាក្នុងពេលខាងមុខនឹងផ្តល់លទ្ធផលល្អ ដោយមានការយោគយល់គ្នាទៅវិញទៅមក ដែលអនុញ្ញាតឱ្យច្រកព្រំដែនវិលទៅរកប្រក្រតីភាពឡើងវិញ ដើម្បីឱ្យភាគីទាំងពីរអាចបន្តពាណិជ្ជកម្មឡើងវិញដោយគ្មានការរំខានថែមទៀតព្រោះថា ការពន្យារពេលកាន់តែយូរ ផលប៉ះពាល់ក៏នឹងមានកាន់តែខ្លាំងផងដែរ៕
ដោយ៖ សុខ មង្គល
