រដ្ឋមន្ត្រីការពារជាតិថៃ និងកម្ពុជា បានចុះហត្ថលេខាលើបទឈប់បាញ់បន្ទាន់មួយនៅក្នុងកិច្ចប្រជុំគណៈកម្មាធិការព្រំដែនទូទៅកាលពីថ្ងៃទី២៧ ខែធ្នូ ដោយបទឈប់បាញ់នេះបានចូលជាធរមាននៅម៉ោង១២ថ្ងៃត្រង់ថ្ងៃដដែលនោះ។ ជាមួយគ្នានេះ ភាគីថៃ ក៏បានឯកភាពព្រមប្រគល់យោធិនកម្ពុជា ទាំង១៨នាក់ ដែលថៃ បានចាប់ និងឃុំខ្លួនដោយខុសច្បាប់អស់រយៈពេលជាង១៥០ថ្ងៃឱ្យមកកម្ពុជាវិញផងដែរ ប្រសិនបើបទឈប់បាញ់ត្រូវបានអនុវត្តពេញលេញក្នុងរយៈពេល៧២ម៉ោង។
លោក អង់តូនីញ៉ូ ហ្គូធើរ៉េស (Antonio Guterres) អគ្គលេខាធិការអង្គការសហប្រជាជាតិ បានស្វាគមន៍ចំពោះកិច្ចព្រមព្រៀងនេះ និងបានចាត់ទុកវាជាជំហានវិជ្ជមានមួយឆ្ពោះទៅរកការកាត់បន្ថយទុក្ខវេទនារបស់ជនស៊ីវិល បញ្ចប់អរិភាពបច្ចុប្បន្ន និងបង្កើតបរិយាកាសអំណោយផលដល់ការសម្រេចបាននូវសន្តិភាពយូរអង្វែង។
ជាមួយគ្នានេះ ប្រទេសចិន ក៏បានចេញមកស្វាគមន៍ចំពោះបទឈប់បាញ់នេះផងដែរ។ សម្រាប់ចិន ការសម្រេចបានបទឈប់បាញ់នេះ បានបង្ហាញថា ការសន្ទនា និងការពិគ្រោះយោបល់គឺជាមធ្យោបាយដ៏មានប្រសិទ្ធភាពក្នុងការដោះស្រាយជម្លោះដ៏ស្មុគស្មាញ។
ប្រទេសម៉ាឡេស៊ី ក៏បានស្វាគមន៍ចំពោះកិច្ចព្រមព្រៀងរវាងភាគីទាំងពីរនេះដែរ។ នាយករដ្ឋ មន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានសរសេរនៅលើបណ្តាញសង្គម X ថា ការសម្រេចចិត្តបញ្ឈប់ការប្រយុទ្ធគ្នា និងការរក្សាកងកម្លាំងនៅនឹងកន្លែងបានឆ្លុះបញ្ចាំងពីការទទួលស្គាល់រួមគ្នាថា ការអត់ធ្មត់ គឺត្រូវបានអនុវត្តជាពិសេស ដើម្បីផលប្រយោជន៍របស់ជនស៊ីវិល។
ដោយឡែកសហរដ្ឋអាម៉េរិក ក៏បានស្វាគមន៍ចំពោះបទឈប់បាញ់នេះដែរ និងបានជំរុញឱ្យប្រទេសទាំងពីរអនុវត្តកិច្ចព្រមព្រៀងសន្តិភាពទីក្រុងគូឡាឡាំពួ ដែលភាគីកម្ពុជា និងថៃ បានចុះហត្ថលេខាកាលពីខែតុលា នៅប្រទេសម៉ាឡេស៊ី ផងដែរ។ រដ្ឋមន្ត្រីការបរទេសអាម៉េរិក លោក ម៉ាកូ រូប៊ីយ៉ូ បានជំរុញឱ្យកម្ពុជា និងថៃ គោរពការប្តេជ្ញាចិត្តនេះភ្លាមៗ និងអនុវត្តលក្ខខណ្ឌនៃកិច្ចព្រមព្រៀងសន្តិភាពទីក្រុងគូឡាឡាំពួ ឱ្យបានពេញលេញ។
ទន្ទឹមនឹងនេះ ប្រធានអ្នកនាំពាក្យរដ្ឋាភិបាលជប៉ុន លោក តូស៊ីហ៊ីរ៉ូ គីតាមូរ៉ា (Toshihiro Kitamura) បាននិយាយថា ទីក្រុងតូក្យូស្វាគមន៍កិច្ចព្រមព្រៀងនេះ និងសង្ឃឹមយ៉ាងមុតមាំថាបទឈប់បាញ់នេះនឹងត្រូវបានអនុវត្តជាលំដាប់។
អ្នកនាំពាក្យក្រសួងការបរទេសសហភាពអឺរ៉ុប លោក អាណូអា អែល អាណូនី (Anouar El Anouni) បានបង្ហោះសារនៅលើបណ្តាញសង្គម X ដោយថ្លែងអំណរគុណដល់អាស៊ានសម្រាប់ការដើរតួនាទីវិជ្ជមាន និងបានអំពាវនាវឱ្យកម្ពុជា និងថៃ អនុវត្តកិច្ចព្រមព្រៀងនេះដោយស្មោះត្រង់ ហើយប្លុកអឺរ៉ុប បានត្រៀមខ្លួនជាស្រេច ដើម្បីផ្តល់ការគាំទ្រចាំបាច់ណាមួយ៕
ដោយ៖ សុខ មង្គល
