ក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុនមូលបត្រ ភីភីលីង បានគូសបញ្ជាក់ថា តម្លៃមាសនៅកម្ពុជា និងនៅលើទីផ្សារអន្តរជាតិបានធ្លាក់ចុះគួរឱ្យកត់សម្គាល់នៅមួយសប្តាហ៍ចុងក្រោយនេះ។ ជាក់ស្តែងនៅព្រឹកថ្ងៃទី២ ខែឧសភា ឆ្នាំ២០២៥ នេះ មាសនៅលើទីផ្សារអន្តរជាតិត្រូវបានជួញដូរក្នុងតម្លៃ៣,២៥៧ដុល្លារក្នុង១អោន ឬប្រមាណ៣,៩២៤ដុល្លារក្នុង១តម្លឹងនៅទីផ្សារប្រទេសកម្ពុជា ដែលបានធ្លាក់ចុះពីតម្លៃ៣,៣៧០ដុល្លារក្នុង១អោន ដែលត្រូវបានជួញដូរលើទីផ្សារអន្តរជាតិ ឬស្មើប្រមាណជាង៤,០៦០ដុល្លារក្នុង១តម្លឹងនៅលើទីផ្សារកម្ពុជាកាលពីសប្តាហ៍មុន។
កត្តាដែលធ្វើឱ្យតម្លៃមាសដាំក្បាលចុះនៅមួយរយៈពេលចុងក្រោយនេះ ត្រូវបានលោក ឡុង សំណាង អះអាងថា គឺដោយសារភ្លើងសង្គ្រាមពន្ធរវាងសហរដ្ឋអាម៉េរិក និងចិនហាក់ថមថយកម្តៅ បន្ទាប់ពីលោក ដូណាល់ ត្រាំ ប្រធានាធិបតីសហរដ្ឋអាម៉េរិកបានបន្ទន់ឥរិយាបថចំពោះចិនលើការបញ្ចុះពន្ធបដិការលើទំនិញចិន។ ការឡើងថ្លៃប្រាក់ដុល្លារអាម៉េរិក និងការរក្សាបាននូវគោលនយោបាយហិរញ្ញវត្ថុល្អរបស់ធនាគារកណ្តាលអាម៉េរិក ក៏ជាកត្តាជំរុញឱ្យតម្លៃមាសមានការធ្លាក់ចុះផងដែរ។ បើតាមអ្នកជំនាញរូបនេះ តម្លៃហាងឆេងមាសនឹងមានស្ថានភាពប្រែប្រួលខ្លាំងបន្ថែមទៀត បន្ទាប់ពីសហរដ្ឋអាម៉េរិកប្រកាសអពីកំណើននៃការមានការងារធ្វើនៅសហរដ្ឋអាម៉េរិកនៅយប់ថ្ងៃទី២ ខែឧសភា នេះ ដែលវាគឺជាកត្តាចម្បងមួយក្នុងការជំរុញការប្រែប្រួលនៃតម្លៃហាងឆេងមាស និងតម្លៃប្រាក់ដុល្លារអាម៉េរិក។
ស្របពេលដែលតម្លៃមាសមានការធ្លាក់ចុះនៅមួយរយៈពេលចុងក្រោយនេះ អ្នកជំនាញរូបនេះ លើកទឹកចិត្តដល់វិនិយោគិន និងប្រជាពលរដ្ឋគួរតែទិញមាសទុក ពិសេសនៅពេលដែលមាសធ្លាក់ចុះដល់តម្លៃប្រមាណ៣,៨០០ទៅ៣,៧០០ដុល្លារក្នុង១តម្លឹង។ តាមការព្យាកររបស់អ្នកជំនាញរូបនេះ តម្លៃមាសអាចនឹងធ្លាក់ចុះមកនៅត្រឹម៣,៨០០ដុល្លារក្នុងមួយតម្លឹង ហើយនឹងហក់ឡើងឈានដល់កម្រិតបំបែកកំណត់ត្រាជាថ្មី បន្ទាប់ពីការធ្លាក់ចុះនេះ៕
អត្ថបទ សោម ស្រីពេជ្រ និងរូបភាពឯកសារ
