អ្នកជំនាញជឿជាក់ថា វិស័យធានារ៉ាប់រងនឹងបន្តមានកំណើនល្អប្រសើរបន្ថែមទៀតនៅឆ្នាំ២០២២ នេះ ទោះបីបច្ចុប្បន្នកម្ពុជាកំពុងទទួលរងនូវការឆ្លងរាលដាលនៃជំងឹកូវីដ-១៩ ប្រភេទអូមីក្រុង។
ទោះបីពិភពលោករួមទាំងកម្ពុជាបានញាំញីដោយវិបត្តិកូវីដ-១៩ តែវាមិនបានធ្វើឲ្យប៉ះពាល់ធ្ងន់ធ្ងរដល់ឧស្សាហកម្មធានារ៉ាប់រងនកម្ពុជានោះទេ ពោលគឺវិស័យនេះនៅតែអាចឈរជើងបានយ៉ាងរឹងមាំជាមួយកំណើនប្រាក់សន្សុំ ឬបុព្វលាភគួរឲ្យកត់សម្គាល់។ ជាក់ស្តែងបើតាមឯកឧត្តម ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា កាលពីឆ្នាំ២០២១ កន្លងទៅ បុព្វលាភក្នុងវិស័យនេះមានទំហំជាង២៩៣លានដុល្លារអាមេរិកកើនឡើង៩,៥% បើធៀបនឹងទំហំបុព្វលាភកាលពីឆ្នាំ២០២០។
កំណើនបុព្វលាភធានារ៉ាប់រងឆ្នាំ២០២១នេះមានការចូលរួមចំណែកពីវិស័យធានារ៉ាប់រងទូទៅជិត១២៣លានដុល្លារអាមេរិក និងវិស័យធានារ៉ាប់រងអាយុជីវិតប្រមាណ១៧០លានដុល្លារអាមេរិក។ ឯកឧត្តម ប៊ូ ច័ន្ធភីរូ បានគូសបញ្ជាក់ថា វិស័យធានារ៉ាប់រងដែលជាវិស័យហិរញ្ញវត្ថុមិនមែនធនាគារបាននិងកំពុងដើរយ៉ាងសំខាន់ក្នុងការជួយគាំទ្រវិស័យសង្គមកិច្ច និងជំរុញកំណើនសេដ្ឋកិច្ចកម្ពុជា។ ជាក់ស្តែងកាលពីឆ្នាំ២០២១ វិស័យនេះបានចូលរួមចំណែកអភិវឌ្ឍន៍សេដ្ឋកិច្ចកម្ពុជា១,១% នៃផលិតផលក្នុងស្រុកសរុបរបស់កម្ពុជា។
ជាមួយគ្នានេះលោក ជៀប សុភ័ក្រ នាយកប្រតិបត្តិចែកចាយរបស់ក្រុមហ៊ុនធានារ៉ាប់រង ហ្វតតេឡាយហ្វ៍កត់សម្គាល់ឃើញថា ទោះបីទីផ្សារធានារ៉ាប់រងអាយុជីវិតទើបចាប់កំណើតបានជិត១០ឆ្នាំនៅកម្ពុជា តែវិស័យនេះទទួលបានការគាំទ្រនិងរីកចម្រើនគួរឲ្យកត់សម្គាល់នៅរយៈពេល៥ឆ្នាំកន្លងមកនេះ។ ជាក់ស្តែងនៅឆ្នាំ២០២១ កន្លងទៅបុព្វលាភធានារ៉ាប់រងអាយុជីវិតកើនឡើងដល់ប្រមាណ១៧០លានដុល្លារអាមេរិក កើនឡើងជាង១០% បើធៀបនឹងឆ្នាំ២០២០ ដែលមានបុព្វលាភសរុបត្រឹមតែប្រមាណ១៥២លានដុល្លារអាមេរិក។
អត្ថបទគួរអាន
