
ធនាគារវិនិយោគ Goldman រំពឹងថា អត្រាពន្ធគយទំនងជានឹងកើនឡើង១៥% នៅពេលលោក ត្រាំ ប្រកាសយកពន្ធទ្វេភាគីនៅថ្ងៃពុធ សប្ដាហ៍នេះ ដោយធនាគារនេះមើលឃើញថា ការយកពន្ធនេះនឹងបង្កើនអត្រាអតិផរណា បន្ថយកំណើន និងបង្កើនហានិភ័យនៃវិបត្តិសេដ្ឋកិច្ច។
នៅពេលវិធានការពន្ធថ្មីនេះ ត្រូវបានអនុម័ត ក្រុមសេដ្ឋវិទូនៅធនាគារ Goldman Sachs ដឹកនាំ បានមើលឃើញពីផលប៉ះពាល់អវិជ្ជមានយ៉ាងទូលំទូលាយទៅលើសេដ្ឋកិច្ច។ ជាមួយគ្នានេះក្រុមអ្នកជំនាញរំពឹងថា ហានិភ័យបណ្ដាលមកពីការយកពន្ធចាប់ពីថ្ងៃទី២ ខែមេសា ខាងមុខ នឹងមានទំហំធំជាងអ្វីដែកគេបានរំពឹងទុកកាលពីពេលទៅទៀត។
ធនាគារវិនិយោគខ្នាតយក្សនេះ បានព្យាករថា តាមរយៈវិធានការពន្ធគយថ្មីរបស់លោក ត្រាំ នេះនឹងជំរុញឱ្យអត្រាអតិផរណាស្នូលដោយមិនរាប់បញ្ចូលតម្លៃអាហារ និងថាមពលនឹងឡើងដល់៣,៥% ក្នុងឆ្នាំ២០២៥ ដោយកើនឡើង០.៥% បើធៀបនឹងការព្យាករកាលពីលើកមុន និងជាតួលេខមួយដែលកើនលើសពីគោលដៅ២% របស់ធនាគារកណ្ដាលអាម៉េរិក ទៅទៀត។ បន្ថែមលើនេះ ធនាគារ Goldman Sachs បានវាយតម្លៃថា ភាពអត់ការងារធ្វើនៅសហរដ្ឋអាម៉េរិកនឹងឈានដល់៤,៥% កើនឡើង០,៣% បើធៀបនឹងការព្យាករកាលពីលើកមុន៕
អត្ថបទ៖ សុខ មង្គល