រដូវវស្សាទូទាំងប្រទេសឆ្នាំ២០២២នឹងចាប់ផ្តើមពីថ្ងៃទី១៥ខែឧសភាតទៅ

រដូវវស្សាជារួមទូទាំងប្រទេសសម្រាប់ឆ្នាំ២០២២ នឹងចាប់ផ្តើមនៅថ្ងៃទី១៥ ខែឧសភាខាងមុខនេះតទៅ។ ទន្ទឹមនឹងនោះកម្ពុជានឹងទទួលរងឥទ្ធិពលពីខ្យល់មូសុងនិរតីចាប់ពីថ្ងៃទី១១ ដល់ថ្ងៃទី១៧ ខែឧសភា ឆ្នាំ២០២២។ ប្រការនេះអាចបណ្តាលឲ្យមានភ្លៀងធ្លាក់ក្នុងកម្រិតពីតិចទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់ ដោយតំបន់ខ្លះអាចមានភ្លៀងធ្លាក់ខ្លាំង។ នេះបើផ្អែកតាមក្រសួងធនធានទឹក និងឧតុនិយម ចេញសេចក្តីជូនដំណឹងស្តីពីស្ថានភាពធាតុអាកាស ក្នុងអំឡុងមួយសប្តាហ៍ខាងមុខនេះ។

មេឃផ្តើមធ្លាក់ភ្លៀងក្នុងរាជធានីភ្នំពេញ រូបភាព៖ ខេមបូណូមីស

សេចក្តីប្រកាសព័ត៌មានដែលចេញផ្សាយនៅថ្ងៃទី១០ខែឧសភា ឲ្យដឹងទៀតថា ស្ថានភាពបែបនេះនឹងធ្វើឲ្យនៅបណ្តាខេត្តនៅតំបន់វាលទំនាបកណ្តាលមានសីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ៣៤-៣៦ °C។ ក្នុងនោះអាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំទៅដោយផ្គរ រន្ទះ និងខ្យល់កន្ត្រាក់។ ដោយឡែក តំបន់ខ្លះក៏អាចមានភ្លៀងខ្លាំងផងដែរ។

ចំពោះនៅតំបន់ខ្ពង់រាប អាចមានសីតុណ្ហភាពអប្បបរមា មានពី ២៣-២៥ °C និងសីតុណ្ហភាពអតិបរមា មានពី៣៣-៣៥ °C និងអាចមានភ្លៀងធ្លាក់ក្នុងកម្រិតពីតិចទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។

ចំណែកនៅតំបន់មាត់សមុទ្រមានសីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ៣៣-៣៥ °C និងអាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំទៅដោយផ្គរ រន្ទះ និងខ្យល់កន្ត្រាក់៕