សម្រាប់លោក ជៀប សុភ័ក្រ ក្នុងវិបត្តិតែងតែមានឱកាស។ ជាក់ស្តែងវិបត្តិកូវីដ-១៩ កន្លងបានជំរុញឲ្យក្រុមហ៊ុនធានារ៉ាប់រងនៅកម្ពុជា ពិសេសក្រុមហ៊ុនហ្វតតេឡាយហ្វ៍ បានអភិវឌ្ឍន៍តាមរយៈការធ្វើទំនើបកម្មលើផលិតផលនិងសេវានានាក្នុងការបម្រើអតិថិជនឲ្យកាន់តែល្អប្រសើរ។ កត្តានេះបានធ្វើឲ្យលោកមានការរំពឹងខ្ពស់ថា ហ្វតតេឡាយហ្វ៍ នឹងអាចកៀរគរប្រាក់សន្សំយ៉ាងណាស់១លាន៥សែនដុល្លារនៅឆ្នាំ២០២២ ទោះបីបច្ចុប្បន្នមេរោគកូវីដ-១៩ កំពុងអុកឡុកក៏ដោយ។
ពាក់ព័ន្ធវិស័យធានារ៉ាប់រងនេះដែរ លោក ឆយ គីមស្រេន ប្រធានអាជីវកម្មនៃក្រុមហ៊ុនហ្វតតេឡាយហ្វ៍ ម្ចាស់ជ័យលាភីប្រធានអាជីវកម្មឆ្នើមប្រចាំឆ្នាំ២០២១ បានគូសបញ្ជាក់ថា វិស័យធានារ៉ាប់រងនៅកម្ពុជាហាក់នៅក្មេងខ្ចីបើធៀបបណ្តាប្រទេសជឿលឿនលើពិភពលោក។ កត្តានេះបានធ្វើឲ្យបុគ្គលិកធ្វើការក្នុងវិស័យនេះជួបការលំបាកក្នុងការស្វែងរកអតិថិជន ដោយសារការយល់ដឹងលើវិស័យនេះរបស់ប្រជាជនកម្ពុជានៅមានកម្រិត ដែលទាមទារឲ្យបុគ្គលិកមានការអត់ធ្មត់ និងព្យាយាមខ្ពស់។
ជាមួយគ្នានេះ លោក Alex Lee ប្រធាននាយកប្រតិបត្តិក្រុមហ៊ុនធានារ៉ាប់រងអាយុជីវិត ហ្វតតេ ឡាយហ្វ៍ បានកត់សម្គាល់ឃើញថា ប្រជាជនខ្មែរភាគច្រើនមិនបានយល់ដឹងលម្អិតអំពីអត្ថប្រយោជន៍របស់សេវាធានារ៉ាប់រងអាយុជីវិតនោះទេ ហើយពួកគេគិតថា សេវាធានារ៉ាប់រងអាយុជីវិតមានលក្ខណៈស្មុគស្មាញ និងពិបាកយល់។
លោក យក់ ចំរើនឫទ្ធិ ប្រធានក្រុមប្រឹក្សាភិបាលនៃក្រុមហ៊ុនហ្វតតេ ឡាយហ្វ៍ ធ្លាប់បានអះអាងកន្លងមកថា ចំនួនអ្នកទិញធានារ៉ាប់រងនៅកម្ពុជានៅមានចំនួនតិចតួចនៅឡើយ បើធៀបនឹងបណ្តាប្រទេសមួយចំនួនក្នុងតំបន់។ ពាក់ព័ន្ធបញ្ហានេះលោកវាយតម្លៃថា គឺដោយសារប្រជាពលរដ្ឋកម្ពុជាហាក់មិនទាន់សូវចាប់អារម្មណ៍លើវិស័យធានារ៉ាប់រង ព្រោះកត្តាជីវភាព និងការយល់ដឹងរបស់ពួកគេក្នុងវិស័យនេះនៅមានកម្រិត។ អ្នកជំនាញរូបនេះបន្តថា ទំហំចំណូលដែលទទួលបានពីវិស័យធានារ៉ាប់រងទាំងមូលមានប្រមាណ ០,៥% ប៉ុណ្ណោះ នៃផលិតផលក្នុងស្រុកសរុបរបស់កម្ពុជា។
គួរបញ្ជាក់ថា ក្រុមហ៊ុនធានារ៉ាប់រងដែលកំពុងប្រតិបត្តិការនៅកម្ពុជារួមមានក្រុមហ៊ុនធានារ៉ាប់រងទូទៅចំនួន១៨ ក្រុមហ៊ុនធានារ៉ាប់រងអាយុជីវិតចំនួន១៤ ក្រុមហ៊ុនធានារ៉ាប់រងខ្នាតតូចចំនួន៧ និងក្រុមហ៊ុនធានារ៉ាប់រងបន្តចំនួន១៕
None
