ឯកឧត្ដមបណ្ឌិត យ៉េត វីណែល អនុរដ្ឋលេខាធិការ នៃក្រសួងសេដ្ឋកិច្ចនិងហិរញ្ញវត្ថុ (កសហវ.) និងជាអគ្គលេខាធិការរង នៃអគ្គលេខាធិការដ្ឋានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (អ.គ.ហ.) តំណាងដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និង ឯកឧត្ដម រស់ សីលវ៉ារដ្ឋលេខាធិការ នៃ កសហវ. និងជាអគ្គលេខាធិការ នៃ អ.គ.ហ., អមដោយ ឯកឧត្ដម អ៊ុំ យុទ្ធី នាយករដ្ឋបាល ហិរញ្ញវត្ថុ និងត្រួតពិនិត្យនិងវាយតម្លៃ និងមន្ត្រីជំនាញជាន់ខ្ពស់ និងមន្ត្រីជំនាញ នៃ អ.គ.ហ. បានរៀបចំកិច្ចប្រជុំបិទបញ្ចប់បេសកកម្មប្រមូលធាតុចូលសម្រាប់ការរៀបចំរបាយការណ៍វឌ្ឍនភាពប្រចាំឆ្នាំ២០២៥ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ជាមួយមូលនិធិរូបិយវត្ថុអន្តរជាតិ (IMF)។ កិច្ចប្រជុំនេះ ក៏មានការចូលរួមពីតំណាងក្រុមប្រឹក្សាបច្ចេកវិទ្យាព័ត៌មាន នៃ កសហវ., អគ្គនាយកដ្ឋានថវិកា, អគ្គនាយកដ្ឋានរតនាគារជាតិ, និង អគ្គ-នាយកដ្ឋានបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ នៃ កសហវ. ផងដែរ។
អនុលោមទៅតាមសារាចររាជរដ្ឋាភិបាលលេខ ១៤ សរ ចុះថ្ងៃទី១៩ ខែធ្នូ ឆ្នាំ២០២៤, អ .គ.ហ. ដែលជាសេនាធិការរបស់គណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (គ.ហ.ស.) ត្រូវរៀបចំរបាយការណ៍វឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ប្រចាំឆ្នាំ ដើម្បីដាក់ឆ្លង គ.ហ.ស. ពិនិត្យ និងសម្រេច។ គួរបញ្ជាក់ផងដែរថា កម្មវិធីកែទម្រង់ការគ្រប់គ្រងហិរញ្ញវត្ថុសា-ធារណៈ ជាកម្មវិធីកែទម្រង់ស្នូលមួយរបស់រាជរដ្ឋាបាល ដែលក្នុងនោះ រាជរដ្ឋាភិបាលនីតិកាលទី៧ នៃរដ្ឋសភា បានបន្ដផ្ដល់អាទិភាព និងចាត់ទុកភាពធន់ នៃប្រព័ន្ធហិរញ្ញវត្ថុសាធារណៈជាឆ្អឹងខ្នង នៃការអនុវត្តរបៀបវារៈគោលនយោបាយ ដែលត្រូវបានដាក់ចេញក្នុងយុទ្ធសាស្រ្ដបញ្ចកោណ ដំណាក់កាលទី១ ប្រកបដោយគណ-នេយ្យ ភាព បរិយាប័ន្ន និងប្រកបដោយប្រសិទ្ធភាព។
ដើម្បីជាធាតុចូលក្នុងរបាយការណ៍វឌ្ឍនភាពនេះ អ.គ.ហ. បានសហការជាមួយ IMF សិក្សាអំពីវិធីក្នុងការពង្រឹងការអនុវត្តថវិកា ដោយផ្ដោតទៅលើទិដ្ឋភាពសំខាន់ៗចំនួន ៤ រួមមាន (១) ការជំរុញឌីជីថលនី-យកម្មតាមក្រសួង ស្ថាប័ន ជាពិសេសការអនុវត្តនីតិវិធីការងារតាមប្រព័ន្ធបច្ចេកវិទ្យាព័ត៌មានសម្រាប់ការគ្រប់-គ្រងហិរញ្ញវត្ថុសាធារណៈ (FMIS), (២) ការគ្រប់គ្រងសាច់ប្រាក់, (៣) ការគ្រប់គ្រងចំណាយកកស្ទះ, និង (៤) ការបិទបញ្ជីហិរញ្ញវត្ថុប្រចាំឆ្នាំ។
ក្នុងកិច្ចប្រជុំនេះ ឯកឧត្ដមបណ្ឌិត យ៉េត វីណែល បានគូសរំលេចបន្ថែមពីសារៈសំខាន់ នៃការ-ប្រើប្រាស់ប្រព័ន្ធបច្ចេកវិទ្យាព័ត៌មាន ដើម្បីពង្រឹងការអនុវត្តថវិកានៅតាមក្រសួង ស្ថាប័ន ជាពិសេសក្នុងបរិការណ៍ នៃការប្រែប្រួលយ៉ាងឆាប់រហ័ស នៃសង្គម-សេដ្ឋកិច្ច និងភូមិសាស្រ្ដនយោបាលសកល។ ប្រព័ន្ធបច្ចេកវិទ្យា មិនត្រឹមជួយពន្លឿននីតិវិធីអនុវត្តការងារប៉ុណ្ណោះទេ ថែមទាំងផ្ដល់ព័ត៌មានហិរញ្ញវត្ថុចុងក្រោយទាន់ពេលវេលា ដើម្បីជាមូលដ្ឋានសម្រាប់ថ្នាក់ដឹកនាំសម្រេចចិត្ត ផងដែរ។
ជាចុងបញ្ចប់ ឯកឧត្ដមបណ្ឌិត យ៉េត វីណែល បានវាយតម្លៃខ្ពស់ និងថ្លែងអំណរគុណដល់គ្រប់អង្គភាពពាក់ព័ន្ធ ដែលបានផ្ដល់កិច្ចសហការដល់ អ.គ.ហ. និងជំនាញការ IMF ក្នុងការចុះប្រមូលទិន្នន័យ ដែលមានលក្ខណៈគ្រប់ជ្រុងជ្រោយ ពេញលេញ និងមានសង្គតិភាព។
