ការផ្តាច់សម្ព័ន្ធភាពរបស់គណបក្សភូមិចៃថៃ ចេញពីរដ្ឋាភិបាលចម្រុះដឹកនាំដោយគណបក្សភឿថៃបច្ចុប្បន្ន ទំនងជាធ្វើឱ្យទំនុកចិត្តរបស់អ្នកវិនិយោគនៅក្នុងប្រទេសថៃមានការធ្លាក់ចុះបន្ថែមទៀត ចំពេលសេដ្ឋកិច្ចថៃកំពុងរងការគំរាមកំហែងពីពន្ធបដិការ៣៦% ដែលគ្រោងនឹងដាក់ដោយសហរដ្ឋអាម៉េរិក។
លោក ផុនយ៉ាវាត់ ស្រ៊ីស៊ីង (Poonyawat Sreesing) អ្នកជំនាញផ្នែកសេដ្ឋនៃមជ្ឈមណ្ឌលស៊ើបការណ៍សម្ងាត់សេដ្ឋកិច្ចរបស់ធនាគារ Siam Commercial Bank បានអះអាងថា សេដ្ឋកិច្ចថៃបានរងសម្ពាធពីភាពមិនច្បាស់លាស់ខាងនយោបាយមួយរយៈមកហើយ ប៉ុន្តែទំនងជាមិនអាចទប់ទល់នឹងស្ថានការណ៍ធ្ងន់ធ្ងរ ដែលកើតចេញពីការរំលាយសភាបាននោះទេ។ តែយ៉ាងណាលោកសង្ឃឹមថា អ្នកនយោបាយអាចឈានដល់ការសម្របសម្រួលមួយ ហើយបានអះអាងថា គ្មាននរណាម្នាក់ចង់ឃើញស្ថានភាពនយោបាយមានភាពចលាចលក្នុងអំឡុងពេល ដែលសេដ្ឋកិច្ចស្ថិតក្នុងភាពផុយស្រួយនោះទេ។
ដោយឡែកលោក យុនយុង ថៃចារឿន (Yunyong Thaicharoen) ប្រធានក្រុមអ្នកសេដ្ឋ និងជាមន្ត្រីផ្នែកនិរន្តរភាពនៅ Siam Commercial Bank ដូចគ្នាដែរនោះបាននិយាយថា ការរុះរើគណៈរដ្ឋមន្ត្រីគួរតែត្រូវបានធ្វើឡើងឱ្យបានឆាប់រហ័ស ដើម្បីកាត់បន្ថយផលវិបាកអវិជ្ជមានលើសេដ្ឋកិច្ច និងធ្វើឱ្យប៉ះពាល់ដល់ទំនុកចិត្តរបស់អ្នកវិនិយោគ។
ជាមួយគ្នានេះលោក ស៊ុមឆៃ ស៊ីធីឆៃរីឆាត (Somchai Sittichaisrichart) នាយកគ្រប់គ្រងក្រុមហ៊ុនចែកចាយផលិតផល IT SIS Distribution បានលើកឡើងថា អស្ថិរភាពនយោបាយនឹងធ្វើឱ្យប៉ះពាល់យ៉ាងធ្ងន់ធ្ងរដល់ស្ថានភាពសេដ្ឋកិច្ច ដែលកំពុងផុយស្រួយរបស់ប្រទេសថៃរួមទាំងបំណុលគ្រួសារ ការនាំចេញទៅកាន់សហរដ្ឋអាម៉េរិក និងវិស័យទេសចរណ៍។ ហើយកត្តាទាំងនេះអាចនឹងទាញទម្លាក់កំណើន GDP របស់ថៃឱ្យធ្លាក់ចុះដល់កម្រិតសូន្យ ឬយ៉ាងល្អបំផុត១%នៅឆ្នាំ២០២៥ នេះ។ អ្នកជំនាញរូបនេះយល់ឃើញថា ដំណើរការដែលមានប្រសិទ្ធភាពបំផុត គឺការរំលាយសភា និងរៀបចំការបោះឆ្នោតជ្រើសរើសមេដឹកនាំថ្មីជាជាងឱ្យរដ្ឋាភិបាលគ្មានស្ថិរភាពបន្តដឹកនាំ ដែលអាចធ្វើឱ្យខូចទំនុកចិត្តដល់សាធារណជន។
គួរបញ្ជាក់ថា គណបក្សភូមិចៃថៃ មានអាសនៈសរុបចំនួន៦៩កៅអីនៅសភា ហើយនៅក្នុងរដ្ឋាភិបាលមានសមាជិកសរុប៨រូប ដោយរួមទាំងលោក អនុទិន ចាន់វីរៈគុល (Anutin Charnvirakul) ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ៕
ដោយៈ សរ សុជាតិ
