សហរដ្ឋអាម៉េរិក ដែលបានដើរតួនាទីយ៉ាងសំខាន់ក្នុងការរំលត់ភ្លើងសង្គ្រាមថៃ ឈ្លានពានកម្ពុជា ដល់ទៅ២លើកនៅក្នុងឆ្នាំ២០២៥ កន្លងទៅថ្មីៗនេះ បានសន្យាផ្តល់កញ្ចប់ជំនួយដល់ប្រទេសទាំងពីរសរុបចំនួន៤៥លានដុល្លារ ក្នុងកិច្ចខិតខំប្រឹងប្រែងដើម្បីធានាស្ថិរភាព និងវិបុលភាពក្នុងតំបន់។ នេះបើយោងតាមការបញ្ជាក់ពីមន្ត្រីជាន់ខ្ពស់ក្រសួងការបរទេសសហរដ្ឋអាម៉េរិក កាលពីថ្ងៃសុក្រ សប្ដាហ៍មុន។
ឧបការីនៃរដ្ឋមន្ត្រីការបរទេសអាម៉េរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក ម៉ៃឃើល ឌឹសំប្រេ (Michael DeSombre) បានប្រកាសបែបនេះក្នុងសន្និសីទសារព័ត៌មានតាមអនឡាញនៅរដ្ឋធានីបាងកក ប្រទេសថៃ ជាកន្លែងដែលលោកបានជួបជាមួយមន្ត្រីជាន់ខ្ពស់ថៃ ដើម្បីពិភាក្សាអំពីការអនុវត្តបទឈប់បាញ់ដែលម្ពុជា-ថៃ សម្រេចបានកាលពីថ្ងៃទី២៦ ខែតុលា ឆ្នាំ២០២៥ ដែលត្រូវបានគេស្គាល់ផងដែរថា ជាកិច្ចព្រមព្រៀងសន្តិភាពទីក្រុងគូឡាឡាំពួរ។
លោក ម៉ៃឃើល ឌឹសំប្រេ (Michael DeSombre) បានថ្លែងថា ការស្តារសន្តិភាពនៅតាមព្រំដែនកម្ពុជា-ថៃ បើកឱកាសថ្មីសម្រាប់សហរដ្ឋអាម៉េរិក ក្នុងការពង្រឹងការងាររបស់ខ្លួនជាមួយប្រទេសទាំងពីរ ដើម្បីលើកកម្ពស់ស្ថិរភាពក្នុងតំបន់ និងជំរុញផលប្រយោជន៍រនៅក្នុងតំបន់ឥណ្ឌូ-ប៉ាស៊ីហ្វិក ឱ្យកាន់តែមានសុវត្ថិភាព រឹងមាំ និងរីកចម្រើនជាលំដាប់។
លោក ម៉ៃឃើល មានប្រសាសន៍ថា សហរដ្ឋអាម៉េរិកនឹងផ្តល់ជំនួយថវិកាចំនួន១៥លានដុល្លារ សម្រាប់ការរក្សាស្ថិរភាពព្រំដែនដើម្បីជួយសហគមន៍ឱ្យងើបឡើងវិញ និងគាំទ្រដល់ជនភៀសសឹក រីឯ១០លានដុល្លារសម្រាប់ប្រតិបត្តិការដោះមីន និងបោសសម្អាតមីនមិនទាន់ផ្ទុះ ហើយ២០លានដុល្លារសម្រាប់គំនិតផ្តួចផ្តើមដែលនឹងជួយប្រទេសទាំងពីរប្រយុទ្ធប្រឆាំងនឹងប្រតិបត្តិការឆបោក និងការជួញដូរគ្រឿងញៀនក្នុងចំណោមកម្មវិធីជាច្រើនទៀត។
ទោះជាយ៉ាងណា ភាគីថៃ បែរជាបំប៉ោងតួលេខជាឯកតោភាគីថា សហរដ្ឋអាម៉េរិក បានជួយខ្លួនម្នាក់ឯងរហូតដល់ទៅ១០០លានដុល្លារ សម្រាប់វិស័យយោធាដែលបង្កឱ្យមានការជជែកវែកញែកយ៉ាងក្ដៅគគុកអំពីបញ្ហានេះ។ នេះបើយោងតាមប្រភពសារព័ត៌មានថៃ។
ទន្ទឹមនេះ លោក ម៉ៃឃើល បានលើកឡើងថា ព័ត៌មានលម្អិត ស្ដីពីកញ្ចប់ជំនួយនៅតែស្ថិតក្រោមការពិភាក្សានៅឡើយ៕
ដោយ: តែម សុខុម
