នៅក្នុងកិច្ចប្រជុំរវាងនាយករដ្ឋមន្ត្រីកម្ពុជា និងប្រធានាធិបតីទួរគី នៅទីក្រុងអ៊ិស្តង់ប៊ុល ភាគីទាំងពីរ កម្ពុជា-ទួរគី បានព្រមព្រៀងគ្នា បង្កើនពាណិជ្ជកម្មទ្វេភាគីឲ្យឡើងដល់ ១ពាន់លានដុល្លារអាមេរិក នៅក្នុងពេលអនាគតដ៏ខ្លីខាងមុខ។
ដំណើរទស្សនកិច្ចរបស់នាយករដ្ឋមន្ត្រីកម្ពុជាទៅកាន់ប្រទេសទួរគីនេះ ធ្វើឡើងបន្ទាប់ពីដំណើរទស្សនកិច្ចរបស់ប្រតិភូជាន់ខ្ពស់កម្ពុជាទៅចូលរួមជំនួបប្រជុំកំពូល អាស៊ី-អឺរ៉ុប នៅទីក្រុងប្រ៊ូហ្ស៊ែល ប្រទេសប៊ែលហ្ស៊ិក ដែលនៅទីនោះ ការគ្រោងដកការអនុគ្រោះពន្ធក្រោមកម្មវិធី EBA របស់សហភាពអឺរ៉ុប ពីប្រទេសកម្ពុជា បានក្លាយជាប្រធានបទក្ដៅនៃជំនួបទ្វេភាគីរបស់សម្ដេចតេជោ ហ៊ុន សែន និងប្រមុខការទូតសហភាពអឺរ៉ុប។
ប៉ុន្តែ នៅក្រោយជំនួបនោះ ប្រមុខការទូតសហភាពអឺរ៉ុប បានថ្លែងតាមសារព័ត៌មានថា គេនៅមិនទាន់មានដំណោះស្រាយណាមួយ ដើម្បីបញ្ជៀសការបើកដំណើរការនីតិវិធីដកការអនុគ្រោះពន្ធពីប្រទេសកម្ពុជានៅឡើយទេ។
តើអ្នកបានអានអត្ថបទនេះ ឬនៅ?
កាលពីថ្ងៃទី៥ តុលា ឆ្នាំ២០១៨ មន្ត្រីជាន់ខ្ពស់ទទួលបន្ទុកពាណិជ្ជកម្មរបស់សហភាពអឺរ៉ុប បានសរសេរអត្ថបទមួយថា សហភាពអឺរ៉ុបបានប្រាប់រដ្ឋាភិបាលកម្ពុជា ថា ខ្លួនបាននិងកំពុងបើកដំណើរការនីតិវិធីដើម្បីដកការអនុគ្រោះពន្ធក្រោមកម្មវិធី EBA ពីប្រទេសកម្ពុជា ដែលនីតិវិធីនេះអាចនឹងត្រូវចំណាយពេលជាង ១ឆ្នាំ ទើបឈានដល់ការសម្រេចចុងក្រោយជុំវិញថា តើដក ឬមិនដកការអនុគ្រោះពន្ធសម្រាប់កម្ពុជានេះ។
ពីទីក្រុងអ៊ិស្តង់ប៊ុល ប្រទេសទួរគី នាយករដ្ឋមន្ត្រីកម្ពុជា បានប្រកាសតាមទំព័រហ្វេសប៊ុករបស់លោកថា កម្ពុជានិងទួរគីបានព្រមព្រៀងគ្នា បង្កើនទំហំពាណិជ្ជកម្មទ្វេភាគី ឲ្យឡើងដល់ ១ពាន់លានដុល្លារអាមេរិក ក្នុងពេលអនាគតដ៏ខ្លី និងថា កម្ពុជានឹងបើកស្ថានឯកអគ្គរាជទូតនៅប្រទេសទួរគី នៅឆ្នាំ២០១៩ ខាងមុខ។
តើអ្នកបានអានអត្ថបទនេះឬនៅ?
គួររំឭកថា បើតាមតួលេខឆ្នាំ២០១៥ របស់ក្រសួងការបរទេសទួរគី ពាណិជ្ជកម្មទ្វេភាគី ទួរគី-កម្ពុជា មានចំនួនទឹកប្រាក់ប្រមាណជិត ១១០លានដុល្លារអាមេរិក។ ប្រទេសទួរគី បានបើកការិយាល័យស្ថានទូតរបស់ខ្លួន នៅប្រទេសកម្ពុជា កាលពីឆ្នាំ២០១៣។
នៅក្នុងជំនួបទ្វេភាគីរវាងសម្ដេចតេជោ នាយករដ្ឋមន្ត្រីកម្ពុជា និងលោកប្រធានាធិបតីទួរគី ឯកសារកិច្ចព្រមព្រៀង និងអនុស្សរណៈយោគយល់គ្នា ចំនួន ៨ ត្រូវបានចុះហត្ថលេខារវាងប្រទេសទួរគី និងប្រទេសកម្ពុជា៕
