អ្នកនាំពាក្យក្រសួងពាណិជ្ជកម្ម និងអ្នកជំនាញសេដ្ឋកិច្ច បានអះអាងថា បើទោះបីជា ពាណិជ្ជកម្មរវាងកម្ពុជាមានតិចតួចក៏ពិតមែន ប៉ុន្ដែ ចង់ ឬមិនចង់កម្ពុជាក៏ត្រូវត្រៀមខ្លួនដើម្បីទប់ទល់នឹងផលប៉ះពាល់ដែលអាចកើតឡើងពីវិបត្តិនេះសង្គ្រាមនៅអឺរ៉ុបនេះផងដែរ។
ឯកឧត្តម ស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម កម្ពុជា បានគូសបញ្ជាក់ថា ការផ្ទុះសង្គ្រាមរវាងប្រទេសរុស្ស៊ី និងអ៊ុយក្រែន នឹងបង្កឲ្យមានផលប៉ះពាល់ដល់ការធ្វើពាណិជ្ជកម្មរវាងកម្ពុជា-រុស្សី បើទោះបីជាទំហំពាណិជ្ជកម្មរវាងប្រទេសទាំងពីរនៅមានទំហំតិចតួចក៏ដោយចុះ។ យោងតាមរបាយការណ៍របស់ក្រសួងពាណិជ្ជកម្ម នៅឆ្នាំ២០២១ ការធ្វើពាណិជ្ជកម្មទ្វេភាគីរវាងកម្ពុជា-រុស្សី មានទំហំទឹកប្រាក់សរុបប្រមាណត្រឹមតែ ៩៤លានដុល្លារប៉ុណ្ណោះ។ ក្នុងនោះ កម្ពុជា បាននាំចេញទៅប្រទេសរុស្សី ក្នុងបរិមាណជាង ៥៩លានដុល្លារ ខណៈទំនិញដែលកម្ពុជាបាននាំចូលពីរុស្សី មានជាង៣៤លានដុល្លារ។
អត្ថបទគួរអាន
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានកត់សម្គាល់ឃើញថា សព្វថ្ងៃ ភាពតានតឹងនៃបញ្ហាសមុទ្រចិនខាងត្បូង មិនទាន់មានភាពធូរស្បើយផង រួមទាំងការផ្ទុះឡើងនូវសង្គ្រាមរុស្សី-អ៊ុយក្រែនថ្មីៗនេះទៀត គឺសុទ្ធតែបានជះឥទ្ធិពលអាក្រក់ដល់បណ្ដាប្រទេសទាំងតូច និងធំជុំវិញពិភពលោក ដោយរួមទាំងកម្ពុជា ផងដែរ។ ពិសេសឥទ្ធិពលនៃសង្គ្រាមនេះ បានធ្វើឲ្យប៉ះពាល់យ៉ាងធ្ងន់ធ្ងរដល់តម្លៃប្រេងឆៅ និងទំនិញមានការឡើងថ្លៃខ្ពស់ទៅៗ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ថ្មីៗនេះក៏បានលើកឡើងដែរ សង្គ្រាមរវាងអ៊ុយក្រែន និងរុស្ស៊ី ពេលនេះ គឺកំពុងក្លាយជាសង្គ្រាមរុស្ស៊ីជាមួយនឹងតំបន់អឺរ៉ុបទាំងមូលហើយ ដ្បិតថា ប្រទេសអឺរ៉ុប បានផ្ដល់ជំនួយទាំងលុយកាក់ អាវុធ និងបញ្ជូនមនុស្សឲ្យជួយអ៊ុយក្រែន ដើម្បីប្រយុទ្ធទប់ទល់រុស្ស៊ី។ បើតាម សម្ដេច ហ៊ុន សែន សង្គ្រាមនេះ គឺមិនអាចបញ្ចប់ដោយការធ្វើសង្គ្រាមនោះទេ គឺមានតែការចរចគ្នាដោយសន្ដិវិធីប៉ុណ្ណោះ ទើបអាចឈានទៅបញ្ចប់សង្គ្រាមនេះបាន។
សូមបញ្ជាក់ថា គិតមកដល់ពេលនេះសង្គ្រាមរុស្ស៊ីឈ្លានពានអ៊ុយក្រែន បានបន្តអូសបន្លាយជាង១០ថ្ងៃហើយ ដែលធ្វើឲ្យពលរដ្ឋអ៊ុយក្រែនជាង១លាន៥សែនបានរត់ភៀសខ្លួនស្វែងរកសិទ្ធិជ្រកកោនទៅប្រទេសជិតខាង និងជនស៊ីវិលច្រើននាក់បានបាត់បង់ជីវិត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
