តើមានកត្តាអ្វីជំរុញឱ្យធនាគារពិភពលោកព្យាករថា សេដ្ឋកិច្ចហ្វីលីពីននឹងលូតលាស់លឿនបំផុតទី២នៅអាស៊ានឆ្នាំនេះ?

តាមរយៈរបាយការណ៍របស់ខ្លួនដែលមានឈ្មោះថា ទស្សនវិស័យសេដ្ឋកិច្ចពិភពលោកប្រចាំឆ្នាំ២០២៥ ធនាគារពិភពលោកបានព្យាករថា ហ្វីលីពីននឹងក្លាយជាសេដ្ឋកិច្ចដែលមានកំណើនលឿនបំផុតទី២នៅតំបន់អាស៊ាន ជាមួយនឹងកំណើន៦,១% តាមពីក្រោយដោយវៀតណាម ដែលត្រូវបានព្យាករថា នឹងសម្រេចបានកំណើន៦,៦% ក្នុងឆ្នាំ២០២៥ នេះ។

លើកលែងតែប្រទេសវៀតណាម មួយចេញ ប្រទេសហ្វីលីពីន វ៉ាដាច់ប្រទេសជាច្រើនផ្សេងទៀតនៅក្នុងតំបន់អាស៊ាន បើធៀបនឹងកំណើនរបស់កម្ពុជា ក្នុងរង្វង់៥,៥% ឥណ្ឌូនេស៊ីក្នុងរង្វង់៥,១% និងម៉ាឡេស៊ីក្នុងរង្វង់៤,៥% ហើយការព្យាកររបស់ធនាគារពិភពលោកនេះ គឺស្របគ្នាទៅនឹងគោលដៅកំណើនសេដ្ឋកិច្ចរបស់រដ្ឋាភិបាលហ្វីលីពីន ដែលបានកំណត់ចន្លោះពី៦% ទៅ៨% សម្រាប់ឆ្នាំ២០២៥ នេះ។

ចាប់ពីខែមករា ដល់ខែកញ្ញា ឆ្នាំ២០២៤ សេដ្ឋកិច្ចហ្វីលីពីន សម្រេចបានកំណើនជាមធ្យម៥,៨% ដែលជំរុញដោយតម្រូវការប្រើប្រាស់ក្នុងស្រុកដ៏រឹងមាំ ហើយនោះក៏ដោយសារតែទីផ្សារការងាររឹងមាំ និងអតិផរណាទាប ដែលកត្តាទាំងអស់នេះត្រូវបានព្យាករថា នឹងអាចរក្សាបានសន្ទុះកំណើននេះនៅឆ្នាំ២០២៥ នេះ។

ធនាគារពិភពលោក បានគូសបញ្ជាក់ថា កំណើននៅក្នុងតំបន់អាស៊ីបូព៌ា និងប៉ាស៊ីហ្វិក នឹងត្រូវបានជំរុញដោយកំណើនតម្រូវការក្នុងស្រុក ដោយតម្រូវការប្រើប្រាស់ឯកជននឹងកើនឡើងដោយសារតែអតិផរណាទាប និងទីផ្សារការងាររឹងមាំ។ ទោះជាយ៉ាងណា ហានិភ័យដូចជាភាពតានតឹងពាណិជ្ជកម្មពិភពលោក កំណើនយឺតនៅក្នុងបណ្ដាសេដ្ឋកិច្ចធំៗដូចជាប្រទេសចិនជាដើម និងបញ្ហាប្រឈមនានាទាក់ទងនឹងអាកាសធាតុ គឺនៅតែមាន៕

ដោយ: តែម សុខុម